Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Как жили и живут мокшане

КОДА ВАНФНЕВИХТЬ МОКШЭРЗЯНЬ КОЙХНЕ-ОБУЦЯТНЕ РЯЗАНСКЯЙ ОБЛАСТЬСА


—Экспедициясь аноклафоль 2013 кизоня июнь ковста. Участникне: старшай научнай сотрудниксь Т.Н.Охотина, научнай сотрудниксь М.М.Фадеева. Киньке ётась Рязанскяй областень Рыбное ошева и Рыбновскяй райононь велетнень эзга. Нят Марково, Ходынино, Перекаль, Алешня, Ногино и лият. Кочкафоль историко-этнографическяй козя материал. Содавсь, што Рязанскяй области ламотне сафт велеста. Рыбновскяй районца васенце мокшэрзятне эвондасть 1970-це кизотнень. Тяда башка, аф кржа ломань сашендсь Мордовияста радняснонды и лядсть тозк эряма. Тостонь эряйхнень валснон коряс, Рязанскяй области самань туфталкс ульсь ся, што колхозста макссевсь эряма васта, работа. Кадондозь родинаснон тонафнеманкса, или тядяснон-аляснон, идьснон, радняснон инкса.
Лама пинге Рязанскяй областень мокшэрзятне заняфтольхть велень хозяйствань тевса. Касфнесть перень серот, кирдсть жуватат. Тяниень пингть улихть хозяйстват, коса кирдевихть аньцек сараст и лия куднармотть. Синь андомасна-касфтомасна сяда теждя, сяс мес карьхцяви сяда кржа вий и ярмак. Но васьфневихть и стама семьят, конатнень пирьфсост улихть тракст, учат, алашат.
Мокшэрзятне аф шнасазь Рязанскяй областень модатнень—сон севоню, Мордовияннеть коряс сяда кальдяв. Но, аф ваномок тянь лангс, касфтф перень серотне и имошне сатнихть. Сатт васьфневихть шуроста.
Эрямок ширеса, мокшэрзятне аф юкснесазь атяснон-бабаснон койснон-обуцяснон, ванфнесазь синь, эреклафнесазь. Кепотьксонди, Рыбновскяй районца тянемс етафневихть калядамат. Куду сувамста калядайхне почерясазь кияксть тозерса, тянкса синь казендьсазь. Тяниень пингть—ярмакса. Тостонь ламоц эряйхне азондозь, што Кльхчяняста ломаттне тянемс рисавсихть кенкшненди и вальмятненди крескат. Очижиста, кода азозе Рыбновскяй райононь эряйсь Л.А.Акшонова, куду васенце сувайть озафнесазь велянь бокста ацаф ор лангс. Ломаттне верондайхть, што тя лезды сарасненди алыямс сяда лама ал. Башка мяль шарфневи кудть лангс Тройцяста. Сядонголе Рыбновскяй райононь эряйхне ванфнелезь Мордовияса кочкаф койть-обуцять мазопнемс куттнень келувонь тараткаса. Тяниень пингть мокшэрзятне Тройцяста путнихть кудснон инголи келуня, а аф тараткя.
Лама ванфтовсь ярхцамбяльсовок. Кепотьксонди, Рязанскяй областень мокшэрзятне фалу пицихть пачат и лувондовихть тоса национальнай  ярхцамбялькс. Синь эсь лацонь ширесна сянь эса, што пицемстост шапаксти кайсевихть ямкст, тянкса лисихть эчкокс. Тяниень пингть радняньке эчке пачань пидемста кайсихть манка.
Мокшавась Г.Н.Сандина, шачемас коре Мордовиянь Зубово-Полянскяй райононь Булдыгино велеста азондсь, што бабанц лаца пици пачат перень сероста. Шура Самойлова, сяка жа велеса шачфсь, аноклакшни пачат тикласта. Ужяль, но кудса, пянакудса кшинь пидемать Рязанскяй областень мокшетне ашезь ванфта. Но тянемс кельговикс ярхцамбялькс лядсть аф фкя лацонь потма мархта пярякатне.
Ламотне ванфтозь койть-обуцять аноклакшнемс панкт, аф ваномок сянь лангс, што Рыбновскяй районца панкне аф фкя лацоннет Мордовияса касыхнень коряс. Ходынино велень эряйть В.Н.Григорьевать валонзон коряс, сон кочкси келу алдонь, акша, равжа панкт, опенкат. Сяда тов синь косьфневихть, салыяфневихть, мариновандакшневихть и стак тов.
Аш месть корхтамс, ламоть ванфнесазь Рязанскяй областень мокшэрзятне. Тянь мархта вии эрь народностсь, эрь этноссь.
Л.РЕЗОВА.

18.03.2016 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин