Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Экономика

БИЗНЕСТЬ МАРХТА СОТОЗЬ ЭРЯФСНОН СЕМЬЯНЬ КЕЛЕСА

—Иван Серафимович, васендакиге, улема, пачфтят аф лама эсь колгат, тевцень квалма.
—Монь родительне мокшень ломатть—крестьятт. Эряме Темниковскяй райононь Шукстелим велеса. Колма итть касфтсть синь. Тя монь и кафта сазорнень. Эряфоньберьф родительне работцесть марстонь хозяйстваса. Тядязе дояркаль, алязе разнай тевса заняфоль. Кафцьке синь трудонь пяк кельги ломатть. Миньге тонафтомазь тянди. Сяка-тев мярьгондсть, штоба афоль сав няемс инксонк визькс шама. И минь старандаме аф лисемс синь валстост, аф коламс мяльснон.
Эстонь пингть колхозса пцтай сембе тиендевсь кядь вельде. Мрдальхть тряеньке работаста, прамшка сизефт, а нинге эрявсть тиемс кудъётконь тефнень. Касомок, коза сатнесть виеньке, лезнеме теест минь. Велеса вдь жуватафтома ёфси ашель кода. Миньге пяшксель пирьфоньке. Сяда товга, мзярда ни ётаме эряма Темникаву, тясовок ашезь шамонда корамоньке. Тяни сиренят ни синь, вийсна жуватань кирдемс аф сатни, но сембе сяка спасиба Шкайти-Шкабавазти, нинге якайхть-шяяйхть.
—Иван Серафимович, эрь идсь нинге школаса тонафнемста арьсекшни сай пингонь профессиянц колга. Тонга, улема, тяфта тиендеть?
—Содалесте, конашкава кельгине техникать! Ну, мярьгондень, аньцек аран аляшка, эстокиге озан рульть ваксс. И ня арьсеманень пяшкодине. Мон ломанць аф стамотнень эзда, штоба кода-аф кода, но сатомс менельста тяштть. Монь принципозе стамоль, да и тянемс лядсь тяфтамкс—аськолямс инголи, и аф эряскодозь, валомне. Тейне-арам, тяфта нинге сяда ичкози пачкодят, рузкс мярьгозь, «тише едешь, дальше будешь».
Средняй школать шумордамдонза меле содамошинень касфнине Темникавонь СПТУ-са. Тяда меле кармань работама тястоконь автохозяйстваса. Кемнилие киза тоса покодень. Работань и заочна тонафнень Краснослободскяень техникумса.
Кода ни азыне вяре, родителеньке касфтсть колма итть. А мон пяк кельгсайне шабатнень, сяс «аськолдань» синь вельхкскаст и касфттама семьясонк ниле итть—колма стирьхть и фкя цёра. Киза пяленяц аньцек мекольценять. Налхкшкя бта сон сембонди тейнек.
—Индивидуальнай предпринимателькс аф шачендыхть, а арсихть. И вов тонга туть бизнесонь киге. Мезсь тянди кошардонзе?
—Автохозяйстваса, кода ни азыне, работань кемнилие киза. Мекольдень пингть улень главнай инженеркс. Работаф сембе вийса, совестьс коре. Но «яфодсь лия ширде вармась» и повоме кирьфтавиень спискати. Ашезь сафтов кой-кинди и вов результатсь. Но кяднень алу ашине нолда. Водендань жуватат, конатнень лувксснон коль касфнине. Бизнесонь тевсон оцю лезксоц алязень Серафим Дмитриевичень. Мекольдень трешниконц макссезе, штоба афолень эрьгоде од тевса, штоба стялень пильге лангс. Варчсине и торгавамань тевть—сахар, почфт мишенкшнень базарса. Минць грузсеськ, минць каннеськ копорьсонк. Аф теждяль, конешна, но теждяста тевсь аф сембонди макссеви. Сяда тов рамань автобус. Монць кармань арнема Москуву, усксень пассажирхт. Меле сявонь кредит и рамань нинге фкя автобус.
—А тяни сембоц мзяра эздост?
—Вете. Синьге стане жа рамафт кредит лангс. Техникась тяниень пингонь. Москуса Щелковскяй вокзалса тяфтама маркань автобуста аньцек фкя. Виде, кредитть тянемс паннеса. Старандан сафтомс ломаттненди—цебярь автобусса усксесаськ.
—А конашка питне пандома, штоба, мярьктяма, Темникавста пачкодемс столицав—Москуву?
—Верондатада-аф, пандома аньцек сисем сятт цалковай. Тяфтама питнет тяни, койсон, косовок аш. Но мон аф панцян питнеть мельге. Улест аньцек пассажирхт. Тянксовок спасибама Шкайти. Аф эряви жадавамс.
—Иван Серафимович, мзяра ломань работай видесот? Лиякс мярьгомс, мзяра ломань мусь ширесот работама васта?
—Сембоц водительда кемонь и вете продавецоньке. И монць. Лисенди, што кемготува ломань.
—Сяка-тев можна приметамс-няемс работафтома ломатть, конат содайхть пеняцямаснон тячиень шинь сталмотнень лангс. Иван Серафимович, мезе азат тянь колга?
—Мезе азан? Да вдь кинь мялец работамс, тев эстеенза муй. Аф безярди мезьдовок. А тяфтак… Вов, кепотьксонди, сявса монцень тевозень. Эрявихть тейнек продавщицат и вдь кодавок аф мувихть. Тушендыхть-срадондыхть оттне. Вов и ответсь.
—Магазинонте, кода няйса, пяк оцю. Азк, пожалуйста, кодама товар можна рамамс тяста?
—Васенце этажса цёразень товароц—мебельсь, а омбоцеса азорондай стирезе—сонь отделсонза налхкшт.
—Иван Серафимович, азк, пожалуйста, мезсь тяни таколфтсы предпринимательть, мезе эряви, штоба сяда эреклаль бизнесоц?
—Инь васенцесь, штоба афольхть шоря. И сяка жа проверкатнень-меснень мархта.
—Бизнессь аськоляй кода сембе странаванк, тяконь лувксса и минь республикаванк. Койсот, тя виде ки сай пингонь сатфксненди?
—Тя афкукс тяфта. Макссть сянгяря свет,—аньцек работак. А кда кинь мялец, работа можна мумс. Пичефксу вастокс ляткшни велетнень шамомасна. Инголи вдь кода ульсь. Мзярда работань автохозяйстваса, эрь шобдава кота частста тушендсть автобуст Метрялы, Чумартова, Жегалова, Ковыляй и ламоц лия велетненди. Сисем маршрутт тушендсть велева и усксесть ломатть работама, а илять прважсевсть меки. А тяни тя аш. Катк аф лама ломань, но сашендсь. Велесь эрясь. А тяни аш мезьса пачкодемс и сиретненди, и сярядихненди, и рабочайхненди. Сёлгонтфт тоса школатне, медпункттне. Тяста, Темникавста аш рейс и Саранскяи. Кепотьксонди, Зубуста Саранскяи тиендевихть кота рейст, а Темникавста фкявок аш. Вов и ламоц кизефксненди ответсь. Кода тят шарфта-веляфта, но сембось ащи ломанть эзда.
Н.КУБАНЦЕВА.

10.05.2016 №
 
 
 

 
НОВОСТИ
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020  № 48
 

«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин