Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Экономика

Ёмла и средняй бизнессь

 
Предпринимателькс аф шачендыхть, а арсихть. Пади, тянь колга инголи аф пяк арьсекшнесь Рузаевскяй райононь Перхляй велеса шачф-касф мокшалясь Николай Васильевич Сардаев. Тяни сон бизнесмен. Сембода лияда башка, Перхляй велень эряйхне кочказь депутатокс. Николай Васильевич, кода и народть мархта лия кочкафне, пичеди шачема ширенц, тядянь-алянь лямбоса эжтьф уженянц инкса. Депутатть, индивидуальнай предпринимательть пяк оцю мялец, штоба велец эряль, штоба сонь улель сай пингоц. Катк тяни аф пяк кирдьсайть оттнень велеса, велень тефненьге лувондсазь аф теждякс и тушендыхть-срадондыхть кие-коза, но сембе сяка ули надияма, што эряенди тевсь полафты лия шири. И тя надиямась кемоксневи сянь мархта, што мушендовихть стама ялгат, конат кода тячиень героеньке и кярьмотькшнихть тевс:  касфнихть велень хозяйствань разнай культурат, аф ширде ваныкс улендихть велеса социальнай кизефкснень решандамаса.
Аф ваномок тяддень пиземфтома погодать лангс, Сардаевонь паксянзон лангста получаф цебярь урожай. Тянь колга пачфнихть цифратне. Кепотьксонди, сембоц модадонза индивидуальнай предпринимательть кафта тежятть ниле сятт гектар. Зерновой культураса видефоль вейхкса сятт гектар. Колмогемонь центнер получафоль эрь гектарста. Тяддень пиземфтома кизоти тя пяк цебярь сатфкс. А вов шинжаромада и рапста сявф кота сядонь тонна. Эряви азомс сявок, што сембе касфтфсь урядаф эсь пингстонза и оцю качестваса. Сяда тов кярьмотьфоль озимоень видемс модань сокама. Вете сятт гектар заняф озимой культураса. Лисьфне мяль кеподихть. Тяни аньцек эряволь ловня, штоба ванфтомс синь эендамда.
Но тянь мархта тевсна ашезь шумордав. Эряви анокламс тундати. Корхтамась, шарьхкотьф, мольфтеви удобрениятнень колга. Индивидуальнай предпринимательсь лац содасы-шарьхкодьсы, што паксятнень апак «антт», оцю урожаень колга корхтамска аш месть. Сянкса эстокиге кярьмотьфоль удобрениянь пачфнема, мезть тевс нолдасазь тунда. Но аноксь ни анок.
Хозяйствань эрь вятись, руководительсь старандай аф тарксемс пингть техникать петеманц мархта. Тя тевти Н.В.Сардаевонь хозяйстваса шарфневи башка оцю мяль. Работась мольфтеви сембе вийса и Од кизоти арьсекшневи аноконь линейкас путомс тракторхнень и комбайнатнень.
Кодама культура видеви сай кизонь тунда? Кота сятт гектарсь заняви рапсса. Тя кафта сятт гектарда сяда лама тяддень кизоть коряс, ниле сятт гектарсь—шинжаромаса, тнярось жа кадови пар паксякс, лядыкс площадьса видеви яровой тозер.
Тиемс рабочай вастт—тя эрь индивидуальнай предпринимательть васень задачац. Кемоньда лама ломань мусь эстеенза тев и Николай Васильевич Сардаевонь хозяйстваса. Аф оцю коллективсь, но тевонь кельги, максф тевть инкса ответственностень маряй.
Материально-техническяй базать кемокстамац стане жа ащи васенце вастса. Кепотьксонди, тядде хозяйствась рамась 100 тоннань вест, «Полесье» комбайна, сай кизоть планца добувамс кафта тракторхт и лия техника.
Ряцок хозяйстваса тевонзон мархта, предпринимательть озадонь седихть ащема аф кадондсазь и депутаттнень наказсна. Мезе вешихть велеряйхне депутатснон эзда? Васендакиге лама корхнемада калгода вельхкс мархта китнень колга. Коса синь срадсть-тапсевсть, кона ульцяса ефси ашет. Улихть прябалат и ведть мархта. Эряви полафтомс водопроводонь линиясь, Великай Отечественнай войнаса шавф воиттненди памятниксь. Аф лишнай улель и идень садсь. Тевда-наказда пяк лама. И сембе синь пяк эрявикст, тячиень шинь. Лисенди, депутаттненди ули мезь лангса работамс.
                                                                                                                                        Н.КУБАНЦЕВА.

ВЕЛЕНЬ ПРЯБАЛАТНЕНЬ ЭЗДА АФ АЩИ ШИРЕСА
15.12.2014 №
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин