Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Спорт

МОРДОВИЯСА ЁТАСЬ РОССИЯНЬ ЧЕМПИОНАТСЬ ВЕЛОСПОРТТЬ-ШОССЕТЬ КОРЯС

Пялькстоматнень панжемста МР-нь Оцюнясь шарфтсь мяль, што республикась васенцеда примай странань чемпионат велоспортть-шоссеть коряс, и Саранскяйсь кочкафоль тя тевонди аф стак. Васенцесь ся, што Мордовияса вийхть кочкси велоспортсь (корхтамась мольфтеви ВМХ-ть колга), а омбоцесь сянь эса, што тяда инголе республикась кафксть маштозь етафтозе Россиянь велоспортонь Федерациянь первенствать. «Саранскяйсь примси пяк лама пялькстома—Россиянь школьникнень и тонафнихнень Спартакиадаснон, фигурнайста курькснемать коряс турнирхт, «Мордовия» футбольнай клубсь налхки Премьер-лигаса… Тя сембось корхтай спортивнай кеме ширеть колга, што тейнек вийс коре етафнемс миронь, Европань, Россиянь чемпионатт»,—мярьгсь МР-нь Оцюнясь Владимир Волков.
Россиянь велосипеднай спортть Федерациянц генеральнай директоронц Владимир Вагенлейтнеронь валонзон коряс, Саранскяйса странань чемпионатсь организациянц коряс лувф инь цебярькс национальнай первенствать марнек историясонза. «Пара мялезон, мес велосипедонь спортсь тиендьсы сядовок козякс регионть спортивнай ширенц»,—мярьгсь сон, каземок МР-нь Оцюняти Владимир Волковонди Международнай олимпийскяй комитетть дипломонц, конань подписандазе МОК-ть президентоц Томас Бах.
Азсаськ, Саранскяйса етафтф пялькстоматнень пингста эвондась велоспортть коряс Россиянь чемпионатонь од кой. Тяфта, юниорскяй гонкань сяськись получазе «Катюшань» майканц, коза путфтольхть профессиональнай тя велокомандань сембе гонщикнень автографсна. Тя призть арьсезе колмонь-крдань олимпийскяй чемпионць, миронь котонь-крдань чемпионць, «Катюшать» генеральнай менеджероц Вячеслав Екимов. Валонзон коряс, Мордовиясь, коса кизода инголе панжевсь велоспорт-шоссень отделения, ефси курок анокласыне велогонщиконзон, конат достойнайста няфтьсазь республикать странань сяльдень чемпионаттнень эса. 

03.07.2015 №
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин