Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Ветеранам о ветеранах

СТАКАТНЕНДИ-СТАЛМОТНЕНДИ АШЕЗЬ МЯНДЕВ

Велень иттне рана кенерькшнихть. Аньцек, ванат, туй якама и бта ни оцю ломань. Тяфта ульсь инголи. Тядятненди ашель мзярда возсемс идьснон перьф. Тиемат кудъетконь тефне, потямат траксне, урядама синь вастсна, а кизонь пингть лихтемат-прважамат стадав. Мярьктяда, эста алятненди тевге ашезь ляткшне. Кода, ина! Теестка ульсь мезьс фатямс. Шобдава, аньцек лазоволь зарясь, синь тракторснон увфсна марявсь ни паксяса-коса. Шобдаста шобдас сашенкшневсь ащекшнемс тракторонь рычакнень ваксса. Аф шуроста тракторть кабинаста можналь приметамс ава. Катк тя тевсь аф аванне, а паксятне сокамс-видемс эрявсть. И витцезь. А коза молят—войнась, тя вдь аф щеняце, ужяльдемат аф содай.
Ламоц алятне сявфтольхть фронту. Фашисттнень каршес тюрема сявфоль и Рузаевскяй райононь Трускляй велень эряйть Илья Кириллович Бузаковонь аляц. Велень келеса прважазь од алять Родинаньконь аралама. Авардемат-ольксемат кулевсть велеряензон еткса. А сонць Кирилл Осипович Бузаков старандась сетьмофтемс ломаттнень. Вов, кле, тапасаськ аеркс врагть, кеподьсаськ Победань знамять, мрдатама шачема ширеванк и кярьмоттяма тевс. А тон, кле, мярьгсь рьванцты, старандак ванфтомс цераньконь, мялезе, штоба синь афольхть ара войнань кормакс. Азозень ня валхнень и ряцок лиятнень мархта тусь кис. Кодамоль тя кись, содасазь аньцек синць.
А кода семьясь? Марожень кшиса-кода касфтовсть идьсна.
Эряфсь, кода сон тяза уле, ункснесыне эсь вайгяльбензон. Илья Кирилловичень тядяц, мзярда эвондакшнесь етка пингоц, пуропнелезень перьфканза идензон и ушеткшнесь азондома. И арьсетяда мезень колга? Да тага тя аеркс войнать квалма. Иттне сяконь кизефнесть, мзярда мрдай алясна. Но мрдамась ашезь учев. Алясна—Кирилл Осипович, войнать пингста юмась куляфтома. Ламос вешендсть эсонза, и вов седиень таколфты куля—сон муфоль Смоленскяй областень Молитовка велеста. Тоза сон и калмаф. Тяфта семьясь лядсь тряйфтома.
Пингсь мольсь, шабатне кассть. Эвондась Илья Кирилловиченьге семьяц, шачфтсть ниле церат. Лама савсь тиемс Илья Кирилловиченди и Мария Алексеевнанди, штоба идьсна касольхть афкуксонь ломанькс. Вачедовок ашезень кирне мзярдовок. Рьвац работцесь марстонь хозяйстваса дояркакс, да виденц азомс, ашезь безярде кодамовок тевда. Тяни сон аш шиса. Шкабавазсь сявозень и колма цераснон.
Кизефттяда, а кода сяда тов ладявсь Илья Кирилловичень эряфоц-ащефоц? Илья нинге емластокиге работцесь трактористокс, экскаваторщикокс эстонь «Мазы знамя» совхозса. Войнань кизотненьге стаки покодсь кельгома тевсонза—колеснай тракторса. Тяни Илья Кирилловиченди топодсь 85 киза. «Сембонь инкса, улема, кадомань эряма Шкабавазсь,—мярьгсь сиренясь. Колма церанень, рьвязень калмайне. А мон, няйсасть, стаки тапан масторть мяштенц эса».
Илья Кирилловичень ули сонцень кудоцка. Но 85 кизоса кодама ни хозяйствань азорат! Сянкса ширезонза эряма сявозе церац. Илья Кириллович спасибай Шкайти, мес ули шарьхкодема и рьвянянц, и церанц ширде. Топодьста, ару щамняса щаф-каряф, а мезе тага эряви сире ломанти?
Авторть эзда. Илья Кирилловичень мархта корхнеме велень магазинть ваксса. Самай ся маласа ульсь «Мазы знамя» ингольдень совхозонь конторась. Кирпицьста строяф тя сооружениять эса мольфтевихть работат. «Рамазь, улема,—пцтай сельмоведеньбачк азозе Илья Кириллович. Ванат и седице ацергоды! Мзяра труд путфоль, штоба строямс-кеподемс сонь!» Куфкстась атясь, кувалмос таргазе ваймонц и лоткафтозе азксонц. Миньге тя пингть срхкаме кис. Аньцек и мярьгоме: «Оду васедемозонк, мокшень цебярь ломань»!
Н.КУБАНЦЕВА.

12.05.2016 №17
 
 
 

 
НОВОСТИ
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин