ИТТНЕНДИ НЯФНЕМА АТЯНЬКОНЬ-БАБАНЬКОНЬ КОЗЯШИСНА-ПАРШИСНА

Вов мезе сон пачфтсь минь корреспондентоньконди.
—Шачень-касонь Ковылкинскяй райононь Алькино велеса. Тонафнень Н.П.Огаревонь лемса Мордовскяй государственнай университетонь физико-математическяй факультетса. Пяле кизода меле шарьхкодень, што тя аф монне. Тейне сяда малат гуманитарнай наукатне. Тунь рьвакс, шачсь иднязе. Аньцек колма кизода меле поступань Н.П.Огаревонь лемса МГУ-нь филологическяй факультету. Шумордайне тонафнемать заочна 30 кизоса. Саранск ошень 28№ средняй общеобразовательнай школав сань 2003 кизоня. Васень пингть улень воспитателькс сяс, мес ашезь тонафнев мокшень кяльсь, сон мольсь факультативкс. Эста шарьхкодень, што етафтовсть эряфс кунардонь мяльне-арьсемане. Вдь нинге школаса тонафнемста ульсь оцю мялезе улемс учителькс. Ванондонь эсь тонафтынень мельге, кода синь вятьсазь урокть. Мзярда учительти эряволь лисемс,  вастозост кадондомазь монь. Тянкса мялезе нинге сядонга кепсесь. Арьсень: «Касан—улян учителькс!».
Мокшень кяльсь школасонк тонафневи омбоце класста сявомок котоцети молемс. Ит-тнень мархта етафнян налхксемат и аф кржа. Урокть пингста тонафнетяма сиде моронят, а меле морсесаськ. Лятфнесайне сире пингонь моротнень, конатнень морсезь нинге атяньке-бабаньке. Иттненди кельговсть «Луганяса келунясь», «Эрзянь Полюнясь» и лия моротне. Сидеста тевс нолясаськ «Волшебнай арзянять», коса кочкафт аф фкя лацонь картинканят. Иттненди эряви азондомс мокшень кяльса, мезе рисовандаф картинканятнень эса.
Эрь кизоня етафнетяма мероприятият, коса иттне няфнесазь семботь, мезе содайхть мокшэрзянь культурать колга. Оцю мяльса морсесаськ моротнень, сиде моронятнень, конатнень тонафнесаськ кружокса. Сире ломанень месячникти школаса фалу аноклакшневи ила, коса миньге няфтеськ маштомошиньконь.
Тядязень куломдонза меле арзянзон эса лядсь мокшень лама щам: панархт, сапонят, каркст и лият. Коза тиемс? Арьсень, кда вятян тяфтама урок, то иттненди эряви няфтемс атяньконь-бабаньконь сембе козяшисна. Васенда тиендень стенд, коса няфтьфтольхть сядонгольдень крганятне, пильксне, панархне. Тяда меле етафтонь мокшень оцю мероприятия, коза тердине школань директорть Наталья Алексеевна Ермиловать. Пяк тусь мялезонза концертсь. И тяда меле максфоль башка кабинет, коза панчф музей, и тяни сембе национальнай мероприятиятне етафневихть тоса.
Оцю спасиба мархтон работай учительхненди, конат тяфта жа старандасть козякофтомс музейть, кандсть аф фкя экспонат. Башка спасиба директорти Наталья Алексеевна Ермиловати, кона лездсь сембоса: вешендсь экспонатт, тифоль ремонт. Ашесть ляда ширеса иттне и синь тядясна-алясна. Каннесть панархт, руцят, парьхть, очкт, карьхть, куцюфт и лият. Музейса ули башка уженя, коса няфтьфт иттнень эсь кядьса тиф работасна: някат, картинат и стак тов.
Тяда башка, кафта кизода инголе пуроптф «Пайгоня» ансамбленьке, коса морсихть 10 стирнят. Аф шуроста юватькшнесазь морама и лия школатне кодамовок иластост.
Кеняртьфти ся, што иттнень оцю мяльсна тонафнемс национальнайть. Аф ваномок школьникть заняфшинц лангс, кота или сисем урокта меле сашендыхть кружокс или репетицияс.
Кизефтьсамасть, мезе эряви тиемс, штоба од ломаттне касольхть эсь национальностень кельгикс?
Сембось, тейне арам, ащи родительхнень и учительхнень эзда. Емластокиге синь содафтомат атяньконь-бабаньконь эряфснон-ащефснон мархта. Урокневок вятемат стане, штоба идть эса эвондаль мяль тонафнемс кяльть, фольклорть, историять.