Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Наша усадьба

МЕДВЕДКАТЬ КАРШЕС—ПСИ «БАНЯСЬ»

МЕДВЕДКАТЬ КАРШЕС—ПСИ «БАНЯСЬ»
Рана тунда медведкась переса ушеткшни шувондома эсь кинянзон. Вчек тя пингть тиендян теенза «баня». Оцю кядьгоса лакафнян ведь. Меле тя ведть кайсеса лейкас и мархтонза валондсайне медведкать кинянзон. Сядонга отькорьхне нльне лийкснихть модать алда (мон афи содайне, што синь маштыхть лиема), а сяда нолатне кулсихть модать потмоса. Вете кизоста тяфтама обработкась лездсь кирьфтамс перестон медведкатнень лувксснон несколькаксть.
П.В.СТЕПЕНКО.
ПРИВИВКАТ СЯВАНЯТНЕНДИ
—Шумбратада! Кирдян кафта сяванят и васьфтень тяфтама прябала мархта. Тракснень коряс содаса, што жувататненди эрь кизоня тиендема кати-кодама прививкат. Но сяват водендань васенцеда. Синь сембось тракснень лаца? Эрь кизоня макссема вер исследованиянди и тиендема прививкат?
Александр Никишин.
—Сяватнень вакцинациясна ащи региононтень ветеринарнай вешфксонзон эзда. Кизоти весть или кафксть ётафневи вакцинация сибирскяй язвать каршес, кизоти кафксть сявондеви вер бруцеллезть и лейкозть улемаснон лангс исследованиянди, кизоти весть ветслужбась ётафни туберкулинизация.
Паксяв (пастбищав) лихтемдост инголе жувататненди тиема обработка эндопаразиттнень и гельминттнень эзда. Сяльде, мзярс синь вановихть перьфпяльса, стойлав сувафтомдост инголе мярьгондеви нолдамс тевс антигельминтикнень.
 
МЕЗЬДА АНДОМАТ БУКАНЯТНЕ, ШТОБА СЯДА ВИШКСТА КАСОЛЬХТЬ?
Кда корхтамась мольфтеви кодамовок препаратонь колга, кона лезды жуватати вишкста касомс, простой ветеринарсь теенть аф ялга. Тяфтама волшебнай таблеткат мишендема вастста аф васьфттяда, да и синь афи эрявихть, кда мяленте касфтомс экологическяй ширде ару и танцти сиволь.
Буканятне вишкста кочкайхть сталма, кда рационозост каятада ячменень, пинемонь, кукурузань пянготьф зерна или комбикорма. Ков сяда лама концентрат ули буканятнень рационца, тов синь сяда вишкста касыхть. Тяфтама ярхцамбяльть пингста сивольське ули сяда соку и танцти.
Жуватань кирдихнень еткса мольфтевихть корхнемат, эрявихть-аф петьфнемс печкомс кирдеви буканятнень? Шоряй-аф петьфтемась сталмонц касоманцты? Апак петть буканятне сяда стакат петьфнень коряс. Но апак петть 14-15 ковонь буканять аф эряви кирдемс стадаса. Тяфтамотнень куяфтома пингстост мярьгондеви кирдемс сотнефста.

09.06.2016 №21
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин