МОРОСЬ—СОНЬ ЭРЯФОЦ

Минь интервьюньке
Мордовия Республикань Старошайговскяй райононь Сире Теризморгась содаф кода мокшэрзянь культурань ванфтомань-эреклафтомань уженя. Тоса эряйхть ломатть, конат кельгсазь семботь, мезсь сотф национальнайть, мокшетнень койснон-обуцяснон, кяльснон мархта. Региононьконь тя аймаксонза шачсь-кассь мокшень стирсь Мария Пивкинась. Идькс пингстокиге сон кельгозень кунардонь пингонь мокшень моротнень, ёфкснень, легендатнень, конатнень азонкшнезень кельгома щавац. Нина Михайловна Кадерова тонафтозе уноконц кельгомс мокшэрзянь культурать, кяльть, марямс гордость эсь нацияньконь инкса. Касомок, Мария ванфтозе семботь, мезти тонафтозе щавац. Тяни Мария Пивкина морси Г.И.Сураев-Королевонь лемса «Келу» фольклорнай ансамбльса. Тейнек удалась максомс Мариянди кизефкст и содамс, конашкава кемоста сотф стирть эряфоц мороть мархта.

—Мария, лятфтайть васенце аськолкснень, конатнень тиить мороть каршес?
—Котоце класста сявомок кармань морсема «Лаймоня» идень ансамбльса. Сире Теризморгать келес кулевсть вайгяленьке. Да аф аньцек шачема уженясонк кулендемазь, но и лама лия вастова: улендеме гастрольса, эрь-кодама фестивальса Москуса, Нижняй Новгородса. Мяляфтса, кода 2003 кизоня «Лаймоняньке» сяськсь Москуса морамань конкурсса. Ансамблень солисттненди максфтольхть путевкат «Орлёнок» идень лагери. Тосовок оцю мяльса морсеме, няфнеськ мазыдонга мазы мокшень щамоньконь. Спасиба азан щавазти. Сон тонафтомань морама, крхкалгофнема содамошинень тя тевса.
—Кода ладявсь эряфце школать шумордамда меле?
—Кунара содайне, кодама тев мархта сотса сяда товолдонь эряфозень. Сяс аттестатонь получамда меле эстокиге максыне документонень Н.П.Огарёвонь лемса Мордовскяй государственнай университетонь Национальнай культурань институту. Поступань «Музыкальное искусство» отделенияв. Тонафнемась пяк тусь мялезон. Сатонь сянь, мезень колга и арьсень. Ламода крхкалгодсть содамошине мокшэрзянь культурать, национальнай койхнень-обуцятнень коряс. Койсон, сяда кассь-ви-иясь морамаса маштомошизе. Мялезе азомс оцю спасиба институтть директоронцты Т.Н.Сидоркинати. Сон лама вий путни, штоба цебярьгофтомс студенттнень тонафнемань условияснон и кемокснемс синь содамошиснон. Павазуван, мес тейне удалась получамс профессия Мордовиянь васенце вузса. Сон ацась инголен такор ки, кона вятсь кельгома тевозти.
—Тяни видеста можна азомс, што эряфце кемоста сотф мороть мархта. Тон Мордовияса содаф коллективонь участницат. «Келу» ансамбльса ушедоть морсема университетть шумордамда меле?
—Аф. «Келу» фольклорнай ансамбльса морсян 2011 кизоста сявомок. А тяда инголе улень «Русская окраина» ансамбльса солисткакс. Васенда ансамбльть выступлениянц няине Республиканскяй Культурань дворецть сценанц лангста. Азонь мяль варжамс вайгялезень тя ансамбльса. Аф ваномок рузонь лемонц лангс, музыкальнай коллективть репертуарса аф кржа мокшень морода.
Тяда башка, эрь кизоня примсень участия «Шумбрат, Мордовия!» народнай творчествань республиканскяй фестивальса и стак тов.
Эряфсон оцю павазкс лувса сянь, што тейне удалась арамс «Келу» ансамблень солисткакс. Г.И.Сураев-Королевонь лемса фольклорнай коллективсь—тя Мордовия Республикать национальнай козяшиц. Сон эреклафтсыне-ванфтсыне мокшэрзянь фольклорть, койхнень-обуцятнень, кяльть, историять. Коллективса эрь участниксь—оцю профессионализма мархта ломань. «Келуса» морсемась максси тейне питнефтома опыт, а тяда башка, эрь выступлениясь, эрь репетициясь, эрь морось эжнесы ваймозень. Шарьхкодьса, што заняфан кельгома тевсон.
—Мария, койсот, кода тяниень пингть можна сяда тов кемокстамс-виияфтомс национальнай культурать?
—Арьсян, што васендакиге эряви шарфтомс мяль иттнень и од ломаттнень лангс. Вдь синь—минь сай пингоньке. Ёмластокиге синь тонафтомат родной уженять, национальнай культурать и сембе минценнеть кельгома. Синь мархтост ряцок касы, эреклай, виияй мокшэрзянь культураське.
—Лувондсак «Мокшень правда» газетать?
—Кельгса народозень культуранц, оцю мяльса шарфнян нацияньконь уликсонц ванфтоманцты. Койсон, «Мокшень правдась» аф кржа тиенди сянкса, штоба мокшень ломаненьке афольхть визде шачема кяльть эзда, а, меколанкт, маряльхть гордость.
Кельгома ялгат, тейнек, мокшетненди, аф эрявихть юкснемс юроньке, родоньке-пляманьке. Тясть юксне «Мокшень правдатьке»! Сон масторлангса ськамонза, эсонза фалу няеви шачема уженяти и сонь ломанензонды кельгомась. Сяс оцю мяльса лувондса и серматфнеса. Тяфта тиеда тиньге, мокшень ломатть!