Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Обратная связь (Газета - Читатель)

Лувись—газетать колга

Л.А.Березенцева, Инсарскяй райононь Исавелеса шачф-касф мокшава, Самарскяй областень Тольятти ошень Мокшэрзянь культурнай центрать видеса мокшень кялень вяти:
«МОРАФНЕСАСЬК ШИРЕСА ЭРЯЗЬ»
—Тольяттиса, кода и целайнек Самарскяй областьса, аф кржа мокшеда. Аф ваномок сянь лангс, што кунара эрян ширеса мокшэрзянь масторть эзда, мон ашине юкста тядянь-алянь кяльть, народоньконь коензон-обуцянзон. Мон вятян мокшень кялень курст Мокшэрзянь культурнай центрать видеса. Содафтыне занятияс сашендыхнень «Мокшэрзятнень кяльсна и культурасна» программать мархта. Занятиятненди анокламста кой-коста ноляса тевс «Мокшень правдать». Газетась почта вельде несколькаксть ковти пачфневи Мокшэрзянь культурнай центрав. Тянкса оцю спасиба азома редакциять коллективонцты, кона шарьхкодьсы, што ширеса эряй мокшетнень ули оцю мяльсна морафнемс эсь кяльса лисенди газетать. Монць васендакиге шарфнян мяль ся материалхненди, коса пачфневи, мезе одня лиссь республикаса мекольдень пингть. Аф ваномок сянь лангс, што кунара тунь мокшэрзянь масторста, сон фалу седисон. Тоса, Исавелеса, эряй тядязе Зоя Ивановна Ломачкина. Сонь эряфоц кемоста сотф мороть мархта, улихть авторскяй моронзовок. Колганза тяшнефоль «Мокшень правдаса».
Оцю мяльса морафнесайне «Мазыхть мокшень стиреньке» рубрикать ала макссеви конкурснай материалхнень. Эсост аф аньцек пачфневи мокшень стирьхнень мазышиснон, удалаф тевснон, сатфксснон колга, но и няфневи мокшавать щамонц-карямонц мазышиц. Лемделине козякс ся семьять, конань эса ванфтовсь тяфтама костюм.
Седиезе кеняртькшни, мзярда газетась пачфни Самарань, тяконь лувксса и Тольятти ошень мокшэрзятнень, центраньконь квалма. Пара, што мекольдень кизотнень вииясть сотксне Мокшэрзянь культурнай центрать и мокшень кяльса лисенди фкя тяка газетать ёткса.
Мезсь нинге мялезон газетаса? Материалхне, конат пачфнихть лия региононь мокшэрзятнень колга.
«Мокшень правдать» эрь номеронц кядезон сявомац арси шачема-касома ширеть мархта эсь лацонь васедемакс.
Пара улель, кда сяда сидеста азонкшнеледе содаф мокшэрзятнень квалма.
 
Сёрмадозе Т.АЛЬШИНА.
В.Е.Вельмяйкина, «Пою»
ансамбльть руководителец:
«ТЯДЯНЬ КЯЛЬСА СЁРМАТФ ВАЛСЬ ЭЖДЬСЫ ВАЙМОЦЕНЬ»
—Васендакиге, мялезе поздравляндамс кельгома «Мокшень правда» изданияньконь малаткшни оцю иланц мархта! Лама киза сон вятьсы историянц, кемокснесы мокшэрзянь масторть эряфонц лопанянзон лангса. Изданиясь арась эсь лацонь энциклопедиякс, коса пуроптф народоньконь культурань, кялень козяшиц.
«Мокшень правдась»—мялень салай печатнай издания. Сон тейне кунардонь пара ялга. Кармань лувондомонза нинге идькс пингстон. Тянивок эрь кизоня серматфнеса и оцю мяльса лувондса. Кода ванфтомс кяленьконь, аф юкстамс культураньконь, коеньконь-обуцяньконь—вов мезень колга мольфтеви корхтамась газетаса. Пара, што газетать вельде азондсазь мяльснон мокшэрзянь ученайхне, педагокне, культурань работникне, мокшэрзятне, конат эряйхть республиканьконь эзда ширеса. Лиякс мярьгомс, газетать ули сонцень шамаликоц, ули мезе эздонза лувомс, ули мезть лангс шарфтомс мяль.
Кельгома газетазе максси ответт лама кизефкс лангс. Ломаттнень таколфтсазь тя или тона ширетне: пенсиять, заработнай платать квалма, квартирнай, ЖКХ-нь кизефксне и стак тов.
Ули мезе лувомс «Мокшень правдаста». Статьятне сермадовихть ару мокшень кяльса, шарьхкодевиста.
Национальнай тя изданиясь кизоста кизос ванфнесы сянь, мезсь питни мокшень эрь ломанти: кяльть, койхнень-обуцятнень. Вдь монцьке шачень мокшень семьяса, коса васенце вастса ащесь минценнесь. И аф стак кочкайне кельгома тевозень. Тячемс мяляфтса, кодама весяласта, сире койхнень-обуцятнень мяльса кирдезь, етафневсть национальнай илатне. Сяс «Пою» ансамблень сембе морсихне старандайхть ванфтомс сянь, мезть максозь тейнек атяньке-бабаньке. Кельгома изданияньконди арьсян оржа темат и штоба сяда товга серматфнихнень лувкссна аньцек касоль.
Л.НИКОЛАЕВА.

09.06.2016 №21
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин