Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Наша усадьба

ТРАКСНЕНЬ КИРДЕМАСНА ТЯЛОНДА

Ферматнень эса тяла. Траксонь кирдема васттненди тисть ремонт, акшептфт, аноклафт корматне, траксне стойласот. Бта теждя тевсь: кафксть шити андомс, потямс, урядамс вастснон и сембе. Жувататне аф ваномат, аф аноклама теест тише, ули кода мярьгомс, што ушедсть каникулат. Но афкукс, тялонь пингсь фермаса—тя экзамен жувататнень мельге якайхненди.
Вазыямасна, андомасна, кельмофтевомань урматнень инголдамасна—тя сембось тиема фермерти. Тялонда жувататнень мельге якамать эзда ащи продуктивностсь.
Траксонь кирдема вастть колга корхтама аф карман. Сембе сяка мезевок аф полафтови, и сави етафтомс тялоть сянь мархта, мезе ули. Фкясь, мезсь петевомшка—тя вармать уфамац. Вармань уфамась, якшамсь, летьксь тиихть кальдяв жувататнень шумбрашиснонды. Сембось тя вяти кельмофтевомати. Кда ули тяфтама афсатыкс, то, мзярс нинге ульцяса аф пяк якшама, петесть тянь. Кда уфай вальмаста, то сяда пара пякстамс сонь сяда эчке пленкаса. Сембе варятне пандомат сёвонь мархта шужярьса. А кенкшть ули кода кяшемс эчке покрываласа—тяфта лямбось кармай ванфтовома сяда ламос. Тяфта жа лямбоста ацасть кияксть. Шуфтонь щитт и алу шужярь—тяфта лама киза тиендеви жуватань кирдема вастса и сяда цебярь мезевок, койсон, мзярс апак арьсек. Фкя траксти шити эряви 2,5 килограмма шужярь. Шужярсь мелкайгофтома 18-27 сантиметрань. Тяфта сон сяда сувасы наземть и лац урядави.
Тялось—фермаса вазыямань пинге. Штоба вазнясь улель кеме, а лофцта потяволь лама—траксть эряви лацкас анокламс вазыямати. Кирдема мяльса вазыямда инголе потямдонза лоткафтомась и андомась. И тянь квалма корхтама сяда ламоне.
Вазыямати траксти стакалгодома 50-70 килограммада. Но пяк вельф андомась аф канды цебярь—кармайхть осложненият. Тялонда 500 килограммань сталмоса траксти эрь шиня макссема 8-12 килограмма тише, 15-20 килограмма соку (турнепс, якстеряпст, модамарьхть, лият) и 2-2,5 килограмма концентрированнай корма. Тяда башка, эрь шиня макссема минеральнай подкормка и  аф кельме ару ведь. Вазу траксть лихнема ульцяв кафта-ниле частс, аф ваномок погодать лангс. Тя кемокстасы организманц, цебярьгофтсы кишечниконц работанц.
Вастсь аноклаф—сон лямбе, варма аф уфай. Тяда юкста вазняти вастонь анокламать квалма. Ули кода тиемс 150 сантиметрань кувалмоса, 50-100 сантиметрань келеса, 100 сантиметрань сереса клетка. Кияксть тиендьсазь аф оцю лазфкя мархта доскаста. Тяфтама клеткаса вазнять кирдьсазь кафта-колма ковозонза. Или канневи клеткать вастс аноклама васта траксть ваксса, явфтомок сонь перяфксса. Фкя стенати тиендеви андомань кядьге и васта ведарканди. Тяфтама клеткась пцтай кафтонь-крда сяда оцю вастста-вастс канневить коряс, кирдеви эсонза вазнясь вете-кота ков апак сотнек. Шумбра тракссь вазыякшни теждяста, но сембе сяка вазыямда инголе венц лангс сувсема траксть ванома, штоба лездомс теенза вазыямс.
Вазыямда меле кярьмодема потямати. Лама или кржа ули потяф лофцта—тя ащи сянь эзда, кода андови тракссь. Исяконь кормань нормась касфтома снярс, мзярс аф прибавай лофцоц. Тянкса лезды якстеряпссь. Макссеви фкя—фкя пяле мархта килограммань кормовой якстеряпс, 500-800 грамма—сахарнай якстеряпс эрь литра лофцти. Лофцть лувксонц касфтсазь концентраттне. Жуватась лацкас потяма и тиема массаж одаронцты.
Башка мяль тялонда шарфтома траксть кенжензон лангс. Кизонда тянь колга сидеста юкснихть, а вдь лугаса ваномстост синь шовавихть. Стойласа кирдемстост кенчне могут вельхтявомс роговой тканьца, кона шорси жуватати якамста. Кда мезевок аф тиемс тянь каршес, эвондайхть кенчса урмат.
Д.РУДЕНКО.

11.02.2016 №5
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин