Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Культура

«МОРОСЬ ТЕЙНЕ КЕЛЬГОВСЬ ШАБАКС ПИНГСТА»

«Мордовиять золотань вайгялец», «омбоце Магамаевсь». Тяфта лемнесазь од морсить, Мордовскяй государственнай филармониянь солистть, ламоц международнай и всероссийскяй конкурсонь лауреатть Вячеслав Зобковонь. Кулхцондсак-тисак артистть мораманц и шарьхкотькшнесак—ня валхне теенза афкукс пяк ладяйхть. Сонь вии вайгялец токай седи, а сцена лангса прянь вятемац мала сянди, кода вятьсазь эсь пряснон публикать инголе российскяй эстрадань инь содаф артисттне. Республикань эряйхненди Вячеслав Зобков содаф, кода «Шумбрат, Мордовия!» народнай творчествань республиканскяй фестивальть, а стане жа ламоц правительственнай мероприятиятнень вятисна. Нльне эстовок, мзярда артистсь ащи кулисатнень фтала, эсь лацонь вайгяленц коряс залса пуромфне шарьхкотькшнесазь—корхтай Вячеслав Зобков. Сонь вайгялец сидеста путневи ряцок   СССР-нь Народнай артистть, морсить и композиторть Муслим Магамаевонь вайгяленц мархта. Виде, сонць Вячеслав тя маласькофнемать лувондсы аф прокс видексоннекс, хуш и виденцякшни,—содаф артистть мархта ряцок путнемац максси теенза вийхть и мяль венемомс сяда сери текшненди.
Аф кунара В.Зобковонь мархта васьфнесь минь корреспондентоньке и эняльдсь отвечамс кизефксонзон лангс.

—Вячеслав, мзярда панжить морамань асуцень?
—Морамазень кельгине нинге  шабакс пингста. Мяляфтса, ванан телевизорса Олег Газмановонь концертонц эса и моран мархтонза рядс: «Эскадрон моих мыслей шальных…». А микрофонкс тейне ульсь… шра лангста куцюсь. Но ёмласта мес-бди виздень морамс, тиендине тянь аньцек кудса, мзярда лядондонь ськамон, арьсень, што монь аф лисенди. Сембось полафтсь, мзярда 7 класса тонафнемстон велезонк од талантонь кочкама састь МР-нь Заслуженнай   артисттне, мирттне-рьвятне Нина Яковлевна и Вадим Владимирович Медведскяйхне. Районнай  центраса синь пуроптсть драматическяй кружок и вешендсть эстеест воспитанниконди артистическяй асуши мархта од ломатть. Азонтфтсть кядьстон стихотворения, тусь мялезост. Тяфта мон арань драм- кружоконь аф фкя лацонь постановкань участникокс. Медведскяйхне приметасть эсон актерскяй маштомошит, а вов морсеманнетнень панжине эсь эсон аньцек 9 класса тонафнемста. 9 майти лемтьф школьнай иласа морайне Марк Бернесонь «Журавли» моронц и няине-маряйне эсь прязень оцю сцена лангса ащикс. Нина Яковлевна и Вадим Владимирович азсть тейне мяль поступамс Саранскяень Культурань и искусствань колледжу.
—Кода тянь лангс ванцть мала ломаттне?
—Тядязе-алязе пичедсть нолдамс ськамон оцю ошу, но каршек тянди ашесть аще. Сянкса Леша дуганозе, кода маштсь корхнесь эсон, артистсь, кле, тя аф профессия, республиканьке аграрнай, сяс работама модать лангса, мезть, азса, тиезе сонць—работай главнай агрономкс райононь фкя хозяйстваса. Но меколи, мялезе сотомс эряфозень сценать мархта сявсь вяри.
—Кода лиссь тяфта, што тон арать «Шумбрат, Мордовия!» фестивалень вятикс?
—Университетса (ся пингти Культурань и искусствань колледжсь полатфоль Н.П.Огарёвонь лемса МГУ-ти) ётафтфоль прослушивания, коряванза и кочкафолень. Вятине фестивальть 2005 кизоста сявомок 2012 кизоти молемс.
—Мезьста ушедсь сольнай карьераце?
—Тевсь лиссь, кода корхнихть, случайна. 2008 кизоня А.С.Пушкинонь лемса паркса Масланцяти лемтьф иласа анань пря лисемс сценать лангс и морамс мора ошень эряйхнень лемста. Организаторхне васенда ашемазь нолне, эста ширезень кирдезе Саранскяень культурань управлениять начальникоц Светлана Баулина, и мон морайне Анна Германонь репертуарста «Надежда» мороть. Сяка шинякиге тертьфолень работама ошень Культурань центрав. Вов ся пингста и морсян профессиональнайста.
—Оцю содафши аф аньцек республикаса, но и сембе странаса кандсь тейть «Новая звезда» вокальнай конкурссь. Кода арьсят, мезсь шорясь эсонза сяськомацти?
—Конкурсонь жюринь председательсь, Россиянь Народнай артистсь М.И.Дунаевский мярьгсь эста: «Тон морайть семботь пяк правильнайста, тейне ашезь сата мезе-бди аф правильнай». Сон матозе фкя тяштть, и мон кочкань 80 балл. Тянкса ёфси ашезь колав мялезе. Конкурсса выступандасть пяк вии, содаф артистт, конат аделасть консерваторият. А мон—простой цёрась, конань нльне высшай образованияцка аш—сатонь тяфтама результат. Тейне тя пяк оцю оценкась.
—Тон сидеста морсесайть Муслим Магамаевонь репертуарста моротнень. Кельгсак творчестванц?
—Пяк кельгса. И тя кельгомась ётась тейне родительнень эзда. Нинге ёмла класса тонафнемста тонафнине «Королева красоты» моронц. Монь мялезон смузь мархта моротне. Магамаевонь моронзон эса пяк крхка смузь. Ня произведениятне кармайхть эряма сембе пингс, сяс мес эсост ломанень инь главнай питнишитне, васендакиге, патриотизмась. А мон патриотан, кельгса эсь Родиназень. Кода мярьгсь И.Кобзон, тяда инголе музыкать тяшнезь стихнень лангс, тячи—тексттнень…
—Тячиень содаф артисттнень эзда кие тушенды мялезт?
—Дмитрий Хворостовский и Лев Лещенко.
—Морсемада башка ули кельгома тевце?
—Кельгса калонь кунцемазень.
—Фкя пингть арьсекшнеть максомс заявка «Голос» вокальнай проектса участиянь примаманкса. Мес кадыть тя мяльть?
—Анокламатне и проектть эса участиясь сявихть пяк лама пингта. А тейне васенце задачакс тячи арси вокальнай маштомошитнень, морамань техникать педа-пес содамасна. Морамань асусь—тя фкясь, а нинге пяк лац содама, кода нолнемс сонь тевс. Морамань техникафтома вайгяльсь апак приметак олай-солай несколька кизода меле ни. Тячи мон тонафнян Л.П.Кирюковонь лемса музыкальнай училищаса, вокальнай отделенияса.
—Вячеслав, азонтт аф лама эсь колгат, коса шачеть-касоть, кит тядятне-алятне? Морси ломатть улихть родсонт-плямасонт?
—Ёмла родиназе Ичалковскяй райононь Рождествено велесь. Тядяне-аляне простой рабочайхть. Алязе сембе эряфонц лемдезе сварщиконь тевти, тядязе работай налоговай инспекцияса. Кода ни азыне, ули корязон оцю брадозе—Алексей. Морсихть радняньконь ёткса ульсть и улихть. Атязе, алязень аляц, цебярь гармонистоль, бабазень пяк мазыель вайгялец. Алязе одкс пингстонза морсесь гитараса.
—Кода личнай эряфце латцеви? Разнай конкурсса, фестивальса выступандакшнемась аф арси тянди перяфксокс?
—Кельгома стирезень, Екатеринань мархта кафцьке творческяй ломаттяма. Сон—хореограф, выступандай Мордовиянь Народнай артисткать Нина Спиркинать «Арсема» кштимань эстраднай группасонза. Заняфшить сюнеда няендемс, конешна, сашендови сяда шуроста, сянкса лажаткшнемась кельгомать сяда кемокснесы.
—Спасиба, Вячеслав. Сатфкст тейть!
О.ЕВДОКИМОВА.

09.06.2016 №21
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин