Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшане о мокшанах

МЗЯРДА МОРОСЬ МОЛИ ВАЙМОСТА…

Ломанць, кона шачсь асуши мархта, лувондови павазукс. Тяфтапненди, кле, сяда тёждя лиятнень коряс, сяс мес кода-аф кода содаф масторлангса эряфонь киснон ладявомац. Пади, тянь эса и ули видеши, аньцек асушись аф кайгозеви пайгонякс виень апак путт и тапорксонь вельф апак аськоляк. Тя лац содаф мокшавати Татьяна Александровна Зайчукти, кона лемдезе эсь эряфонц мороти. Аф ваномок мезеньге лангс, сон марясы прянц павазу ломанькс, сяс мес морай. Сон, кода мяляфтсы эсь прянц, фалу морась. Морось эряй ваймосонза, и бта ару лихтибрянь ведь лаца мазы вайгялец максси эрьгя лиятненди. 
Ару лихтибрякс теенза арась шачема-касома уженяц—Ковылкинскяй райононь Валгапеле мокшень велесь. Тя тяни тоса пяк  сидеста азорондай сетьмошись, а Татьяна Александровнань шабакс пингстонза ульсь меколанкт: сетьмошить колселезь горяй пайгокс кайги горняй мокшэрзянь моротне, гармониянь коряс кштикшнематне.
Кельгозь морамаснон Колемаскиттнень семьясовок. Инь вайгялюсель тячиень героиняньконь щавац, конань мазы вайгяленцты ломаттне сельме каясть. Аньцек таколдсь эряфкшусь: кали аф максови тяфтама мазы вайгялец конандивок уноконзон эзда? Стиренц, Машань, вете идензон мархта морамань асушить колга пяк корхтамс ашель кода. Но вов шачсь котоцесь, инь ёмлась—Татьяна. Сась щавац ширезост, а стирнясь тя пингть аварьгодсь пяк кайги вайгяльса. «Вов тя кармай морама!»—кенярдезь мярьгсь эряфкшусь. Тяфта и лиссь! Стирнясь морась, и оцю мяльса кулхцонкшнесть эсонза оцюнек-ёмланек. Нинге шабакс тонадозень  Россиянь Народнай артисткать Мария Николаевна Антоновать моронзон. Эста прятивок ашезе путне, што пингонь етазь арай теенза ялгакс. Велень стирьхне, содамок конашкава мазы Танянь вайгялец, тернелезь мархтост морама.
«Конашкава пароль велеса,—лятфни идькс пингонц колга Татьяна Александровна.—Сембе уженятнень эзда кулевсть морот. Школаса ульсь художественнай самодеятельностень оцю коллектив, коса морсесть аф аньцек иттне, но и оцюфне. Ётафтомок идькс пингть тяфтама вастса, лувондса прязень павазу ломанькс».
Мазы, кайги вайгяленц инкса ламотне няезь Танянь сай пингонь артисткакс. Тянь колга арьсекшнесь сонцьке. Кафксоце классть аделамдонза меле поступась тонафнема Л.П.Кирюковонь лемса Саранскяень музыкальнай училищав. Сембось мольсь лац, аньцек эрямс ошса сивотьф квартираса—аф зепс коре велень ломанти. Таня Колемаскинати савсь кадомс тонафнеманц и мрдамс куду. Ризфсь сязендсь седиенц эса. Ламос апак арьсек срхкась Москуву работама. Ваймось тердсь морамати. Кемготува кизоса стирсь сась маластонь Культурань куду и кармась якама тоза морсема. Морсесь народнай, академическяй хорхнень эса, сяльде кармась морсема ськамонза,  оркестра мархта хорса и аф фкя ансамбльса. Кодама мора афоль мора—классическяй, эстраднай, народнай—сембось сонь лисенди пяк лац!
 «Морамста бта эвондакшнихть пацяне. Моран и карман морама, мзярс максы Шкайсь, мзярс кайги вайгялезе»,—мярьгсь Т.А.Зайчук. Сон пцтай марнек Советскяй Союзть ётазе. Кафксть тернефоль морама Москувонь филармонияв, но, ужяленди, семьяса уликс прябалатнень инкса савсь атказамс. Аньцек морама Татьяна Александровна мзярдовок ашезь лотксе. Концертта, коса кайгсь вайгялец—пефтомоль. Тяниень пингть морси лама пуромксса Россиянь Заслуженнай артисткать, Пятницкяень лемса хоронь ингольдень солисткать В.Н.Собанцевать мархта. Саранскяйса Россиянь Народнай артисткать лемса народнай моронь  фестивальса  Т.А.Зайчук сатозе гран-прить.
Пцтай кеветие киза Татьяна Александровна «Мокшэрзянь землячества» Москувонь Межрегиональнай общественнай организацияса. Содафтомок мокшаватнень мархта, кармась якама репетицияс, морсема марстонь хорса, сяльде сувась «Тяштеня» ансамблень коллективти. Эряви азомс, тя коллективсь арась сотксонь кирдикс мокшэрзянь масторть мархта, народоньконь культурань коензон ванфтыкс.
Азома и мокшень национальнай щапнень-каряпнень мазышиснон колга! Няфтьфт ламоц вастова, шназень лама содаф ломань. Кельгозь мокшень нарядть колга азонды Татьяна Александровнавок. Седикс-ваймокс малаткшнихть ломаненьке кунардоннеть ванфтоманцты, одкстоптоманцты, сяс и салсесыне лиятнень мяльснонга.
Лямбоста Т.А.Зайчук лятфни «Тяштеня» ансамбльть мархта кафта кизода инголе Израильса улемаснон колга. Тоса синь примасть участия Международнай фестивальса. Дивандафтозь эряйснон лама вайгяльса морави мокшэрзянь моротне, мокшаватнень сельмованфонь салай костюмсна.
Кой-коста национальнай илатнень пингста щашендыхть мокшаватне пильгозост нльне карьхть и морсесазь «Вай, пакся, пакся» мороть.  
Уленди, мзярда морси Татьяна Александровна мокшень морот Анна Пиксайкинать (шачемас коре сон Краснослободскяй райононь) мархта. Конашкава лац кайгихть вайгяльсна!
Т.А.Зайчук морси Москуса етафневи мокшэрзянь концерттнень эса ськамонзовок. Седишкава кельгсыне Татьяна Александровна кунардонь мокшень моротнень. Лама эздост тонадсь идькс пингть, касомок велеса. Вельдест сргозьфнесы кельгомать мокшэрзяннети лиятнень ваймосовок.
Кулхцондыхне кельгсазь, пара мяльса учсесазь лисеманц сценати. Ламотне, кода азондсазь, нльне сашендыхть тяфтама пуромксненди сонь мораманц кулхцондома.
Мзярда морай мокшавась, весяла сельмонзон эса налхки цятконянь пиндолфсь, кона эжни и ляпопни ломанень седихть.
Аф юкснесы Т.А.Зайчук шачема-касома уженянц—панчфокс панжи мокшэрзянь масторть. Петезь-пандозь Валгапелеса тядянь-алянь кудснон, и эрь кизоня оцю мяльса Татьяна Александровна семьянек сашенды тоза. Салай  мяль тостонь перьфпяльсь, и нят аф шава валхт. Мокшавать мирдец шачемас коре Украинань, кле, тяфтама мазыши эсь аймаксонза ашезь няенде. Сон нльне анок ётамс эряма вели. Аньцек вов идьсна, уноксна ошсот, и сяда пара улемс маланяса теест.
Велеса ламотне содасазь, кодама мазыста морай Татьяна Александровна, и самок шачема-касома уженязонза, эняльдихть теенза морамс. И сон мзярдовок аф атказакшни.
Лама морода мораф, лама пуромксса, концертса ульсь Т.А.Зайчук! Катк эздост Татьяна Александровнань ули нинге пяк и пяк лама.
 
А.ВОЛГАПОВА.

31.03.2016 №11
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин