Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Экономика

50 КИЗА МОРДОВИЯТЬ ПАНЧФОКС ПАНЖЕМАНЦ ИНКСА

—Пётр Иванович, тядде «Газпром газораспределение Саранск» организациясь отмечасы 50 кизонь топодеманц. Сонь мархтонза сотф Мордовияса газификациять историяц. А мезьста сембось ушеткшнесь?
—Газификациясь Мордовияса ушетфоль 1960 кизоня. Эста шумордафоль Саратов-Горький магистральнай газопроводть ётафтомац, а эздонза газопроводть-отводть—Саранскяи. Фкя инь важнайшикс Мордовиять тяниень пингонь историясонза арась 1960 кизонь 30 сентябрсь, мзярда эстонь нинге Мордовскяй АССР-ть вчёк столицанц центрасонза Коммунистическяй площадьса региононь руководительхне крьвястезь газонь факелть.
Сембе шарьхкотькшнезь, што МАССР-са экономикать и промышленностть касомац-вииямац, завоттнень и эрямань микрорайоттнень строямасна ашель кода од, перьфпялень аф рдаскофты природнай газфтома. Вешфкссь эзонза кассь. Техническяй прогрессь советскяй кизотнень аньцек ушеткшнесь аськоляма странава. Минь ашеськ сода сембе технологиятнень, конат нолявихть тевс газопроводонь строямста, ашель эрявикс техника, но ушеткссь путфоль. Путфоль аф кржа вий сянкса, штоба сенем «уштомбяльсь» суваль эрь кудти. Васенцекс Мордовияса природнай газсь ётафтфоль Саранскяень завоттненди и фабрикатненди, а сяльде—тяфта жа ошень эряйхненди. 1962-1964 кизотнень газ ётафтфоль Рузаевскяй и Чамзинскяй райоттненди.
70-80-це кизотнень няине, кода Западнай Сибирьста Мордовиять пачк строявсть экспортнай газопровоттне Европав. Эста шарьхкотьфоль газть кинц сяда тов молемац. Мзярда региононьконь лангс шарфтсть мяль союзнай Министерстватне, содавсь—инголе учихть оцю тефт, конатнень эзда ашеме пеле, а, меколанкт, пяк и пяк учсеськ.
—Мзярда газсь сась мокшэрзянь велетненди?
—Ся кизотнень природнай газсь ульсь од ширекс ламоц Мордовиянь эряйхненди. Частнай секторса и лама этажень кудса нолявсь тевс сжиженнай газсь—газобалоннай установкатне, конатнень латцезь газонь плитатненди. Тиемс тя ульсь аф прокс пара, да и пелькс. Баллоттнень пяшкотькшнезь аньцек Саранскяень газонаполнительнай станцияса. Тяконди, ломаттненди эрявсь мумс пинге, штоба пандомс газонкса сберкассав. Транспорт району арнесь аф фалу, сяс ломаттненди сашендовсь вешендемс автомобильхть, штоба ускомс пяшксе баллотт куду. А велень эряйхненди тя ёфсикс стакаль. Тоса стаки ушневсть пянакуттне.
Но, аф ваномок стака 90-це кизотнень лангс, ся пингть, мзярда странась ульсь стака-сталмонь потмоса, республикань руководствать вельде тейнек удалась токамс вастстонза тя пяк эрявикс и важнай тевть. Ся пингть кемокстафтольхть контрактт оцю подряднай организациятнень мархта, конатнень ёткса «Московскяй сварочно-монтажнай трестсь».
1996 кизоня «Газпромть» и Мордовия Республикать ёткса кемокстаф соглашениясь регионца путсь ушеткс отраслять касоманцты-виияманцты. Ульсь аноклаф газификациянь генеральнай схема. Газопроводонь строямста кармаме ноляма тевс полиэтиленовой трубат. Эста кемонь кизоста Мордовияса срояфоль пцтай сняра жа газопровод, мзяра республикать ингольдень историянц пингста. Газификациясь сембода пяк эреклафтовсь 2001 кизоня, мзярда ётафтфоль пцтай тёжянь вайгяльбе газовай сеть. Ся кизоня Мордовиясь лиссь газонь пачфтеманкса 100 процентонь пандомати. 
—Регионть газификациясонза конашкава эрявиксоль республиканскяй      власттнень мархта диалогсь?
—Мордовиянь руководствать ширде инициативафтома, кда сембе проекттнень афолезень кемокста республикань ингольдень Оцюнясь Н.И.Меркушкин и, кда сембе кизефкснень лац-ряц афолезень вана МР-нь Правительствась, конанди ся пингть Председателькс ульсь В.Д.Волков, мезевок афоль лисе. Марстонь работать вельде Мордовиять газификациянь уровенец тячивок лувондови фкя инь оцюкс сембе странаса. Марса минь пяшкотькшнетяма фкя задача: тиендьсаськ Мордовиять мялень шарфтыкс инвесторхненди, но главнайсь—сембе ширде цебярькс сонь тёжятть гражданонзонды эряманкса.
—Кодама тячиень шити газовай сеттнень кувалмосна, конатнень обслуживандасыне «Газпром газораспределение Саранск» АО-сь?
—Тячи «Газпром газораспределение Саранск» АО-ть ответственностень зонанцты канневи 11 тёжянь вайгяльбень кувалмоса газовай сеть. Республикаса эздост строяф пцтай 15 тёжянь вайгяльбе.
—Газсь лувондови экологическяй ширде ару уштомбялень ресурснень эзда фкясь. Кода Мордовиять газификацияц полафтозе республикать экологиянц?
—Афкукс, газопроводсь аф аньцек тиезе регионть эряфонц сяда цебярькс, сон макссь возможность населенияти тарксемс вайме ару кожфса. Природнай газть тевс нолдамда меле Мордовиясь атказась ширде пачфневи питни седть (уголь) эзда. Цебярь шири полафтсь велетнень и ошнень шамаликсна: ульцятнень и перетнень эзда юмасть седень и шлаконь мархне, кожфсь арась ламода сяда арукс, пянакуттнень эзда тяни аф лиси качам и сод. Газификацияда инголе, ётай веконь 50-це кизотнень, Мордовияса уштомбяленди нолневсь тевс 40 тёжянь тоннада лама седь и седень брикет. 2014 кизоня—18-крда сяда кржа! Пенгянь и вирень карьхцендамась 60 кизода инголе пачкотькшнесь 448 тёжянь кубометрас. 2014 кизоня уштоманкса плхтафоль 37-крда сяда кржа!
—«Газпром газораспределение Саранск» АО-ть работац мекольдень пингть сотф энергиянь ванфты  технологиятнень сувафнемаснон мархта. Мезе удалась сатомс тя направленияса?
—Удалась сатомс сянь, што природнай тя ресурссь ноляви тевс грамотнайста ванфтозь и тевонь содазь аф аньцек производстваса, но и башка эрь квартираса. Региононь промышленнай и аграрнай предприятиятне, а стане жа минь специалистоньке, конат пачфнесазь газть населенияти, активнайста нолясазь тевс од технологиятнень, конат лезнихть ламода ванфтомс сенем уштомбяльть. Газть учетонь приборса населениять оснащенностенц уровенец 89,4 процент. Тя пяк оцю показательсь. Природнай ресурсне аф сембе пингс, эряви тянь шарьхкодемс, и малаткшнемс теест сяда ванфтозь.
—«Газпром газораспределение Саранск» АО-сь кизоста кизос касфнесы населениять обслуживаниянц уровененц. Мезть или кинь вельде удалси аф аньцек кирдемс сатфть, но и венемкшнемс коль сяда сери тёкшненди?
—Васендакиге, эрявихть отмечамс цебярь кадратне. Минь предприятиясонк работайхть пяк оцю уровенень профессионалхт.
Тага фкя важнай компонентсь, кона лезни населениять обслуживаниянц уровененц касфнемаса—тя проекттнень эряфс ётафнемасна, конат тёждялгофнесазь клиентоньконь эряфснон. Тага фкя аськолксокс тя направленияса арась Мордовия Республикань эрь районца «Единое окно» службать панжемац. Тяни объекттнень газификациянкса эрявикс документациять оформленияц, техническяй условиянь получамань процессь и проектонь анокламась арасть сяда удобнайкс и занцихть сяда кржа пинге. Саворне минь синнесаськ бюрократизмань психологиять, кона шоряй касомс-вииякшнемс тяниень обществати.
—Улихть нинге кодамовок марстонь   проектт      «Газпром межрегионгаз Саранск» ООО-ста коллегантень мархта? Конашкава кемот сотксне тинь ётксонт?
—Соткст кирттяма сембе кизефкснень коряс. А лиякс аш кода. Минь фкя «тядяньке»—«Газпром межрегионгаз» ООО-сь. Заняфтама фкя тевса—пачфнетяма природнай газ Мордовияв и обеспечендакшнесаськ сонь аварияфтома потреблениянц. Кеман, што минь фкя-фкянь мархта ладяй коллективоньке—оцю семья, кармай аньцек ламолгофнемонза эсь традициянзон, инь цебярь ширензон, корпоративнай марстоньшить, оцю гражданственностть, эряфонь цебярь ширетнень лангс надиямать, мезсь лезды тейнек сядовок надиязь ваномс вандыень шити.
—Фталу лятф 50 кизонь кувалмоса аф простой ки, кодамот предприятиять сяда товолдонь касомань-вииямань перспективанза?
—«Газпром газораспределение Саранск» АО-сь—компания, кона эрязста касы-вииякшни. Цебярь работась и эсь обязательствань пяшкотькшнемась путнесы эсь путксонц Мордовиять социально-экономическяй касоманцты-виияманцты. Республикаса перспективнай газовай сембе проекттне макссевихть эсь пингстонза и цебярь качества мархта. Но тейнек тиема нинге пяк лама. Тячи газопроводонь и газопотребляющай оборудованиянь строямать и обслуживаниять мархта ряцок Обществась пяшкотькшни деятельностень од направленият, конатнень ёткса республикань райоттнень эса водопроводонь ладямась. Кода няеви, минь аф аньцек обеспечендакшнесаськ велетнень природнай газса, но и тиенттяма условият ведьса синь обеспечендаманксост. Лиякс мярьгомс, тиенттяма велеса цебярь эряф—газ, водопровод и пси ведь мархта. Тя работась поладови сяда товга.
Надиян, тейнек аф аньцек удалай кемокстамс сатфть, но и эрь кизоня сатнемс од сатфкст. Минь трудендатама республикать сяда товга панчфокс панжеманц инкса!
 
И.ПЕТРОВА.
Кельгома коллегат, газовай отраслянь
ветератт!
Седи ваксста поздравляндатядязь тинь «Газпром газораспределение Саранск» АО-ть 50 кизонь юбилеенц мархта!
Предприятияньконь пяле веконь касомань-вииямань историянц пингста минь сатоме оцю сатфкст Мордовия Республикать газификацияса, пуроптоме оцю квалификациянь коллектив, а главнайсь—получаме доверия природнай газонь потребительхнень ширде!
50 кизось—тя цебярь пинге, кона няфнесы профессиональнай ширде касоманьконь и инголенк панчсеви оцю кить! Производственнай опытсь, цебярь сотксне партнерхнень мархта, республикань руководствать ширде лезкссь, профессиональнай и корпоративнай инь цебярь койхне, ветераттнень лангс мялень шарфнемань—тянь эзда пуропневи сатфксонь сатнеманьке.
«Газпром газораспределение Саранск» акционернай  обществань сембе коллективти арьсян панчфокс панжема, производственнай од сатфкст, цебярьс надияма и благополучия!
 
«Газпром
газораспределение
Саранск» АО-ть
генеральнай директороц П.И.Автаев.

16.06.2016 №
 
 
 

 
НОВОСТИ
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020  № 48
 

«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин