Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

“ПИЗЕЛ ПОРАСА ТОЛГЯРЬМАСТ”

Мокшень поэтть И.Н.Кудашкинонь шачема шистонза 80 кизонь топодемати
Иван Кудашкин! Коса сон аньцек ашезень лувонда стихонзон—велень клубса, паксяса, заводса, университетса. И келемкшнесть стихонзон эса шачема ширть пефтома луганза, паксянза, виренза, Мокша ляйть вельхксса зарясь, и марявсь сонцень седиень комболфоц сембе тя мазышить няемста.
Ули кода мярьгомс, Кудашкинонь Мокша ляец шуди аф козовок лияс, а видеста Ока ляйти, Есенинонь ляезонза. И ули мокшень поэтть сотксоц рузонь инь кельгови поэтть мархта. Кудашкин лувондозень Есенинонь стихонзон нинге Мокшень Мазканя шачема велесонза школаса тонафнемста, сядонга маласькодсь теенза университетса тонафнемста. И мзярда сонць ушедсь сёрмадома стихт, мярьгат, кядьта вятезе Есенин и няфнезе теенза, мезе и кода сёрмадома. Лувондозень Иван Кудашкин Сергей Есенинонь «Закружилась листва золотая», «Нивы сжаты, рощи голы», «Разбуди меня завтра рано» стихонзон, и сонцьке мушендсь кинят-яннят паксятненди, вирьхненди, семботи, мезсь келемсь тяштю менельть ала шачема ширьса. Сонга эсь лацонза няезень и шить, и ковть, и тяшттнень, эсь лацонза няфнезень ломаттнень, конат эрясть и эряйхть Модать лангса эрь шинь заботаса-тевса.
Афоли эста и шачсь Кудашкинонь поэтонь смузю вайгялец, мзярда сон азозе шачема ширенцты: «Мокшавань котфокс паксятне тонь ацафт, синь сетьмешисна конашкава келькф! Лугатне келемсть акша локстинь пацякс, покойснон ванцазь капатне веньберьф». И васенцеда кулеськ эздонза, кода «Масторсь ваймяй, пря пезонза стясть келунь рощат и ков валда весь, тяшттне мастору прайхть—кенерьф марьхть. Масторсь ваймяй, сонь ононза пархт».
И панчсь Иван Кудашкинонь эсь киц оцю поэзияв, кошардозе азомс эсь валонц эряфть смузенц колга. Китяма минь! Местема шачеме?
Эвондасть поэтть и поэманза. И эвондась эсост и велень эряфсь, и ошеннесь. И няфтсь тейнек ломатть, конат сокайхть-видихть, конат заводса покодихть, кит содасазь, мезе стамсь стака пингста фкя-фкянди лездомась, мезе стамсь ялгаксшись и кельгомась. Лемдсь поэтсь стихт и поэмат и алятненди, конат, эряфонь аф ужяльдезь, тюрсть немецонь фашисттнень каршес.
А Есенин стаки серьгядезе. Ульсь Иван Кудашкин и Константинова велеса, коса памятникста ваны Есенин шачема ширенцты, Ока ляенцты. Россиянь поэттне лувсть инголенза стихт, азондозь, кода сувась седиезост сонь поэзияц, кода поладозь сонь вайгяленц.
Мрдась Иван Кудашкин Саранскяи, коса работась «Мокшень правда» газетать редакцияса, и оцю мяльса сёрмадозе «Пизел пораса толгярьмаст» поэманц Сергей Есенинонь колга. Поэмать ушетксстокиге панжадонь седихть пшкятькшни теенза: «Есенин! Мархтот ёран мон кунара седикс-ваймокс корхнемс, тяконьбес толкавамс, эсь ширдет кулемс-марямс тяшкава Россиять кельгсак мес?»
Поэмась аф ёмла, эсонза азондови Сергей Есенинонь эряфста ламось: идькс пингоц, тядяц-аляц, Шура сазороц, велень ялганза, Москуву самац, содаф поэттнень мархта васетькшнеманза, афкуксонь ялганза и сят, кит каясть лангозонза сельме и кадондозь ськамонза, мзярда теенза ульсь стака.
Кудашкин ёразе няфтемс сяньге, кода Есенин вешендсь стихонзонды седиень токай валхт:
Мяленза поэттьке
 ёндолкс налхкихть,
Кеняртьксонцты
тесна одонь мяштсь,
Мушендсыне тёждяста
 ся валхнень,
Конат тяда инголе
ульсть кяшфт.
Менельть смелста
лемдезе сон пайгокс,
А ковть эзда пайгонь
 кяль сон няйсь.
Мороц моронц мельге
 шачендсь кайгозь,—
Кагод лопась эреклаль
синдейст.
Арьсетяма, Иван Кудашкинонь стихонза и поэманза, марнек творчествац кармайхть эряма мокшэрзянь литератураса фалу, кода и лия содаф поэтоньконь, лездыхть лувихненди няемс и марямс эсь мастороньконь мазышинц и виенц, сядонга пяк кельгомс сонь. Мялезе тянь азомс стихса:
МОРОНЬ ЛАТЦИХТЬ
Вярьгак моразь
шачем ширть поэттне.
Но, ужяль,
кой-конатне тусть тоза,
Коста оду аф
мрдават вестьке.
А юкстамс ня брадоньке
аш кода.
Аш Иван Кудашкин,
 Девин аш Илья,
Аяш ётксонк Малькин
Александр.
Эряфкшу поэтонь
плямась тя
Мзяра нинге мазы мора
 кандоль!
Тянивок синь мороснон
 учсазь
Паксятне, лугатне,
пиже вирьхне
И эрь ошса, велеса кульсазь,
Кода морасазь
синь мокшень стирьхне.
Вяри кеподсть
шачем ширть поэттне,
Аф юкставихть
вайгяльсна сяс вестьке.
Славондазь
Мордовиять, Россиять…
Моразеви тяфта
нинге кие?
Моронь латци плямась
 аф юмай—
Сяда вяри вайгяльсна
лийкстайхть.
Шачихть од поэтт
минь шачем ширьсонк,
Кода шачихть панкне
пиче вирьса.
А.ТЯПАЕВ,
 Мордовия Республикань Народнай писатель.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022