ШАЧЕМА ШИЦЕНЬ МАРХТА, САРАНСК ОШЕНЬКЕ!

Саранскяйть шачема шиц отмечсеви Россияннеть мархта фкя числаня, 12 июньцта. Тядде кельгома ошеньконь эсь лацонь юбилеец. Теенза топоди 375 киза. Ульцятнень, общественнай транспортть, магазиттнень эса и лия вастса улихть тянь колга лятфнемат. Тя тиф сянкса, штоба Саранскяйть эряенза мяляфтолезь родной уженяснон историянц и маряльхть инксонза гордость. Кода фалу, эрь кизоня 12 июньцта Саранскяйса аноклакшневи культурнай козя программа. Саранка ляйть трвасонза, Советскяй площадьса няфневихть концертт, фонтаннай спускса пуропневихть выставкат, илять уленди салют и стак тов. Юбилейнай кизоня ошень эряйхне учихть нинге сяда козя программа. Эрьда кизефтьсаськ, кода Саранскяень ломаттне ётафтсазь тя шить, кодама мяльса-арьсемаса васьфтьсазь сонь?
Алла Пустобаева, визажист:
—Васендакиге мялезе поздравляндамс кельгома ошезень Шачема шинц мархта. Арьсян теенза сяда тов мазомкшнемс, штоба эряенза марстонь вийса ванфтолезь сонь. Но ся, мезе тяниень пингть ули ошсонк, кеняртьфти. И тянь лангса тевсь аф лоткси. Кизоста кизос Саранскяйсь мазоми и мазоми. Ульцятнень эса аф няят фкявок ёрдаф каготкя или сюлека. Тяса и тоса клумбатнень эса панжихть аф фкя лацонь тюсса панчфт. Фонтаттне дивандафттядязь мазышиснон мархта. Ётат ошева—мяльце кеподи. А кода аф отмечамс тяфтама ару, мазы ошть шачема шинц? Семьянек: мон, мирдезе и ёмла стирняньке эрь кизоня уленттяма сембе мероприятиятнень, концерттнень эса. Ужяль, но салютс ашеме лядонда. Но тядде арьсетяма сонь учемс. Кизось вдь юбилейнай!
Алина Фомина, бакалавр:
—Эрь кизоня 12 июньцта макссевихть ваймама шит. Но куду, Ардатовскяй райононь Баева вели аф якан, сяс мес Саранскяйса тя шиня эряфсь лаказь лакай. Шобдавакиге центрась пяшкоди ломаньда. Кода корхнихть, марьти аш коза прамс. Ётат паркова—аттракциоттненди кувака очеретть, кафетне пяшксет ломаньда, Саранка ляйть трваса аф няят шава скомняня. Тя инь цебярь пингсь, штоба васьфтемс и ваймамс ялгатнень мархта. Тяфта арьсян тиемс и тяддевок. Оцю мяльса учса Россиянь содаф артисттнень самаснон, вдь тя арась цебярь койкс-обуцякс, мзярда Саранскяйть Шачема шистонза Советскяй площадьса выступандайхть Москувонь артисттне.
Тонафнемань пингста Саранскяйсь арась роднойкс, аф ваномок сянь лангс, што шачень и касонь велеса. Лувса сонь кельгома ошекс и арьсян теенза сяда тов панчфокс панжемс!
Александр Зингеев, слесарь:
—Марян гордость, што шачень-касонь и эрян ся ошса, кона аф весть сатнезе васенце вастть «Россиянь инь благоустроеннай ошсь» конкурсса. Койсон, Саранскяень ломаттненди тя оцю честь. Странаньконь лия региононзон эса лама раднядон и ялгадон. Мзярда синь сашендыхть инжикс, эздост кулендевихть аньцек шнама валхт Мордовиять столицанц лемс. Мялезост ошть арушиц, эсонза лама культурнай вастта, ули коса ваймамс, ётафтомс ётка пингцень. Ульцява ётамста аф няят кувака шяярь и тяйняня штанаса цёрат. Стирнятнень лангс пара ваномс: шамасна вельф аф пяшкотьфт косметикаса. А корхтамасна, кле, шарфты питерскяеннети: аш лима-сюна валхт. Нльне мярьгондихть, што Саранскяйсь—тя цебярь васта, коса можна касфтомс од ломанень цебярь поколения, коса нравственнай и моральнай питнишитне нинге ашесть юма-ара, кода ламоц лия ошнень эса.
Саранскяйть Шачема шинц лувса оцю праздникокс, сонь аф отмечамс аш кода. Семьянек мольхтяма аноклаф мероприятияс.
Сергей Батунин, индивидуальнай предприниматель:
—375! Койсон, тя числась ошти аф оцю, но и аф пяк ёмла. Тя пингста Саранскяйсь ётась кемокстамань-вииямань ки, кона ульсь аф теждятнень эзда. Сяс, арьсян, што Мордовия Республикать столицаса эрь эряйсь должен отмечамс ошть Шачема шинц. Мон тяфта и тиян. Мялезе улемс сембе мероприятиятнень эса. Сембода пяк учса салютть. Кода кулине, сон кармай сяда оцюкс меляннеть коряс. Интернетста ваныне афишать и, койсон, тя шись удалай сембе ширде. 12 июньцта ломаттненди ули коза молемс.