Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Культура

Мордовия Республикань Заслуженнай артисткась Надежда ПАЛАТКИНА: «Кельгсайне ломаттнень, эсь профессиязень, перьфпяльть и кеняртькшнян сянди, мезе макссь тейне Шкайсь»

Мордовиянь Заслуженнай артисткать Надежда Палаткинать лемоц республикасонк содаф пяк лац. Стака мумс стама ломань, кинди афоль кельгов сонь творчествац. Лисемок сценать лангс, артисткась васенце минутаста ни салсесы ваныть мяленц седиста-ваймоста моли ляпе вайгяленц, эсь мазышинц и публикать инголе прянь вятеманц мархта. Сон, мярьгат, нолни ши валдоня—лямбе вайме и паронь арьси, эрь кулхцондыть-ваныть мархта мушенды эрявикс кяль, кажнайть токасы седиенц. Природать мархта максф асушись и оцю трудса-вийса сатф профессионализмась лездсть артисткати сатомс Мордовиянь фкя инь цебярь морсиень лемть.
Сят, кинди удалсесь корхнемс Надежда Палаткинать мархта, лац содасазь, кодама сон пара вайме, панжада и простой ломанць. Азонкшнемс творческяй киса эсь сатфксонзон колга артисткась аф пяк кельгсы, мезсь тага весть няфнесы сонь скромнайшинц. Но аф кунара минь корреспондентоньконди удалась васьфнемс-корхнемс республикань эряйхненди фкя инь кельгови морсить Надежда Палаткинать мархта и артисткась оцю мяльса отвечась сонь кизефксонзон лангс.
—Надежда Васильевна, васендакиге мялезе кизефтемс, кода удалси тейть фалу тяфта лац няфтемс? Шять, ули мазышинь, одксшинь кодамовок секретце?
—Секрет кодамовок аш. Мон весялан ломанць, киндивок кальдяв аф арьсян. Шять, тянь эса тевсь. Койсон, мзярда ару ваймоце, эсонза аш кяж, эста шамаське кармай валда. А нинге эрявихть кельгомс ломаттнень, эсь профессияцень, перьфпяльть и кеняртькшнемс сянди, мезе макссь тейть Шкайсь.
—Тонь пяк мазы вайгяльце. Тя тейть природать казнец или морамань асушись етась тядятнень-алятнень эзда?
—Вайгяльсь сась тейне наследствас коре. Мазыель вайгялец бабазень, морсекшнель тядязе, лац лисенди морамаса дуганнень. Монга нинге емланяста няендине эсь прязень оцю сцена лангса ащикс. Мяляфтса, стяшендонь ваномать инголи, кядезон сявондень мезевок микрофононди шарфты и морсекшнень. Школаса сидеста сявонькшнемазь концертс лия вели, райцентрав. Мон и нинге кафта стирнятне улеме ведущай морсикс. А школать аделамда меле тядязе вятемань И.П.Кирюковонь лемса музыкальнай училищав.
—«Росичи» морамань театраса кунара морсят?
—Пуроптомстонза васенце шистокиге. Коллективти курок топоди комсь кафтува киза.
—А тяда инголе коса морсекшнеть?
—Училищать аделамда меле сявфолень ведущай солисткакс «Умарина» морамань и кштимань ансамбльти. Колма кизот тоса морсень, меле етань Пензенскяй филармониять видеса «Беседы» казачай коллективти. Ламос тоса ашень кирдев, пяк лажаткшнень шачема ширети, тядязенди. Кизошкада меле ни  мрдань меки Саранскяи. Тяса васьфтине Государственнай филармониянь директорть Н.Серкинонь, кона тердемань арамс ведущай солисткакс филармонияса. А мзярда 1994 кизоня пуроптфоль «Росичись», шоворень сонь коллективозонза.
—Кельгома мороце ули?
—Мялезон сире пингонь моротне, лама вайгяльса морамась.
—Надежда Васильевна, азонтт семьяцень квалма. Иттне эсь лацот вайгялюфт?
—Мирдезень мархта (сон отставкаса майор) касфттама кафта шабат. Ярослав тядде етась кафксоце классти, а Вероникась мольсь васенцети. Иденьконь вайгяльсна, мярьголень, аф кальдяфт. Ярославсь, кепотьксонди, хорсовок морси, но толнякс палома морсемань тевти эсост аф приметнян. Тя, виденцян, колсесы мялезень. Синь, улема, мирдезень ширекс тусть.
—Кода полаце ваны профессияцень лангс, мзярда сидеста сашендови тушендомс гастрольс?
—Тянь ширде мон павазу аван. Шкабавазсь макссь тейне пяк шарьхкоди мирде.
—Коса ваймосемацень кельгсак?
—Шачема велесон—Глушковаса. Аньцек тоса ваймаван и ронгонек, и ваймонек. И кодамовок моря аф эряви.
—Малаткшнихть кочкаматне. Молят избирательнай участкав вайгяльцень максома?
—Обязательна. Монь аф кадондсамань озадонь седихть ащема страназень, республиказень сай пингсна. Кодама ули сай пингонь эряфоньке—кочкамс кажнайти эстейнек. Эрь вайгяльсь эрявикс. Молемс кочкаматненди—эрь ломанть долгоц.
—Мезе должен лисемс шиньботмоста, штоба илять тон мярьголеть: «Кодама цебярель тячи шись!?»  Мезсь казенди тейть кенярдема?
—Васенцесь, штоба сон афоль ета шавос. Кда удалась тиемс кодамовок пара тев, эста шись удалась.
—Пряцень лувондсак павазу ломанькс?
—Да. Ули кельги и кельгома  мирдезе, стирнязе и церанязе. Сембе шумбрат-тазат. Ламоняс нинге эряль тядязе. Вов тянь эса и павазозе.
—Спасиба!
О.ЕВДОКИМОВА.

15.09.2016 №35
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин