Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Как жили и живут мокшане

МОКШЕНЬ СВАДЬБАСЬ. МЕЗСЬ ВАНФТОВСЬ ТЯЧИЕНЬ ШИТИ?

Свадьбась—тя инь мяляфтови шись семьять эряфса. Кунардонь пингть свадебнай обряттнень ульсть эсь лацонь смузьсна. Колгаст тейнек азондсь Ковылкинскяй райононь Цятна велень эряйсь Мария Павловна Резова. А теенза эсь пингстонза илать колга пачфтсь сонь тядяц Прасковья Андреевна Максакова.
—Рьвяяфтомась и рьвакс максомась ащесь аф синцень од ломаттнень, а синь родительснон и радняснон эзда. Рьвянять кочкамста мяльс сявондезь стирть семьянц козяшинц, стирть тевонь кельгоманц и шумбрашинц. Эстонь свадьбась ульсь кода кафта ширень тюрема: цёрать ширец и од рьвянять.
Илась ушеткшнесь рьвянять ладямаста. Мзярда цёрать родителенза кочксесть рьвяня, пуропнезь раднятнень и кулхцонкшнезь мяльснон-арьсемаснон. Фкясь эздост кучсевсь рьвянять шири. Сяда сидеста—крестнай тядясь и алясь или акась и креснавась. Корхтамась ушеткшнесь кода-бди ичкозде, а меле валом ётафневсь эрявикс темати. Рьвянять родителенза, катк и пароль мялезост, васенда атказакшнесть максомс стирьснон. Ламоцне кувалгофнезь ладямань илать, штоба колганза содаль сяда лама ломань. Приданнайкс тядятне-алятне сидеста макссесть стирьснонды щапт, а тяда башка, кодамовок жувата. Тяда меле рьвянять шири пуромкшнесть сембе раднясна и эрь сайсь каннесь мархтонза кши. Куду тумста, синь тяфта жа сявондсть мархтост кши, кона пидефоль рьвянять кудса. А ладяфокс од ломаттне лувондовсть аньцек эста, мзярда синь «симсазь». Тяда меле стирсь ушеткшнесь свадьбань казнень аноклама, юкстамок ульцяв якамать колга.
Свадьбань шить ладямац
Цёрать родителенза кафта-колма радня мархта сашендсть стирть шири, штоба арьсемс свадьбань шить.
Од рьвянять кудса свадьбань койхне-обуцятне ушеткшнесть раднятнень самдост меле. Аннезь рьвянять ямда. Меле ушневсь стирень баня. Тяда инголе рьвакс туйсь ораткшнезе сёралонц и тядясь шяярезонза сотнекшнесь лента. Сяльде од рьвянянь арзяти марсезь приданнаенц и стирсь ляткшнесь пращандама ульцять мархта. Кудснон ваксс пуромкшнесть велень стирьхне и цератне. Цератне симневсть винада, а стирьхненди казендевсть суркст. Илять рьвакс туйть тядяц аннезень ялганзон, конат лездсть свадьбати казнень анокламаса. А сонць ладяфсь казендсь эрь стирти якстерь лентаня.
Шобдава, свадьбань шиня, церать раднянза пицесть свадьбань пярякат, конатнень эзда кажнайть ульсь сонцень лемоц. Инь оцюсь макссевсь рьвянять алянцты. А рьвянять кудса пидевсь пяряка, кона макссевсь церати—теенза мярьгондсть «овонь пяряка». Пицевсь и курник, конань потмоса ульсть пинепт.
Мзярда кудатне сашендсть рьвянять кудонц инголи, сонь раднянза и ялганза селгондозь кенкшнень, анцесть ярмак. А тя пингть од рьвянясь ульсь шабрань кудса, коста вятнезь стирть церать ваксс. Тяда меле тядятне-алятне од ломаттнень бславсезь и тушендсть церькаву. Венцямда меле синь васьфнезь кшиса-салса, ёрясть лангозост сероса.
Омбоце шиня ванондозь, кода рьвянясь мольфтьсыне кудъётконь тефнень. Пидефнесть пачат и макссесть од лем.
Мезе свадьбань кунардонь койхнень-обуцятнень эзда ванфтовсь тяниень пингть?
 Койсон, аф сембось. Тяниень пингонь од ломаттне кельгомаснон вешендьсазь-васьфнесазь синць. Тядятне и алятне тянди кядь ёфси аф путнихть. А вов ладямань илась ванфтовсь, но аф фалу и аф оцю пяльксоц. Кепотьксонди, ошса тяни ни раднятне аф якайхть стирть шири, семьятне содафнихть фкя-фкянь мархта башка васедемста. Стирень «ладяма» и «симома» тяни якайхть аньцек велеса, рьвянянь кяшемась васьфневи тяфта жа аньцек велень свадьбатнень эса. Тяниень пингонь свадьбаса атяньконь-бабаньконь эзда лядсь, кода корхнихть, «выкупсь», рьвянять рамамац. Стирть раднянза оцю мяльса арьсихть и ётафнихть аф фкя лацонь конкурст, штоба тапарямс цёрать рьвянять сявомста, «васькафтомс» кядьстонза сяда лама ярмак. Ашезь юма-ара родителень бславамась, оттнень кшиса-салса васьфтемась, загсста лисемста сёроса лангозост ёрямась и стак тов.
Но кеняртьфти ся, што аф сембось юкставсь. Койсон, оттненди эряви эреклафнемс атяньконь-бабаньконь койснон-обуцяснон, сувафнемс эряфозонк кунардонь пингонь илатнень. Вдь эсост минь историяньке, а сяс и козяшиньке.
Л.НИКОЛАЕВА.

06.10.2016 №38
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин