Поиск по сайту: 
 

Архив
 июль 
 2019 
пн вт ср чт пт сб вс
1234567
891011121314
15161718192021
22232425262728
293031    

 
 

 

Экономика

ВЕЛЕСА СОЦИАЛЬНО-ЭКОНОМИЧЕСКЯЙ КИЗЕФКСНЕНЬ РЕШАНДАМАСНОНДЫ—БАШКА ОЦЮ МЯЛЬ

«Социально-экономическяй инфраструктурань ня кафта объекттнень панжемста примась участия лама оцю инжи, тяконь лувксса Мордовия Республикань Оцюнясь В.Д.Волков. А нинге ульсть Казань ошса Венгриянь генеральнай консулсь Ференц Контра и тостонь бизнесметт. Ичкоздень инжихне сашендсть Сире Турдаки вели аф стак, туфталсь—семенной од заводть панжемац. Катк сембе Мордовияти пяк эрявикс тя объектти заказчиксь Воеводскяй хлебоприемнай предприятиясь, а подрядчиксь «Аграрная производственная фирма «Норов» открытай акционернай обществась, но оцю технологиянь тя предприятиясь ули кода азомс международнайкс, сяс мес семенной заводти сембе оборудованиясь получаф Венгрияста. И нят, кода азозе Ференц Контра, инь од разработкатне. «Хевешген» фирмань специалисттне тонафтозь персоналть од оборудованиять мархта работама.
Зерновой культурань видьмонь анокламать коряс од предприятияса аруяфтовихть, размерс и сталмос коре явфтовихть видьмотне, тиеви протравливания, маравихть кядьгова-кода.
Кие кармай пачфнема зерна?—кизефттяда. Первичнай семенной материалть пачфниец «Аграрная производственная фирма «Норов» открытай акционернай обществась. Эряви азомс сявок, што тя хозяйствась оцю качествань видьмоса пяшкотькшнезень вешфксснон республикань велень хозяйствань ламоц предприятиятнень. «Норовть» паксянзон лангса касфтф отечественнай селекциянь цебярь сортонь тозерть и ячменть колга содаф сембе Мордовияса и акционернай обществась работай ведущай научнай учреждениятнень мархта марса. Тяка пингть, азф хозяйстваса фалу одкстопневи и козякофневи ассортиментсь.
Кода азозе «Агрофирма «Норов» ОАО-нь генеральнай директорсь Александр Ильич Поздняков, видьмонь мишендемась кармай мольфтевома «Развитие села» ГУП-ть вельде. Тяка пингть, питнетневок улихть сяськовомшкат республикань велень хозяйствань предприятиятненди. Кода арьсекшневи инголенди, зерновой культурань оцю качествань килограмма видьмоть инкса сави пандомс кемголмувошка-кеветиешка цалковай (мяльса кирдевихть тячиень питнетне). А вдь Мордовиять эзда ширеста ускф-рамаф видьмотне (да качестваське аф стама, кодама «Норовоннесь») стяшендыхть ламода сяда питниста. Од предприятиять—видьмонь аноклай заводть лангс улихть оцю надиямат, сон арась примеркс республикань агропромышленнай комплексса инновационнай тевть коряс.
Велеса социально-экономическяй кизефкснень решандамаснон эзда ащи, кда можна тяфта мярьгомс, велеть эряфоц, сонь уликсоц. Кда сембе вастова хозяйствань руководительхне тя кизефксти шарфнельхть сатомшка оцю мяль, пади, веленьковок, аф най миннетне, но и сембе Россияннетне афольхть сиреде, сяда лама эвондаль одс шачида, да и оттневок афольхть эряскода явомс шачема-касома уженяснон мархта. Но тянь коряс аш кода апрякамс «Норов» открытай акционернай обществань генеральнай директорть Александр Ильич Поздняковонь. Лятфтасаськ хуш Кочкуровскяй райононь Семилей велеса Социальнай центрань панжемать. Аф лама астама сонцень Семилей велень поселениять колга. Сувсихть эзонза вете населеннай пунктт. Тя сатомшка эзрай территориясь, коса оцю трудонь производительностсь. Социальнай центрась строяф 2014-2017 кизотненди и 2020 кизоти молемс республикань велень территориятнень эреклафтомаса госпрограммать мяльс сявозь. Тя программать коряс тяда инголе строяфтольхть азф велеса святительть Николаень храмоц, физкультурно-оздоровительнай комплекссь, вейхксогемонь вастонди бассейна мархта идень садсь, искусственнай вельхкс мархта стадионць, идень игровой площадкась, асфальтировандаф 1,4 вайгяльбень кувалмоса кись. А тяни, кода содасаськ, тевс максф Социальнай центрась, кона строяф киза кувалмоста и карьхцяф тя тевонди сядода лама миллион цалковай. Кафта этажса зданиясь сяда вейхксогемонь фкие вастонди, видесонза ули нильгемонь вастонди кафе. Фельдшерско-акушерскяй пунктсь, почтовай отделенияське сонь вельхксонц алот и нинге ламось лиясь.
Эряви азомс, «Норов» открытай акционернай обществась оцю сатфксонь сатнезь работай ни кеветие киза. Лятфтасаськ мезьста ушетфоль. Пингсь аф теждяль, жуватань ферматне срадома-каладома лангсотольхть, ломаттненди ашель работа. Тяфта ульсь. Валом-валом сембось полафтсь цебярь шири. Предприятиясь кассь-вииясь, пуроптфоль стама коллектив, кона лац содасыне-шарьхкодьсыне инголест путф задачатнень. Тяста и сатфксне. «Норовсь» тевть латцесы экономическяй ширде маштозь. Тя предприятияса аф аньцек аноклави продукция, но и тиендеви теенза переработка.
А.И.Поздняковонь хозяйстваса сембось арьсеф анцяйненьбес. Вдь объекттневок стройсевихть эсь вийса, мезсь, шарьхкотьф, стяшенды сяда уцезста. Производствась аськоляй кели аськолксса. Аф ваномок тянь лангс, предприятиянь руководительсь, Россиянь велень хозяйствань Заслуженнай работниксь Александр Ильич Поздняков, кода ни азоськ вяре, аф юксни велень поселениять сяда тов эреклафтоманц-виияфтоманц колга. И тя теенза удалси. Да вдь эряендивок планонза пяк оцюфт. Кепотьксонди, Семилейса арьсекшни Славань Аллеять малас, кона лемтьфоль Великай Победати 70 кизонь топодеманцты, строямс мемориальнай комплекс, коса сембе пингс ванфтоволь мялямсь сятнень колга, конат ашесть мрда боень паксяста, конат эсь прянь аф ужяльдезь тюрсть сянкса, штоба минь эрялеме павазуста. А.И.Поздняков валонзон вармать коряс аф ерясыне. Азозе—тисы!
Н.КУБАНЦЕВА.

05.02.2016 №
 
 
 

 
НОВОСТИ
 
 
 
 
 
 
 

«Сембось ушеткшни ёфксста!»

Тяддень 24-27 июньцта Мордовия Республикаса, республикань Общественнай палатать тердеманц коряс, рабочай визит мархта ульсь советскяй и российскяй содаф писательсь В.А.Бахревский.
24 июньцта Мордовия Республикань Пресс-центраса сон васетькшнесь республикань писательхнень, поэттнень и журналисттнень мархта. Васедемать вятезе Мордовия Республикань Общественнай палатать председателец, историческяй наукань докторсь И.В.Капитонов.
Васедемать ушетксста Иван Владимирович пуромфненди нюрьхкяняста азондсь писательть эряфонь и творческяй кинзон колга. Владислав Анатольевич Бахревский—советскяй и российскяй прозаик, поэт, идень писатель, драматург, публицист, критик—шачсь 1936 кизоня Воронежса. Сермадсь и нолдась иттненди и оцюфненди 30-да лама книга. Инь содафокс арасть сонь «Василий Шуйский», «Никон», «Аввакум», «Страстотерпцы» и лия историческяй романонза. Тяфта жа арасть содафокс «Дворец Золушки», «Кот в сапогах с секретами», «Первоклассник Митя и кролик Ушки-на-макушке» емла лувити ефксонза и азксонза.
27.06.2019  № 25
 

Саранскяйса казезь «Победань диктантса» сяськихнень

22 июньцта, Лятфнемань и ризнамань шиня, Мордовиять столицаса казезь «Победань Диктант»—Великай Отечественнай  войнань темас коре Всероссийскяй диктантть сяськиензон.
Сяськихнень чествовандазь 1941-1945 кк. военнай и трудовой подвигонь Мемориальнай музейса. Синь поздравляндазень и макссь питни казнет «Единая Россия» партиянь МРО-ть Секретарец, партиять Генеральнай советонц членоц Владимир Васильевич Чибиркин.
—Минь аф аньцек лятфнесаськ геройхнень, но и мяленьке шарфтомс общественностть мяленц етай шинь пелькс событиятнень лангс. Историять эряви содамс и мяляфтомс сембонди, штоба куломань канды войнась, кона сявсь 27 миллион ломанень эряф, афоль уле  вестевок. Историять содаманц касфтоманкса и героическяй етай пингть аф лац няфнеманц аф нолдаманкса «Единая Россия» партиять инициативанц коряс сембе странать эзга 7 майста етафтовсь Великай Отечественнай войнань темать коряс Всероссийскяй диктант—«Победань Диктант».
27.06.2019  № 25
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин