Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Юмор и сатира

ТЯДЯНЬ УЖЯЛЬДИХТЬ

Алду баба Паргана велеса ётафтозе сембе эряфонц. Васювоц кадозе ёфси одняста. Мусь ошста архтф трва рузава и сувась овкс. Пцтай ськамнянза касфтозень цёра-богатырензон, тонафнефтезень вузса. Кафцьке тяни эряйхть ошса, содаф          спортсметт. Лёшувоц  марафонец. Аф весть ласькондсь Москуста Питеру. Мзярда цёранза сашендсть Паргана вели, мзярдовок ашезь учсе рейсовай автобуст райцентрав. Наряжай и—ласькозь Полянкав. А тя мековасу нильгемоньшка вайгяльбе. Алду баба аньцек ктордсь лангсонза.

 

—Эх, Лёшу, Лёшу. Тейне ба тонь пилькнень. Аньцек лиенделень райцентрав, велеть эзга.

 

—Лиендемс аф пилькт, а пацят, тядяй, эрявихть.

 

—Кда пилькне якайхть, пацятне синць шачихть, цёрай. А тяни ой да вай. Молян Кулёк Настать пяли. Анокс пелендян, кода меки куду пачкодян. Кода тапаф кирькат. Чаподелить да перяфксть вельф ёрдалить.

 

—Хэ…хэ…хэ… Лёшувоц. Кда ёрдасайть, тоса кудстовок аф лисеват.

 

—Тяфтавок шиньберьф кудсан, ойкснян-вайкснян, ковга аф якан.

 

—А кати-местема ни якат, кудса ащек.

 

—Кудса ащек… Кудса ащезь кяльцевок курга потмозт коськи. Корхтамска аш кинь мархта. Катозе. Сявок шинь-шинь коса-бди якай. Сай куду, мяв  да мяв. Танцтиняда антк, бта покодема вастста сась.

 

—Сембе сяка, тядяй, лучи кудса ащек. Улеть од, шумбра-таза, тонга лытать, костовок ашеть лядонда.

 

—Виде, цёрай. Оду ковга аф молян. Мадан эзембряв, сусксайне трванень, кялезень и карман учсема, мзярда кхаса.

 

Омбоце цёрац, Петювоц, боксёр. Аф фкя алянь шалхка ширептсь-тапась. Алду баба кржа мезе шарьхкоди боксса. Петювондивок аф весть корхнесь: «Аф алянь тев тя, цёрай. Ёньц кундак, покодема вастоня эстейть вешть». А Петю аньцек каршезонза кторды:

 

—Пяк алянь тевозе, маман. Зрнянь алхт канды. А сяда лама тейне аф эряви.

 

Мзярда сашенды вели, алятне честь путыхть. Лац аф лац корхтай, сяка ширенц кирдьсазь.

 

14.04.2022 №14

 

Пеетькс пакшкат

Рьвясь—мирденцты:

 

—Исяк мон няихтень, кода лисеть пивнойста!

 

—А мезе ина тиян, вдь тозк эряма аф лядан…

 

 

 

—Улеть пеень пчкафтыть ширеса?

 

—Улень.

 

—Ну и кода, пейце лоткась сярядемда?

 

—Аф содаса, врачсь кадозе сонь эстеенза…

 

 

Стирсь сувась аптекав и мярьги:

 

—Мида тейне осалгодомань таблеткат.

 

—Простямасть, стирня, но тон вете минутада инголе рамать кемонь упаковкат.

 

—Мон ашень топоде…

 

 

Ваномок пациентть, врачсь сявозе рьванц шири и мярьгсь:

 

—Тонь мирдце аф мялезон…

 

—Тейне стане жа, доктор,—мярьгсь рьвясь.—Но сон цебярь семьянин!

 

 

Мирдсь мрдась командировкаста. Эрязста панжезе кенкшть и сувась квартирав. Ласьксь шкафти—кивок аш. Варжакстсь койкать алу—кивок аш. Балконти, ваннайти—кивок аш. Озась кухняв, нюрьхтясь эстеенза стакан и салаване пшкядсь рьванцты:

 

—Сиретькшнят, Анна!

 

17.03.2022 №10

 

Пеетькс пакшкат


 

Стака он

Эх и он няень ётай веня! Аф он, а дива. Онцтон мон, бта аф монан, а рьвязян, Алду. Прясон руця, лангсон нула, пильгсон сери кочкяря туфлят.

 

А коса, шта, арьсян, Алдувозе? Шарфтонь фталу, и эсь сельмоненди аф верондан. Алдувозе, бта аф рьвязе, а монан. Лапотьф койкати и офтокс крнай. Уды.

 

Арьсян, катк мирдезе, эрь ина Алдузе—уды, а мон ся ёткть кудонь тефнень тисайне.

 

Сембонди содаф, кудонь работась аф стака: кяскафт аф каннемат, шочкт аф веляфнемат. Кудса пульхкомась шямоню трёшниковок аф тии. Пежетьтоба! Тинь, алянят, пяк тяда эводе, кда онцтонт монь лацон вдруг кудазоравакс аратада. Камозяда стане, кода мон камозянь. Катк мирденте—ну, ина, рьвянте—удыхть. Тясть токсе. Вов и моннеське, кода ни азыне, кевадаф, а мон ся шовор Люся стирнязень и Вова цёранязень эшеляйне и матыне.

 

Вов и сембе кудонь тевозе. Тяда башка, кядьгонятнень штайне-нардайне, ковёрхнень шукадине, кияксть тяине. Да и сембе. Деряй тя лама?

 

Тоса тага кой-мезе тиень: паннень цюлкат, петфнень па- нархненди пунят, мирдезень костюмонц утюгса ётайне и шаба нулатнень муськине.

 

Тя вдь ёфси аф стака.

 

Тиине сембонь, озань и ащан: а кда ни озать, прясот аньцек кодама мяль аф шары. Арьсян, кода тяни шобдава мирдезти сафтомс, мезе теенза завтраконди пидемс. Сяда танцтиня.

 

Арьсян, вов тянь пидеса, тонань рястаса-пуштса, да, пожалы, пинге ни ваймамска. Ёрань ни велямс, да лядьсь мялезон: вай, да мон вдь нинге тага фкя тев юкстань—нинге шалхконь нардамань руцянятне муськомат да гладендамат. Катк мирдезе шалхконц ожазонза аф нарнесы.

 

Гладендайне, велянь койкати и нувазевонь. Вдруг маряса: мирдезе—ну, Алдузе—тостиесамань бокс:

 

20.01.2022 №2

 

КЕЛЬГОЗЕ УФАЙКИН РАХСЕМАНЦ

Соня цють аф марнек       ошенц ётась.

 

Кенярдсь—пара мусь

 

                                        работа.

 

Мешень водяй ульсь

 

                           контора ошса.

 

Соня секретарша тяни

 

                                            тоса.

 

Оцюняц Уфайкин Проня,

 

Кодак няезе—и шназе.

 

Мялезонза тусь пяк Соня,

 

Покодема и примазе.

 

Ато ульсь сонь

 

                            секретаршац,

 

Кой-кит няендезь и рахасть.

 

Арьсесть колганза аф

 

                                       парста,

 

Мес цють аф крхтапа якась.

 

Мяштец штада, юбканяц

 

                                   нюрьхкяня,

 

Эрь, а кенженза кувакат.

 

Пронянь рьванц мяльс

 

                                    ашезь ту,

 

Пельсь—прянц шаракофтсы

 

                                     мирденц.

 

Лия секретарша муль сон—

 

Кошардозе,

 

Короц ашезь кирдев…

 

Сонявок хуш якась

 

                                 моднайста,

 

Но сонь мяштец аф прокс

 

                                    штадоль.

 

21.10.2021 №41

 

Анекдотт


 

Землетрясения

Алясь мон виде ваймонян. Мезе азыхть, сянь путса прязон. И афолине няе рахсихнень-кичкоряйхнень. Стапнень эзда монь фкя ялгазе—Ягабабкин. Афи сяшкава ялга, да мархтонза покодян фкя учрежденияса. Монь шразе кеветиеце кабинетса, соннесь кемгафксувоцеса. Улхка шобдава сань работама вастозон, каяйне плащезень, валхтыне шляпазень, ёрайне шяярьнень сеендемс, да лядьсь мялезон—прязон ашезь ляда ни фкявок шяярь. Кизунян ни, няйсасть.
Лисень кабинетста, сувань Ягабабкинонь шири... шумбракстома. Сувань, а сон, Ягабабкин, ащи шранц ваксса—кургсонза сиянь пеенза пиндолдыхть. Инголенза озаф аф содаф аля. Кядень люпштазь шумбракстонь кафцьконь мархта. Ягабабкин корхтась аф содаф аляти:
—Тячи шобдава азозь радиоса. Монць кулине. Эпицентрась кармай улема вокзалть маласа...
—Да?!—тейне-арам, эвотьфста абонгодсь алясь.—Стама зиян минь ширесонк нинге ашель...
Мон стяфтыне пиленень. Мезе, шта, радиоса азсть? Кодама эпицентра кармай улема вокзалть маласа? Вдь ся маласа монга эрян. И кизефтень:
—Мезе азсть тячи шобдава радиоса?
—Саранскяйсонк учсеви землетрясения. Али тонга ашить куле?—корхтазевсь тейне Ягабабкин.—Сембода вии трнатома-комболдома вастоц кармай улема машина кинь станциять маласа. Монь рьвязе кудса петфнезень ни сембе вальмятнень кагодса, каба афольхть лопие клянцекне. Питни паршиеньконь кяскавга мараськ. Лихтьсаськ ушу.
«Вона мезе учсеви!—абонгодонь монга.—Хуш минь тястонь моданьконь эса аш аф нефтат, аф вулканонь магмат-месть и сякокс... землетрясения... Стихия!»
Эстокиге маладонь телефонти, кочкайне эсь квартирастон иомерть.
—Да-да,—маряйне тоста рьвязень вайгяленц.
—Петровна, кулят?
—Кулома аф срхксян. Тон мес тяшкадокиге ёрасамак кулофтомс? Али од аваня эстейть муть?—изгордозевсь тона песа Петровназе.
Аватне хуш аф сембе фкя лацот, но лама эздост изгордомань кельгида. Синь кяльсна шинек-венек аф сизсихть: мтор-изгор, мтор-изгор. То тя аф мялезост, то ся аф стане ащи. А моннесь вчёк стапнень ёткста и нинге коль пеленди—муян эстейне лия рьвя. Сякось кяльбрясонза: «Няйса, мон тонь мяльцень мольфтине! Арьсят, кода пезень сатфтомс!»
—Кизефнете: кульсамак али аф?—пешкодонь трубкати.
—Кульхте, кульхте. Нинге мезе азат?
—Тон од орозень, костюмозень и лия питни паршихнень кочкайть кяскавс,—тндян.
—Тон эсь ёньцотат?! Синь шкафса ащихть лац-ряц.
—Сявомс эрявихть. Кочкайть синь кяскавс!
—А-а! Вона мезе! Тон срхкать монь эздон тумс? Муть эстейть—кодамонь колга кунаркиге арьсекшнят? Ну и архт, а мон тейть кодамовок кяскав аф максан... кяскавса лапотьф!
—Тон кульхть!—тага пешкодонь мон.—Ягабабкин азондозе...
Но Петровназе сяда тов ашезь карма кулхцондомон, сонць снавкс почердазень валонзон:
—Ах, монь ни лемнесамак яга-бабакс?! А тонць кият? Кащей! Уфам пря! Мзяра киза-тяла тейть муськондень, пицень-панцень! И вона кода пандсак па... парозень. А... афтерькс, улефтярят!—уркодозевсь Петровназе.
—Лоткак уркодомда!—тага пешкодонь трубкати.—Ягабабкин ялгазе мярьгсь—тячи ули землетрясения.
—Мон—яга-бабан, а тон туят Ксенияти?! Ну и архт!—мярьгсь-гавкстсь Петровназе и шлепадезе трубкать.
Мезе тейне ляткшнесь? Нинге весть абондозь варжакстонь Ягабабкинонь лангс и эрязста лисень. Эсь кабинетсон щайне плащезень, щафтыне шляпазень и ласькозь—куду.
Пачкодень, панжине кенкшть, а тяса ни, ванан, «землетрясениясь ушедсь». Кияксса колсеф-тапсеф кядьгонят. Щапне-месне тарксефт шкафста и ёряфт кода-повсь. А Петровназе ащи киякс кучкаса, кяденза люпштафт тифтень бокованза и ваны лангозон кашанготф тигракс. Сяльде кодак рназеви:
—Ах, тон сать паршихнень инкса! Сявить!—няфтсь киякс кучкаста тарелка да банка пялькснень лангс.—И сявк тяста эсь шотценьге! Аертт баба-ягать эзда! Архт Ксенияти!—азозень ня валонзон Петровна, варжакстсь тумбочкать шири, тоста няезе панчфу кукшеннять, конань тейне казендезе шачема шистон профкомсь, фатязе кафта кядьса, цят!—мастору. Сявок срадсь пяльксонь пялькс.
—Лоткафт. Сетьмок. Кулхцондомак.
А сон афи кули. Стаки грохии. Веляфтозе шрать. Цяткофтозень мастору стенаста часттнень, сяльде фатясь миле, эрьхтезе люстрать—ледерьгодсть сянь хрустальнянза. И милень кеподезь Петровна врьгятсь монь лангозон.
—Лоткак! Сетьмок!—пешкодонь мон и савсь нолдамс тевс алянь вийсь. Кундайне кяденц.—Кулхцондомак!
И кода-аф кода азондыне сянь, мезе ёрань ёфтамс нинге телефонца. Ванан, Петровназень шамац ушедсь валдомома, а сяльде кодак рахазеви:
—Эх, тон, таяфтф ломань!—корхтась ни ляпоняста.—Няк, содасазь, конашкава тон виде ваймонят и рахсихть лангсот. Ся Ягабабкинць рахсемга стане азозе, а тон афкукс прязт путыть валонзон.
Кали васькафтомань? Ули али аф землетрясения? Да тейне сон тяни афи пелькс. Бльшем, монь Петровназе сонць землетрясениянь эпицентра.
Михаил МОИСЕЕВ.
12.08.2021 №31

 

ПЧКАФТОЗЕ ЭСЬ ПРЯНЦ РАХСЕЗЬ

Тиеськ семботь минь,
Штоба араль сярядись
 шумбракс.
Но вдь ломанць, шарьхкодесть,
                                            аф кшнинь,
Потай эздонза аф эрь урмась,—
Тевонь содай докторхне мярьгсть
                                                 тяфта,
Лия фкявок валня ашесть
                                                 прафта.
Сёманьконь рьвац сонць куду
                                                  ускозе,
Ляпе васту мирденц путозе,
Танцтиняда эсонза симдсь-андсь,
Мельганза эсь сельмоса най ванць.
Якась воражьянди сон аф весть,
Экстрасенсондивок ярмак путсь.
Сякокс кельгом Сёмац кати-мес
Шумбрашинцты коданга изь куць.
Эста Сёма ёню книгат мусь,
Тонафтозь сонь, эздост
                                              пара учсь,
Ушедсь сонць эсь прянц
                                         пчкафтома.
А пчкафтомац ульсь тяфтама:
Кудса рьвац мзярда аш,
Сёма ваномати шаштсь.
Эрька каршесонза цяфамс,
цяфамс!
Эрька сонць эсь лангозонза
рахамс!
Рахай стане, тяри нльне пряц,
Меле няфтьсы эстеенза кяленц,
Сядонга пяк рахафтсы сонь тяц.
Тяфта алясь петнезе эсь мяленц,
Рахсембачка юкснезе урманц,
Мярьгат, сон аф сяряди—шумбра.
Мадондсь васту—сярятьфть ашель
                                                                   пец.
Лездыкс эста арась интернетсь.
Интернетса теенза весть повсь
Клоунць пяк кунардоннесь Попов.
Сон ишакть лангс отькорьста пяк
                                                    комотсь,
Аш ни кода рахафтозе Сёмань.
Музе Сёма и Никулин Юрань.
Шочка кеподемс ся ёрась—прась.
Рахсемстонза сярядиньке курок
Цютькя якамонга ни срхкась.
Байдеконя лангс сон стяшендсь,
                                                  стяшендсь,
Ашезь кирде пильге лангса—
                                                 прашендсь.
Сякокс сяськомс ёразе урманц,
Исце када рахсезь пчксеманц.
Тага ваномати шаштсь и цяфась,
Тага сонцень лангозонза рахась.
И рьвац тя ёткова сувась.
Мезень цирк—изь шарьхкоде куватьс.
Кали кельгом мирдец ёньда лиссь?
Рахась сон и пеккедь лангса кштись.
Вай, вай, вай, вай! Вай, вай, вай!
Авась эхи эводсь—цють аф прай.
Сёма эста лястязе рьванц:
—Тяфта ёран, Клавдяняй, пчкамс!
Азондозе, ашезь сёпа мезьге,
Кода рахсемась цютькада лезды
Марямс аф пяк сярядикс эсь прянц.
Ёрай тяфтане сон прокс пчкамс.
Клавдя кенярдсь, мирденц ктмордазе,
Хуш и кемась нинге и аф прокс,
Аньцек рахсезь потай тонь урмаце.
Но тя тевти соньге Сёмац сотсь.
Лятфтазе эзк, мирдец одста ёрась
Тонадомс гармонияса морамс.
Сави, шять, хуш тяни сонь и рамамс,
Сёмань мяленц, катк сон морси,
                                                     ваномс.
И гармоня рамась Клавдя эста,
Кандозе сонь куду—
Эрька морсек, Сёма!
Нотат рамасть. Морось шудезь
                                                    шудесь.
Сёма тяфта морамонга тонадсь.
Латцесь сиде моронят рьвац
И гармонять коряс моразень.
Рахсезь синь прянь няихнень пяк лац,
Аф ужяльдезь рахсезь нолатнень,
И эсь пряснонга цютькада рахасть,
Кода калонь кунцема весть якасть,
Цопатькшнесть щука, да кядьстост
                                                      мянць…
Векцень эряк, аф юкстасак тянц.
* * *
Кепсесь вяри шись валом-валом,
Сонцень валдонц масторлангу кандсь.
Шобдать курок панезе ни сон…
Кендин Сёманьке стясь пильге лангс.
Кенярдсть иденза сонь, кенярдсь
                                                     и рьвац
/Идензон минь тянемс ашеськ
                                                   лятфне/.
Весть синь марса ошень цирку састь.
Комотни лефт, тиграт циркса
                                                    няфнесть.
Ну, а клоуттне—нят сяка тев
Прашендсть кунф и пряснон лангса
                                                      якасть,
Кепсесть прязост роди стака кефт.
А синь шавот. Кода тон аф рахат?!
Сонцень праздниконц цирксь
                                                     шумордась,
Сембе паронь арьсезь кядьснон
                                                   цяпасть.
Аляснон кядьбеса иттне састь,—
Модать ланга пильгонза ни якасть.
* * *
Докторхне тянь кулезь… Мезень
                                                           чуда?!
Кендин Сёма сярядись пчкясь!
Курок содазь сяньге, коса кудоц,
Пялонза кись виденяста вятсь.
Азондозе докторхненди Сёма,
Кодане сон сяськозе урманц,
Кода тага арась шумбра ломанькс,
Панезе—ворьть тяста!—куломанц.
Азозь мяльснон докторхне и синцьке:
—Да старандать, няйсаськ, тон аф
                                                         стак.
Лездсь пчкамс, Семён Иваныч, вийце…
Ну, а кда эрявксты—больницяв сак!
* * *
Кулезь сярядихне—
Сембонь синь пчкафтсазь.
Оду малазост урмась аф сай.
Сявсь больницясь
Цирконь клоун штатнай,
Кармай тяса рахсефтемост най.
Анатолий ТЯПАЕВ.
 
10.06.2021 №22

 

Пеетькс пакшкат

Шобда ульцяса.

 

—Эй, ялгай, маласта ашеть няе полицейскяй?

 

—Аш.

 

—Эста сяда курокста каяк дублёнкацень…

 

 

Ёмла Вованясь ваны, кода аляц архты поталакть эса, тядяц корхтай теенза:

 

—Ватт, Вовочка, и тонафнек, касат и аляцти лездома кармат.

 

—А мезе, ся пингти архтомать сонць аф шумордасы?

 

 

—Тядяй, а кода минь появаме белай свету?

 

—Шкабавазть вельде. А алязе мярьгсь, што минь лисеме обезьяттнень эзда.

 

—Ну, мон корхтан эсь раднянень колга, а сон сонценнетнень.

 

 

Банкса алясь ащи кассать ваксса и мезе-бди вешенди сумкастонза. Кассирсь корхтай теенза:

 

—Гражданин, тяк кирне очередть, азк сяда курокста, мезе мяльце тиемс: сявомс ярмак или путомс?

 

—Конешна, сявомс! Цимбирькась шаволемань, коза путыне пистолетть?!

 

 

—Мес тяшкава аф мяль вельде ащат?

 

—Рьвязе срхкси колма недяляс моряв.

 

—Эста тонь ёфси аф шарьхкотте?

 

—Кда улян весяла—сон тоза аф туй.

 

27.05.2021 №20

 

Пеетькс пакшкат


 

 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин