Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Молодежный клуб

СТУДЕНТКАНЬКЕ ЛАЦ НЯФТЕЗЕ ПРЯНЦ «МИСС СТУДЕНЧЕСТВА ФИННО-УГРИИ» КОНКУРССА

Марнек конкурссь ащесь 6 этапста. «Мон народозень пялькскацан» видео-конкурсть эса Ирина Сидоркина азондсь Мордовия Республикать колга стихса. Стилизованнай национальнай костюмса дефилесь етась пяк лац. Стирсь маштозь няфтезе аф аньцек сценическяй костюмонц, но и морамань и артистонь тевса маштомошинц. Залсь сонь васьфтезе кядень кайги цяпамаса. «Финно-угорскяй нароттнень видемань пингсна» конкурссь-представлениясь арась инь мяляфтовикснень эзда фкакс. Пингстонза Ирина озондсь Масторавати, макссесь теенза казнет, валондозе модать. Тя номерть тиемс лездсть студенттне-вокалисттне, актёрхне и хореографне. Асушинь конкурсса Мордовияста студенткась няфтсь этно-арт-повествования Я.Кулдуркаевонь «Эрьмезь» поэманц коряс. Тя номерть стирсь лемдезе тяддень Литературань кизоти. Ирина студенттнень-актерхнень мархта сценать лангса тисть драматическяй действия. Теест лац удалась няфтемс Пурейша князть, Эрьмезть, Котовать и лия геройхнень образснон.
Интеллектуальнай конкурссь етась «Интуиция» налхкома лаца. Конкурсанткатненди эрявсь азондомать коряс содамс ся геройть лемонц и национальностенц, конань кочказе эрь стирсь. Ирина пачфтсь Советскяй Союзонь Геройть, летчикть-истребительть, мокшалять М.П.Девятаевонь колга. Мекольдень конкурсса стирьхне етафтсть дефиле, няфтемок мазышиснон.
Васенце вастть «Мисс студенчества Финно-угрии» конкурсса сатозе Карелияста саф стирсь Мария Калинина. Ирина Сидоркинати максфоль «Мисс Признание» титулсь. Соперницанзон мяльснон коряс, стирти максомаль конкурсса сяськиень лемсь.
Сонць Ирина Сидоркина виденцясь, што пялькстсь мазы и еню стирьхнень мархта. Хуш теенза ашезь удала сяськомс тя конкурсса, сякокс эсонза участиясь макссь стирти оцю и цебярь опыт. Теенза ульсь кода азондомс Мордовиять колга, конань инкса маряй гордость. «Тейне оцю честь няфтемс республиканьконь тя оцю пялькстомаса»,—мярьгсь Ирина. Конкурсти анокламада, выступандамада башка, конкурсанткатненди ульсь кода ваномс Ижевск ошть мазы вастонзон. А инь мяляфтовикс, И.Сидоркинать валонзон коряс, арась «Бурановскяй бабанятнень» мархта васедемась. Стирьхненди удалась корхнемс панжада вайме ломаттнень мархта, содамс синь творчестваснон.
                                                                                                                                               И.ПЯТИНА.

14.05.2015 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин