ВЕРОНЬ ПИДИ

Сембось ушедсь курорту срхксеманень эзда.
Ошень собезста гайфтсть тейне телефонца, кле, кода инвалидонди, курорту путевка мяленьке максомс. Кда мяльце молемс, кантт справка, што косонга аф работат. Вов мон и молень ся справкать инкса эсь домоуправлениязонк. Сувань эстеенза начальникти Семён Семёнович Котелков ялгати. Ва, мярьгонь, санаторияв путевка максыхть. Шумбрашизень, няк, еран хоть цютькада петемс. Справка анай, што косовок аф покодян.
—Справка?—кяжиясь лангозон домоуправсь, мянь якстерь пятнат лиссть кели, путьку шамазонза.—Кона кудса эрят?
—Вага тязк, вельхкссонт, кефкиеце квартираса,—корхтан, а монць арьсян: «Мес тяшкава кяжияф? Пади, аф пингстонза сань?»
—Котоце кудса?—шорязень арьсеманень домоуправть тяни ни сяда сетьме вайгялец.—А фамилияце кода?
—Плетнев фамилиязе. Иван Иваныч Плетнев. Эрян тя кудса эстоньбере, кодак аньцек строязь.
—Плетнев, мярьгат? Шичас ванцаськ. Ну-кать котоце кудстонь книгать!—ювадсь сон панжада кенкшка секретаршанцты, од аваняти, кона ащи приемнайса.—А тон озак,—шарфтсь тейне,—ату фкя пильге лангса аф теждя ащекшнемс,—и, роди ужяльдезь, няфтсь сельмоса инголенза ащи сери стулть лангс.
«Ва кодама цебярь ломанць,—арьсень озамшовор,—а мон мярьгонь: кяжи, эльбядень, маряк».
—Эряй,—азозе секретаршась, мзярда кандозе книгать,—вага, котоненза, квартирань    пандоманксовок    мельганза шума аш.
—Пара. Сяда ламос тон тейне аф эряват,—мярьгсь аваняти, тага пшкядсь тейне:—Кодама справка, мярьгат, эряви? Коза?
—Мон азыне ни. Собезсь веши, ёрасы содамс: работан косонга али аф.
Семен Семенович срмазе конянц, плдоргофтозень кумбря сельмонзон.
—Собезсь, мярьгат? Санаторияв ератанза кучемс? Тя пара. Но... к сожалению, стама справка, кодама синь вешихть, минь максомс не можем.
—Ся кода стане?—ашень шарьхкоде мон.
—А ва тяфта. Коста минь содасаськ: работат тон косонга или аф?
—Но тейне мярькф тяста сявомс стама справка! Мон вдь, афкукс, косовок аф работан. Инвалиттне, няк, ведьгемонь ветие кизоса тушендыхть пенсияс.
Семён Семёнович кирендезень покаряв лафтувонзон.
—Верондан, верондан, сембось ся, пади, и стане,—мянь келептезень инголен пукшу кядензон,—пади, прокс аф работат косовок, и лездолень, и лезттама, аньцек ва кантт каготкя. Сембоц аф оцю каготкя. Шарьхкодьсак?
—Шарьхкодьса, но кодама каготкя?—моньге ни сашендсть кяжне.
Семён Семёнович нотфтазень лафтувонзон.
—Кантт справка ингольдень работама вастстот,—мярьгсь сон.
Мон лятфтайне теенза, што инвалидонь артельсь, коса работцень сапожникокс, тяни аш—мастерскоенза етасть КБО-в.
—Вов, вов, тоза и архт. Чать, артелентень документонза ванфтовсть, сятнень коряс максыхть тейть справка.
Савсь молемс тоза. КБО-нь начальствась валнявок изь аза—сёрмадсь справка. Мон кокольфса—меки домоуправленияв. Семён Семёнович лувозе справкать и кувакаста таргазе ваймонц:
—Эх и ёжуфт ся КБО-са! Пожалуйста: «Сон КБО-нь системаса аф работай». Да тяфтама справка кажнайсь максы. Эряви, штоба улель тяштьф: «Сон тя пингть косонга аф работай». А синь мезе?..
—Эрь, коста, ина, тейне сявомс стама справка?—лаказевсь пицеманцты верозе, кядезе трнатфтсь ни байдекозень эса.
—Ожу. Тон тят кецякоткшне,—бта обжавсь Котелков ялгась.—Якак милицияв. Тоса, брат, семботь содасазь. Кда ни, афкукс, косонга аф работат, тяштихть тейть справка.
Мезе тият? Савсь молемс милициявга. Ужялель мяндемс курорту путевкать.
Стане-стане, мярьгонь, ялгат, посабляда. Няк, кодама палас повонь. И семботь азондыне. Милициянь начальниксь лац, алясь, примамань. Сермадолень мон, кле, тейть стама справка, да ва аш праване сянди.
—Архт меки. А кда тага кичкоряма кармай, эста тийхть тяфта,—и тонафтомань, мезе тиемс сяда меле.
—Ва вдь кодапт ломаттне!—шувтозе прянц домоуправлениянь начальниксь.—И семботь эсьстост ряфцодьсазь. Лиянь пряс каладоза—аньцек аф монь. Ну ладна ина. Тяштть заявления.
Кизефтине, мезе тоза тяштемс?
Отвечай:
—Тяштьк сянь, што анат справка домоуправленияста сяс, мес косонга аф работат. Азк песа, што аф васькафнят. Ну, а сяда тов тонць содасак...
Котелков путозень кядензон тумонь шранц лангс, нежедезе эзонза унду мяштенц и стакаста таргазе ваймонц.
Заявлениять мон сермадыне тозк, максыне видеста Семён Семёновиченди. Сон лувозе и корхтай:
—Пара. Сувак ванды. Нинге кой-кинь мархта тяса эряви корхнемс.
«Вай!—мянь эводень ня валонзонды,—аф тага козонга кучемс мялец?»
Но Котелков ялгась сяда тов козовок ашемань кучсе, аньцек мярьгсь:
—Содасак, кодама квартираса домкомонте Захаров эряй? Вов архт—кучк сонь ширезон.
Мезенди эрявсь домкомоньке Семён Семёновиченди, содайне аньцек омбоце шиня, мзярда сувань ширезонза справказень инкса. Ванан: сянь алу тяштьф: «Домком Захаров... Утверждаю—домуправ Котелков».
«Ва тя аля!—арьсень колганза,—аф пря сонь, а самогонкань панема аппарат. Лиянь верть лакамозонза пидесы, а сонценнеть анцяйнянь пес ванфтсы». Ёрань шамазонза тянь азомс, но эряскодонь собесу.
А тоса корхтайхть: «Аф эряви ни. Заведующайсь тяфтак мярьгсь максомс». И мрдафтозь. Эрь, тняра верозень Котелков пидезе инксонза. Тяни коза тиема? Кяжда ерайне сязендемс. Вдруг бта кати-кие тошкась пилезон: «Ожу, катк, ванат, да ярашты. Ськамонза, што ли, Котелков? Пади, нинге косовок токадихть сонь ялганза?»