Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ТЯДЯНЬ-АЛЯНЬ РОДНОЙ КЯЛЬТЬ КЕЛЬГСАЗЬ И ВАНФТСАЗЬ

Журналисттненди сидеста сашендови улендемс кода Мордовиянь райоттнень, ошнень, велетнень, стане и лия региоттнень эса. Аф сёпса, што «Мокшень правдань» сёрмады ломаттненди кафксть сяда пара якамс тоза, коса кулеви и ванфтови тядянь-алянь родной кяльсь. Кепотьксонди, тяфта ульсь Татарстанонь Тетюшскяй райононь Кильдюшево велеса ётафтф мокшэрзянь культурань «Валда шинясь» республиканскяй колмоце фестивальса, коса мокшень валхне марявсть эрь уженяса.
Кода ни пачфнеськ газетаса, Кильдюшевав пуромкшнесть руст, мокшет, эрзят, татархт и лия национальностень ломатть кода марнек Тетюшскяй, стане и Татарстанонь лия райоттнень эзда. Мялезень кеподезе Киртели мокшень велень эряйхнень мархта васедемась. «Валда шинясь» праздникть шумордамдонза меле мокшэрзянь масторста саф делегацияти удалась аф ламос повомс Киртели вели. Мокшень и эрзянь народть Межрегиональнай общественнай организациянц председателец, Н.П.Огарёвонь лемса Мордовскяй государственнай университетть филологическяй факультетонц деканоц, профессорсь Ю.А.Мишанин Киртелив сась аф шавонь кятть, а усксь тостонь школав книгат: валкст, поэзиянь сборникт, справочникт. Татарстанонь мокшень тя велень школаса тяфтама казнетнень фалу учсазь пара мяльса. Синь нолявихть тевс мокшень кялень и мокшэрзянь литературань урокнень пингста, конатнень вятьсыне тевонь содай учительсь-предметниксь Галина Васильевна Абраконова. Сон эсь пингстонза шумордазе Саранскяйса М.Е.Евсевьевонь лемса Мордовскяй государственнай педагогическяй институтть филологическяй факультетонц. Школаса родной кяльть ашезе тонафне, но Галина Васильевнань тядяц и аляц мокшет, сяс содазе сонь аф кальдявста и высшай образованиять колга дипломонь получамда меле од специалистсь мрдась Киртели вели и ушедсь работама тостонь школаса родной кялень вятикс. Валонзон коряс, васенда мокшень кялень и мокшэрзянь литературань урокне ётафневсть васенце класста сявомок нилецети молемс, а тяни синь тонафневихть сембе класснень эса. Аш месть корхтамс, эрь тевсь моли стане, кода сонь ладясак, мзяра вий и эрьгя путат.
Г.В.Абраконова тянь лац шарьхкодьсы, сяс работасонза палозь палы. Сон—I квалификационнай категориянь специалист. Улихть казненза кода Татарстан Республикать, стане и Мордовиять эзда. Азсайне кой-конатнень: Благодарность Финно-угорскяй народонь культурань Поволжскяй центрать эзда, Мордовия Республикань Образованиянь министерствать Почётнай грамотац и Благодарственнай сёрмац, Педагогическяй творчествань Всероссийскяй интернет-конкурсонь участниконь Диплом и стак тов. Галина Васильевна азозе, што аф весть сашендсь мокшэрзянь мастору конференцияс, семинарс, олимпиадас, лама лия пуромксс. Мокшень кялень и мокшэрзянь литературань учительти синь макссихть од вийхть, касфнесазь содамошинзон.
Киртелись, кода ни лятфнефоль сяда вяре, велесь мокшень. И тя пяк лац шарьхкодеви эряензон мархта корхнемста. Родной кяльть содасазь и ванфтсазь кода эряфкшуфне, стане и оттне. Школьникне примсихть участия мокшень и эрзянь кяльхнень и мокшэрзянь литературать коряс межрегиональнай олимпиадатнень эса. Несколька кизода инголе сяськихнень кой-кона работасна лисендсть газетасонк.
Велеса мяляфтсазь и пара валса лятфнесазь М.Е.Евсевьевонь лемса Мордовскяй государственнай пединститутонь филологическяй факультетонь эстонь студенткать, Мордовиянь мокшень стирть Олеся Николаевна Корнеевать, кона пцтай киза работась Киртелинь школаса родной кялень вятикс. Ашезь эвфне, кле, сонь аф вайгяльбетне, аф ся, што тонафнесь эста педагогическяй институтса.
Тетюшскяй райононь тя велеса сидеста ётафневихть национальнай праздникт, конатненди пуромкшни аф кржа инжида. Кайгихть рузонь, мокшень, татаронь, чувашень кяльса морот—няфневи Татарстанца эряй нароттнень культураснон мазышиц, эсь лацонь ширенза и, тяконь мархта ряцок, кемоксни  ялгаксшись, марса улемась.
Нинге весть мрдатама мокшеннеть ванфтоманцты. Тя тиеви аф аньцек кяльть тонафнеманц, но и фольклороньконди, коеньконди-обуцяньконди башка мялень шарфнемать вельде. Киртелиса улихть «Пайгоня»—идень, «Лаймоня»—тонафниень, «Чивгоня»—эряфкшу ломанень фольклорнай коллектифт. Кунардонь и тяниень пингонь моротне, сиде моронятне лездыхть сяда лац содамс народоньконь исяконц и тячиенц. Вдь инголи ламотне ашесть машта морафтома и сёрмадома, а эряфть эсь лацонь ширензон няфнезь моротнень вельде, конатнень авторсна аф содафт тянемс, сяс тяфтама моротне сембе пингс лядсть народнайкс.
Киртелиса вейхкса ульцят, конат кизонь кофнень пяшкотькшнихть идень вайгяльда—сашендыхть ошса эряй стирнятне и церанятне щаваснон, бабаснон ширес. Ламотне кунара мусть ялгат велень ит-тнень ёткста, сяс лац шарьхкодьсазь мокшень кяльть.
Тетюшскяй районць кирди кеме соткст Мордовиять мархта. Шачема ширеса школать аделамдонза меле стирьхне и цератне содамошиснон касфнема сашендыхть Саранскяи—тястонь вусненди. Кой-кит ляткшнихть республиказонк работама.
Командировкаста самстонк прясон коль шарсь тяфтама мяль: «Кда ломанць кельгсы тядянь-алянь кяльть, то ванфтсы сонь, коса афоль эря». Тянь нинге весть тейнек няфтезе Киртели велесь.
Т.АЛЬШИНА.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022