Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Спорт

«ЭРЬ ПЯЛЬКСТОМАСЬ КОДА ПРАЗДНИК»

—Людмила, азонтт аф лама эсь колгат. Кода арать ялгакс спортть мархта?
—Спортть мархта ялган идькс пингста сявомок. Ласькондема ушедонь шачема-касома уженясон—Краснослободскяй райононь Сире Синдру велеса. Мялезе лятфтамс кафта ломаттнень, конат лихтемазь спортонь кити, конатненди фалу лемнесайне сембе сяськоманень. Азондан спасибамань валхт васенце тренерозти, физкультурань учителезти А.Н.Кожухинонди, а нинге—кельгома тядязти О.Ф.Кирдяшовати, кона работай школаса, вятьсыне мокшень кялень и мокшэрзянь литературань урокнень. Сон тяфта жа ялга спортть мархта. Мзярда шабалень, сидеста ласькондеме марса. Виденц азомс, тядязе тянемс лезды тейне эрь пялькстомада инголе лямбе валса. Коса афолень уле, фалу седисон-ваймосон маряса инксон таколдоманц.
—Кода сать пожарно-прикладной спортти?
—Тя лиссь кафта кизода инголе, вятемань эзонза тренерозе Наиль Халилович Долотказин. Валонзон коряс, кунара смекамань «Старт» стадионца ласькомать коряс тренировканень пингста. Тердемань, ашень атказа, и ёфси аф каендан. Сань васенце тренировкати, кона салазе мялезень и лядонь спортонь тя видса. Ковда меле ни примань участия васенце пялькстомаса, кона етась Саратовса. Прязень няфтине аф кальдявста. Тяка пингть, ашине када легкай атлетикатьке. Тренировандан В.Н.Разовонь ширеса. Арьсян, пожарно-прикладной спортса легкай атлетикафтома аш кода.
Васенце образованиязе—Н.П.Огарёвонь лемса МГУ-нь экономическяй факультетонь «Налоги и налогообложение» специалитетсь. Аньцек мзярс аф няйса прязень налоговай инспекцияса, сай пингозень мялезе сотомс   МЧС-са службать мархта. Тяниень пингть заочна тонафнян Россиянь МЧС-ть Государственнай противопожарнай службань Воронежскяй институтса.
—Тренировкат, пялькстомада ингольдень сборхт аф фкя ошса, тонафнемась… Кода кенерькшнят сембоса?
—Пинге фалу муви, кда тянди ули оцю мяльце. Спортсь аф шорси аф тонафнемати, аф работати. Емластокиге тонафтфан аф пелемс сталмода и  кенерькшнемс лама вастова. Сталмотне аньцек кемокснетядязь. А мзяра од ялгазе эвондась спортть вельде! Тяниень пингть, кодама ошу афолень моле, ули кинди монь васьфтемс.
—Кодапт спортонь тя видть эсь лацонь ширенза? Мезьса сон салазе мяльцень?
—Ёран корхтамс тянь колга, путомок карань-каршек легкай атлетикать и пожарно-прикладной спортть. Васенцеса улема лац аноклафокс физическяй ширде, омбоцеса—физическяй подготовкада башка, оцю васта занци мяльхнень-арьсематнень, потмоёжеть анокламасна.
Пожарно-прикладной спортти сувафневихть ниле дисциплинат:  штурмовой куцемава куцемась,  препятствия мархта сяда метрань полосать ётамац,  пожарнай эстафета и боевой развертывания. Сембе синь маласькофтфт ся условиятненди, конатнень мархта васетькшнихть пожарнайхне толонь матомста.
Кода спринтеронди, теждяста тонадовсь препятствия мархта сяда метрань етамась. Сяда лама вий эрявсь максомс сянди, мезти кярьмодень васенцеда—нят штурмовой куцемава куцемась и боевой развертываниясь.
—Ётай кизонь Миронь чемпионатса тон путоть рекорд  сяда метрань полосать етаманцты.  Содаф, тяфтама зиянть пингста, кода пожарсь, оцю питнец секундать эрь пялькскац…
—Афкукс, тяфта. Сембось тиема вишкста и видеста, тяса аш васта эльбятьксти. Пялькстоматнень пингста кой-конашкада марясак пряцень пожарнайкс. Арьсян, спортонь тя видсь пяк эрявикс. Кда васедят афкусонь зиянть мархта эряфса, конань эзда кивок, ужяленди, апак аралак, содасак, кода лездомс араламс ломаттнень.
Тянемс аф юкстави идькс пингстон эсь сельмоса няйф пожарсь. Улема, нинге  ся зиянць вятемань тя кити.
—Мезе азолеть пожарно-прикладной спортть касоманц-виияманц коряс республикасонк?
—Ня шитнень, молемок «Старт» стадиону, дивандань, мзяра ломань кармась сашендома тренировкас! Тя аньцек кеняртьфти и корхтай сянь колга, што спортонь тя видсь миньцонк касы-виияй. Васендакиге, спасибамань валхт тянкса азома Мордовия Республикать коряс МЧС-нь начальникти А.Г.Наумовонди, кона путни аф кржа вий пожарно-прикладной спортть виияфтоманцты. 
Ётай кизоть Миронь чемпионатта инголе республикасонк «Старт» стадионца ульсть авань командать сборонза. Мзяра шнама вал кулень ширдест условияньконь колга. Тяддевок тяфтама оцю пялькстомада инголе сборхне арьсевихть етафтомс миньцонк.
—Пади, Мордовиясовок мзярдовок етафтови Миронь чемпионат пожарно-прикладной спортть коряс.
—Надиятама, сай пинге тяндивок. Васенда, улема, етафттама российскяй пялькстома. А мзярс, эряви кочкамс республиканскяй команда и  няфтемс пря российскяй пялькстоматнень эса. Тя мялезень кирнесазь кафта стирь ялгане, конатнень вятине пожарно-прикладной спортти.
—Мезти аноклат маластонь пингть?
—Тяниень пингть аноклан Международнай пялькстоматненди, конат етайхть Москуса 13-15 майста. Ня шитнень туян сборс.
—Учтядязь сяськома мархта!
—Спасиба.
А.ВОЛГАПОВА.

10.05.2016 №
 
 
 

 
НОВОСТИ
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020  № 48
 

«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин