Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Демография

КЕЛЬГОМАСНА, СЕДИЕНЬ ЛЯМБОСНА САТНИ СЕМБОНДИ

 
…Саранскяень эряйсь Н.В.Долматовась аф аньцек ашезень када эсь иднянзон, но и сявсь эсь ширезонза кафта приемнай итть. Варжакстат Долматофнень семьяста од эряйхнень лангс и шарьхкотькшнесак—павазу тяште ала шачсть Никита и Настя. Аф ваномок сянь лангс, што шарфтсь эздост шачфтысна, тядянь кельгомать и лямботь синь варжазь-шарьхкодезь педа-пес. Вейхксоце кизось ни эряйхть дугаттне-сазорхне од семьяса, вейхксоце кизось синь перьфкаст кельгомась, ужяльдемась, заботендамась.
Наталья Васильевна семьясост кассь дуганонц мархта кафонест, сяс емланястокиге сяда товолдонь эряфсонза няендезе эсь прянц лама идень тядякс. Приемнай шабатнень мирттне-рьвятне Долматофне сявозь эсь семьязост, мзярда ульсть ни кафтонь-крдань родителькс: Саша цераснонды эста 12 кизоль, Кристинати ся пингть аньцек топодсь 2 кизонят:
—Настясь васедемстонк эстокиге озась элезон,—лятфнесы Наталья Васильевна.—Идень кудса работайхне пяк дивандасть. Миндедонк инголе инксонза сашендсть ни вете семьят, но сон пешкодозь ворьготькшнесь, а тяса—сонць маладсь.
Идень куду мирттне-рьвятне састь фкя шабанкса. Но мзярда няезь Настять и Никита дуганнянц, седисна солась. 1,5 кизоса церокшсь няемас коре шарфтсь колма ковонь атнайня лангс. Апак каштортт потясь соскать эса и васенда ефси ашезь шарфне мяль перьфканза ащихнень лангс.
—Варжакстомок лангозонза, ашесть кирдев сельмоведне,—азозе приемнай тядясь.—Лемдине «церанякс», а сон отвечась—шерьфтезень пильгонзон. Мирдезень мархта саме мяльс, што тя тейнек знак…
Долматофненди, кода примаф, мярьгсть арьсемс лац-ряц. Вдь Никитась кирдсь стака операция и ули пелькс, што сон мзярдовок аф ушеды якама. Мезть лангс мирттне-рьвятне отвечасть: «Мезе тяса арьсемс, эряви лездомс церокшкяти!»
И вов ни вейхксоце кизось эряйхть синь фкя оцю семьякс, коса сембе «синценнет». Ниле кизода инголе Долматофне етасть эряма Ичалковскяй районцта Саранскяи. Настясь и Никитась якайхть школав и пцтай мезьсовок тячи аф аердыхть сверстникснон эзда.
Кода лятфнесы Наталья Васильевна, семьясост од эряйхненди сембонь коряс сяда пяк кенярдсь Сашась. Никитать тячемс кельгозь лемнесы «кукусикокс». Фалу ваннесь емланять эса, баловандакшнезе мезьса маштсь. Тячи Сашась служай армияса и пяк лажаткшни емла дуганнянцты.
Долматофнень семьясна эряй аф козяста, сянкса кельгомась, седиень лямбось и фкя-фкянь ужяльдемась фалу азорондайхть кудсост.
—Мзярда азонкшнеса, што приемнайда башка улихть нинге кафта родной идне, лангозон ваныхть, кода инопланетянкань лангс,—азозе Наталья Васильевна.—А мон аф шарьхкотькшнесайне ся ломаттнень, конат пелендихть явомс кельгомаснон тядянь лямбофтома лятф шабанятнень мархта.
И сембось ба лац, кда аф финансовай ширдень тапорксне. Кафта комнатаса «литовкать» рамаманкса Долматофне сявсть аф емла кредит. Комсь тежянь цалковай паннихть эрь ковня инксонза. Штоба кода аф кода кирдемс пильге лангса, семьянь азорсь трудендай ваймама шифтома, рана шобдаваста поздна илядьс. Наталья Васильевна работай Казанскяй Божией матерть лемса храмса. Зарплатасна аф конашкат, сяс аф шуроста семьяти сашендови пяк стакаста. Александр Владимирович и Наталья Васильевна надияйхть, што прябаласна муй шарьхкодема республикань власттнень ширде. А кда ни решандави эряма вастонь кизефкссна, шять, мирттне-рьвятне тага сявихть эсь ширезост уроз шабанят.
О.ЕВДОКИМОВА.

25.09.2015 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин