Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Обратная связь (Газета - Читатель)

«ЁТАФ КИЗОТНЕ «МОКШЕНЬ ПРАВДАТЬ» ПОЛАФТОЗЬ АНЬЦЕК ЦЕБЯРЬ ШИРИ!»

Наталья Тюлюкова, Саранск ошень эряй, магазинца мишенди:
—Кельгома газетазень морафнеса пяк кунара, эрь номеронц учендса оцю мяльса. Сембодонга пяк мялезон «Минь семьяньке» страницась, коста ули кода мумс мялень салай информация.
Медицинань рецепттнень, советтнень-меснень лувондсаськ ялганень мархта. Арьсян, «Мокшень правдась» тя стама газета, кона тушенды сембе мокшетнень мяльс, аф ваномок кизоснон лангс. 
Тядде «Мокшень правдати» топодсь 95 киза. Ётаф кизотне полафтозь сонь аньцек цебярь шири! Пцтай век эряй тя изданиясь, а етаф кизотне сонь одкстоптозь: лама тюсонь страницатне, жанрань, информациянь ширде козяшись ламода цебярьгофтозь сонь. Эсь ширден арьсян редакциять коллективонцты творческяй сяда товолдонь сатфкст. Катк «Мокшень правдась» вятьсы историянц нинге аф фкя век и кизоста кизос арси сяда мялень салайкс и кельговикс!
* * *
Татьяна Китаева, Рузаевскяй райононь Мокшень Пишлянь эряй:
—«Мокшень правдась», арьсян, арась кельгома изданиякс ламоц мокшетненди. Лядсть фталу ся пинкне, мзярда ошень ульцява аськолямста ломаттне виздсть тядянь-алянь кяльса корхтамаснон. Тянь петеманц инкса аф кржа тись «Мокшень правдась». Лопанянзон лангса фалу сембе ширде няфневи республиканьконь эряфоц, башка мяль шарфневи национальнайти, корхтави кяльть и литературать питнишиснон квалма. Оцю мяльса морафнесайне сембе материалхнень. Пяк пара, мес латцевихть и кемоксневихть соткст ширеса эряй мокшетнень и эрзятнень мархта. 
«Мокшень правдась»—кельгома газетазе! Катк сон стаки кеняртьфнесыне лувихнень мялень салай информацияса и кизоста кизос касы тиражец!
* * *
Людмила Кечкина (Трач), Инсарскяй райононь Вярдень Лухма велень эряй:
—Мокшень газетать эрь номеронц лувондса педа-пес. Тяфта тиендян аф аньцек мон. Пара мялезон, што ули и лисенди пяк эрявикс тя изданиясь. Мзярс мяляфтса прязень, фалу кельгса мокшень кяльть, марян оцю гордость сянкса, мес мокшаван, шачень-касонь Мордовияса.
Ульсь пинге, мзярда мокшень кяльти оцю мяль ашезь шарфнев. 2001 кизоня тонафнень Н.П.Огарёвонь лемса Мордовскяй госуниверситетса филологиянь факультетса. Улендсь стане, што мокшэрзятне виздсть эсь кяльснон эзда—ломань еткса корхнесть рузкс. Таколдонь тянкса. И макссень эстейне кизефкс: «Мес тяфта? Мес визттяма эсь кяленьконь, культураньконь эзда?» Весть тя кизефксть максыне профессорти, мокшэрзянь литературать коряс преподавателезти Михаил Герасимович Имярековонди. Сон варжакстсь минь—студенттнень лангс и вов мезе мярьгсь. «Сембось, ялгат, полафты, сембось арай эсь вастозонза. Кармайхть нолявома од книгат, фильмат, конат улихть лемтьфт кяленьконди, культураньконди, коеньконди-обуцяньконди». Михаил Герасимович занятияс каннесь мархтонза «Мокшень правда» газета и «Мокша» журнал. Ся пингста ётась аф фкя киза. И тянемс «Мокшень правдась»—кельгома газетазе. 
Мялезон, кода серматкшнесазь материалснон мокшень журналисттне. Оцю сюкпря теенть, газетаса работайхне! Лама кельгидонт Вярдень Лухмаса, целайнек Инсарскяй районца.
Т.ВЛАДИМИРОВА.

06.10.2016 №38
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин