МАЗЫХТЬ МОКШЕНЬ СТИРЕНЬКЕ

Старошайговскяй райононь Сире Теризморга мокшень велесь содаф мазы вайгяль, национальнайти венеми, моронь морай, коень-обуцянь ванфты мокшень аванзон и мокшень стирензон мархта. Сембе тя козяшись етни тядятнень эзда иттненди, а аф пртцеви «арзяс» и аф юксневи. Сире Теризморгаса тяфта ладяф пцтай эрь семьяса. Сидеста тостонь мокшень стирьхнень ули кода няемс районца, республикаса етафневи пуромкснень эса национальнай щамса. Кизефксть лангс: «Кие тонафтонзе минценнеть ванфтома?», ответсь уленди тяфтама: «Шачень-касонь Сире Теризморгаса».
Тяфта тевсь ащи «Мазыхть мокшень стиреньке» конкурсоньконь тячиень участницанц Татьяна Петровна Чевтайкинать мархта.
«Шачемас коре мон Сире Теризморгаста. Идькс пингста пяк кельгине тядязень работама вастонц—велесонк Национальнай культурань центрать. Арьсян, инь мала ломанезе и тонафтомань коеньконь-обуцяньконь ванфтома. Тядязе, Анастасия Васильевна Чевтайкина, тянивок морси Сире Теризморгань хорса»,—ушедозе эсь колганза азондоманц Татьяна корреспондентоньконь мархта корхнемста.
Валонзон коряс, шачфтыец сявондезе стиренц эрь-кодама фестивальс, концертс, лия пуромксс. Таня кепотьф мяльса ванондсь кштийхнень, морайхнень лангс, а сяльде сонцьке ушедсь няфнема прянц тяфтама тевса. Лама киза мельцек якась Сире Теризморгань Национальнай культурань центрав кружокс. Тоса тонафтозь сюреса сёрмадома, ожнаста крганянь кярьксама. Школаса тонафнемста варчсезень виензон стихотворениянь тяштемаса. Меле синь лисендсть «Мокшень правда» газетаса и «Якстерь тяштеня» идень журналса. Татьяна Чевтайкинать аф весть тернезь Саранскяи од сермадыень семинарс, няфнезе прянц ламоц пялькстомаса. Мекольцетнень эса лисендсь сяськикс, занцесь вастт.
«Оцю сюкпря мялезе азомс мокшень кялень и мокшэрзянь литературань тонафтыти Л.А.Сокоровати, кона тонафнемань велень школаса и лездсь тейне тиемс ня аськолксонень тяштемаса»,—мярьгсь Татьяна Петровна.
Школать шумордамдонза меле мокшень стирсь поладозе тонафнеманц Саранскяйса М.Е.Евсевьевонь лемса Мордовскяй государственнай педагогическяй институтса филологическяй факультетса. Ушедсь студентонь эряф. Татьяна шарьхкодезе, што тя вузса ули кода няфтемс пряцень сембе ширде, сяда тов аськолямс творческяй кинява-яннява. Башка мяль шарфтсь вожатаень педагогическяй отрядти. Тя тевсь «сувась» ваймозонза, сяс Т.Чевтайкина эрь кизоня якай вожатайкс кода Мордовиянь, стане и целайнек Россиянь идень лагерьхненди.
«Арьсян, шабатнень ёткса: мархтост корхнемста, прябаласнон содамста, теест лездомста мзярдовок аф марясайть кизотнень ётамаснон, мезсь кошарттанза од тевонь тиемати»,—азозе Таня.
Конкурсонь участницаньке тонафни мекольце—ветеце курсса. Практикань ётама вастокс кочказе родной уженять—Сире Теризморгань школать. Татьяна вяти мокшень кялень, рузонь кялень и литературань урокт, кемокснемок содамошинзон практикаса. Тя тевсь мялезонза.
«Эсь прязень сай пингть няйса аньцек учителькс, сяс мес эряфозень ёран сотомс шабатнень мархта работати. Тиса семботь, штоба стирнятне и церанятне кельголезь мокшэрзянь культурать, родной кяльть, ванфтолезь тянь семботь»,—тяфтама валса шумордазе Таня корхтаманц.
Меля стирсь етась переподготовкань курст, сяс теенза нинге ули кода работамс идень садса. Но, кода корхнихть, сембось инголе!
Арьсетяма Татьяна Чевтайкинати оцю сатфкст эрь тевса! Катк эряфс етафтовихть сембе арьсеманза!