Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Культура

МОКШЭРЗЯНЬ ПРОФЕССИОНАЛЬНАЙ МУЗЫКАТЬ УШЕДЫЕЦ

 
    
 
Саранскяень музыкальнай училищась каннесы мокшэрзянь пяк содаф композиторть, хоровой дирижёрть, педагогть, мокшэрзянь профессиональнай музыкати ушетксонь тиить Леонтий Петрович Кирюковонь лемонц. Тяддень 1 июльста топодель 120 киза сонь шачема шистонза. Аф кунара Мордовия Республикань Композиторонь союзсь ушедозень тянди лемтьф пуромкснень. 29 октябрьста училищаса етафтовсь фкясь эздост—тя «Мордовиянь тяниень пингонь музыкальнай культурать эшксса Л.П.Кирюковонь творческяй и педагогическяй тевоц» лем ала республиканскяй научно-практическяй конференциясь, коза пуромкшнесть Мордовиянь музыковетт, ссузонь и вузонь преподавательхть, студентт.
Конференциять панжезе Российскяй  Федерациянь и Мордовия Республикань искусствань Заслуженнай деятельсь, Мордовия Республикань Народнай артисткась и Композиторонь союзть правлениянц председателец, содаф мокшавась Н.В.Кошелева.
Пуромксть сяда тов вятезе М.Е.Евсевьевонь лемса Мордовскяй государственнай педагогическяй институтонь музыкальнай образованиянь и музыкати тонафтомань методикань кафедрань доцентсь, педагогическяй наукань кандидатсь И.Е.Молоствова.
Ванфтольхть композиторть творческяй и педагогическяй тевонза, эряфонь киц. Шачсь Л.П.Кирюков Тамбовскяй губерниянь Спасскяй уездонь Пичёвка мокшень велеса (тяни Зубово-Полянскяй райононь Анаева велесь). Идькс пингстокиге кельговсть теенза мокшэрзянь народнай моротне. Ламода тя сатовсь тядянц,  Анна Никитична Кирюковать эзда, кона содась мокшэрзянь лама морода, сонь пяк мазыель вайгялец. М.Е.Евсевьевонь мярьгоманц коряс, 1910 кизоня Л.П.Кирюков поступась Казанскяй учительскяй инородческяй семинарияв. Мрдамок вели, работась школаса, пуроптсь хор. 1920-це кизотнень дирижёроль Саранскяйса, Пензаса, Москуса. 1931 кизоня шумордазе хоровой дирижированиянь классть коряс Московскяй консерваториять. Ульсь вятикс Мокшэрзянь драматическяй театрать видеса Музыкально-драматическяй студияти, работась Мордовскяй республиканскяй радиовещаниянь комитетть видеса этнографическяй хорса.
1929 кизоня лиссь Л.П.Кирюковонь «Мокшэрзянь морот» сборникоц, кона занясь башка васта мокшэрзянь народть национальнай культуранц историяса. 
Леонтий Петрович сёрмадсь музыка театральнай ламоц спектакльхненди. Сон—«Литова» музыкальнай драмать автороц, эрзянь «Несмеян и Ламзурь» (1944 к.) и мокшень «Нормальня» (1962 кизось) васенце оператнень сермадысна. 
«Л.П.Кирюковонь оцю путксоц Мордовиянь музыкальнай культурати,—мярьгсь И.Е.Молоствовась.—Сон панжезень китнень профессиональнай академическяй музыкати, путсь ушеткс произведениятненди, конатнень вельде содавихть мокшэрзянь народть образоц, ёнец, ваймоёжец, кялец».
«Мордовиянь вокально-хоровой музыкась европейскяй контекстса» темать коряс корхтась Л.П.Кирюковонь лемса Саранскяй музыкальнай училищань преподавательсь В.В.Семелёв. Валонзон эзда шарьхкодеви, што Л.П.Кирюков васенцекс смеказе мокшэрзянь музыкать марстонь ширензон аф аньцек рузонь, но и  татаронь, венгрань, монголонь и калмыконь музыкатнень мархта.
Национальнай музыкальнай культурать тонафтоманцты, ванфтоманцты башка мяль шарфневи музыкальнай училищаса. Сольфеджио урокнень эса Л.П.Кирюковонь вокально-хоровой музыканц тевс нолдаманц колга пачфтсь тостонь преподавательсь Н.Ф.Родина. Наталья Фёдоровнань руководстванц  ала музыкальнай училищань студенттне тонафнезь композиторть вокально-хоровой сочинениянзон, конат пара мяльса кулхцонтфтольхть пуромксса.
Тяниень пингть  Л.П.Кирюковонь творчестванц эрявиксшинц колга корхтась Саранскяй музыкальнай училищань преподавательсь С.В.Венчакова.
Леонтий Петровичень эряфоц сотфоль педагогонь тевть мархта. Сон лама киза работась преподавателькс училищаса, кона тяни каннесы лемонц. Педагогонь тевонц колга лямбоста корхтасть И.Е.Молоствовась и музыковедсь, МАССР-нь искусствань Заслуженнай деятельсь А.И.Макарова, конань  Л.П.Кирюков тонафнезе.
Таштомсть композиторть произведениянь сборниконза. Штоба ванфтоволь тя козяшись и еталь касы поколениятненди, эрявольхть синь нолдамс одукс. 

А.ВОЛГАПОВА.

16.11.2015 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин