Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

В Госсобрании РМ

ПАРА КИС, ГОСУДАРСТВЕННАЙ СОБРАНИЯНЬ ДЕПУТАТТ!

Ётай недялять ульсь Мордовия Республикань котоце созывонь Государственнай Собраниять васенце сессияц, конань работаса примасть участия Мордовия Республикань Оцюнясь В.Д.Волков, республикань Правительствать Председателец В.Ф.Сушков. Стане жа сессияс тертьфтольхть муниципальнай райононь администрациянь оцюнятне, министрхне, организациянь и ведомствань руководительхне, массовай информациянь средствань представительхне.
Заседаниять панжезе Мордовиянь Центральнай избирательнай комиссиянь председательсь А.Косов. Сон нюрьхкяняста пачфтсь сянь колга, кода республикасонк ётась пяк ответственнай кампаниясь—сембе уровенень депутатонь кочкаматне. Кода азозе Александр Косов, комсь нилие кандидат кочкаф партийнай спискатнень коряс и тняра жа одномандатнай округова. Нильгемонь ветие депутатскяй мандатсь (48-ть эзда) сатсь «Единая Россия» партиянь представительхненди.
Сессияса депутаттненди эрявсь кочкамс Мордовия Республикань Государственнай Собраниянь Председатель. «Единая Россия» фракциясь азозе тя вастти В.В.Чибиркинонь кандидатуранц. Сонь колганза азозень эсь мялензон республикань Оцюнясь В.Д.Волков. Улемок мекольдень вете кизотнень парламентонь вятикс, республиканьке оцю аськолкст тись социально-экономическяй    вииямань кизефкснень решандамаса. Тя пингста няеви сатфкст сатфт промышленностьса, велень хозяйстваса, строительстваса, няевомшкада кассь средняйста зарплатась. Оцю мяль шарфтфоль спортивнай и лия объектонь строямати.
Госсобраниянь Председателень постти кандидатурась азф. Тяни эрявсь голосовандамс инксонза. Тайнайста вайгялень максозь депутаттне эстеест вятикс кочказь В.В.Чибиркинонь, кона благодарностень валхт азсь тяшка оцю довериянкса и надияфтсь, што сон, кода и тяда инголе, сембе виензон, содамошинзон, опытонц путсы сянкса, штоба сяда товга республикасонк эреклаль-виияль экономикась, лац-ряц решандакшневольхть социальнай ширень кизефксне.
Сяда тов эрявсь решандамс кизефкссь Госсобраниянь Председательти заместителень кочкамать коряс. Кода содаф, тяда инголе парламентонь оцюнять заместительдонза ульсь ниле. Тянь коряска эвондасть полафткст. Тяни эздост катф аньцек кафта. Кит синь? Депутаттне заместителькс кочказь В.В.Алехинонь, кона занцезе ни тя должностть ветеце созывонь Государственнай Собранияса. Омбоцесь, кинь инкса максозь вайгяльснон народть кочкафонза—тя Саранскяень Веселовскяй округста 27№ школань директорсь И.М.Москаев.
Депутаттненди эрявсь кемокстамс Госсобраниянь Советть. Сембоц кефкие ломань сувафтфоль Советти. Пуроптфт Госсобраниянь комитеттне, конада кота.
Российскяй Федерациянь Федерациянь Советса, кода и тяда инголе, Мордовия Республикань законодательнай собраниянь представителень полномочиятне максфт В.В.Литюшкинонди. Сон ни лама киза аралакшнесыне республиканьконь интересонзон Российскяй Федерациянь Федерациянь Советса.
Депутаттненди эрявсь кочкамс и Мордовия Республикань Счётнай палатань председатель. Кандидатурать азозе  Мордовиянь Оцюнясь В.Д.Волков. Тя—Н.С.Ларьков, кона мекольдень пингть занцезе тя должностть. Владимир Дмитриевич нюрьхкяняста пачфтсь ётаф кинзон и, конешна, казнензон колга, конада сонь аф кржа.
Сяда тов республикань Оцюнясь благодарностень валхт азсь ветеце созывонь депутаттненди и арьсесь котоце созывонь Госсобраниянь одс кочкафненди марса и пяк активнайста работамс сянкса, штоба сяда товга кельгома Мордовияньке сатнель оцю сатфкст эрь тевса.
Н.КУБАНЦЕВА.

06.10.2016 №38
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин