https://mokshapr.ru
10.06.2022
 |
Архив | |
| апрель | ||||||
|---|---|---|---|---|---|---|
| 2024 | ||||||
| пн | вт | ср | чт | пт | сб | вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
 |
|
«МИР—ЭРЬ СЕМЬЯТИ И КУДТИ!»—Фагим Фатихович, кода тон сать Шкайти кемамати? И мес арать священнослужителькс?
—Мон шачень-касонь Аксеново велень религиознай семьяса. Монь атянь-атязе Идриссь пяк цебярьста содазе Коранть, сяс и ульсь почетса лия велеряйхнень еткса. Бабазевок содась лама молитвада арабскяй кяльса, конатненди нинге идькс пингстон ушедсь тонафтомон. Но мзярда мон сонь кизефнине: мезень колга корхтави тя молитваса, теенза ашель мезе азомс. Сяс мес сон ашезе сода арабскяй кяльть, конаса тейнек максф Шкайть эзда Коранць и молитватне. Сяс, мзярда Россияса панчсть исламскяй духовнай учрежденият, мон ушедонь эсост тонафнема Коранть и арабскяй кяльть. И ся пингста сявомок мон содайне ни, кодама киге тейне молема. Тонафнемок Бугурусланонь Исламскяй институтса, а тяда меле Медина ошень Исламскяй университетса, мон педа-пес шарьхкодень, мес именна тейне эряви кандомс Шкайть валонц татаронь народти. Сяс, мзярда татаронь старейшинатне 2008 кизоня тердемазь Мордовияв и кочкамазь муфтийкс, мон пяк кенярдень тянди. И ся пингста сявомок мон тонафтан мусульматтнень эса кельгомс аф аньцек фкя-фкянь, но и лия религиянь ломаттнень. Эрямс мархтост Шкайть мяленц и валонц коряс, кона тонафты эсонк аньцек цебярти! Шкайть лезксонц вельде мон тяфта жа тонафтан Мордовиянь и Россиянь лия мусульматтнень эса кельгомс Родинаньконь, Россиять. Сяс мес, монь койсон, сембе минь, разнай религиянь ломаттне, васенцекс—россияттама! Лиякс мярьгомс, Российскяй государствань граждаттама. И аньцек тяда меле ни—тя или тона религиянь и национальностень ломаттяма! —Фагим Фатихович, Россияса исламть вешфксонзон коряс мусульматтне эряйхть тежянь киза ни. Тейнек улель пара содамс, сонь кона ширенц эса кирдихть Россиянь мусульматтне? И мезьса тя ширесь аф стама омба масторонь исламскяй ширетнень эзда? —Тяса эряви азомс, што исламсь, кода и христианствась,—тя мировой религият. И синь аш национальнай эсь лацонь ширесна. Исламса сембе тефне вятевихть Коранть и Пророкть валснон коряс. И тя Валсь—фкясь и сякось любой национальностень ломанти. Но тя Валть ломаттне кой-мзярда толкавасазь эсь лацост. Мярьктяма, исламса тяда инголи ульсть и тячи улихть богослофт, кит эсь лацост толкавайхть Коранть и Мухаммед пророкть валснон эса. Россияса жа татарско-башкирскяй сообществась Х векста сявомок, эряй и кемай Шкайти Абу Ханифа богословть толкованиянзон коряс. Именна сон васенцекс пуроптозень Мухаммед пророкть мялензон-арьсеманзон эсь богословскяй трудсонза. Сяс минь, Россиянь мусульматтне, тяда инголивок и тячи мольхтяма верань кить ланга сонь мялензон-арьсеманзон коряс. Аньцек тяса нинге эряви шарьхкодемс: Абу Ханифада башка, ульсть и улихть лия богослофт, кит тяфта жа тонафтыхть эсь лацост исламти мусульматтнень эса. Аньцек минь, Россиянь мусульматтне, кода и тяда инголи, кирттяма Абу Ханифа богословть толкованиянзон ширеснон эса. —Фагим Фатихович, кода минь содасаськ, исламонь радикальнай ширень кирдихне тячи воявайхть Сирияса и кой-мзярда эвондакшнихть Севернай Кавказонь регионца. Тонь койсот, мезе эряви тиемс тячи исламскяй священнослужительхненди, штоба ня ломаттнень валхтомс радикальнай исламонь ки лангста? —Валсь, идеятне, сяськовихть аньцек Валса! Сяс, монь койсон, исламскяй священнослужительхненди эряви шарьхкодевиста пачфнемс од ломаттненди Коранть и Мухаммед пророкть валснон-мяльснон. А синь корхтайхть: эряда сембе ломаттнень мархта ладязь! Кода корхтай Коранца Шкайсь, кие сявсь эсь кядезонза оружия и сонь вельденза ерай лия ломаттнень сувафтомс эсь веразонза-кемамазонза, тиенди кальдявста—аф Шкайть мяленц коряс! —Фагим Фатихович, а кода тинь тячи латцевихть тевонте Мордовиянь православнай митрополиять и республикань лия религиознай конфессиятнень мархта? —Кда корхтамс тя кизефксть колга Россиять масштабса, эста эряви азомс, федеральнай уровеньца лама киза ни вяти эсь тевонзон эса Межрелигиознай Советсь. Тоза сувсихть Россиянь сембе религиознай конфессиянь представительхне. И тоса минь лидероньке сашендыхть фкя мяльс сембе религиознай кизефкснень коряс. Сяс Мордовия Республикаса минь православнайхнень и лия религиознай конфессиятнень представительснон мархта марстонь вийса кемокстатама сембе ширдень соткснень эса российскяй нациянь нароттнень еткса, конат тячи эряйхть Мордовия Республикаса! Лиякс мярьгомс, «Согласие. Порядок. Созидание.» лозунгть вешфксонзон коряс! —Фагим Фатихович, тейть, кода священнослужителенди и ломаненди, кодама питнец Народонь Единствань шить? —Духовнай илада башка, Народонь Единствань шись—тейне оцюдонга оцю ила! И тейнек сонь, монь койсон, эряви етафнемс сатомшка мазыста и келиста. И етафнемс сонь эряви тяфта, монь койсон, аф аньцек Мордовия Республикать столицаса и региононь райцентраса, но и эрь поселкаса и велеса! —Сюкпря, Фагим Фатихович, пара мяленкса и арьсеманкса. В.НЕСТЕРОВ.
|
|
НОВОСТИ | |
