Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

В Госсобрании РМ

«МАРСТОНЬ ВИЙСА СЯСЬКОВИ СЕМБОСЬ»

28 декабрьста ульсь Мордовия Республикань котоце созывонь Государственнай Собраниять ветеце сессияц, конань работаса примасть участия Мордовиянь Оцюнясь В.Д.Волков, Правительствать Председателец В.Ф.Сушков, республикань Правительствать членонза, исполнительнай властень оргаттнень руководительсна, республикань Оцюнять администрациянц, Государственнай Собраниять и Правительствать аппаратснон ответственнай работниксна, массовай информациянь средстватнень представительсна и лият.
Кемокстаф шинь повесткась. Сяда тов депутаттне кярьмодсть шинь повесткати сувафтф кизефкснень коряс работати. Сембоц эрявсь ваномс сисем кизефкст. Васенцекс корхтамась мольфтевсь «2016 кизонди Мордовия Республикань республиканскяй бюджетть колга», коза тифтольхть полафткст, мезсь сотф федеральнай бюджетста поступлениятнень мархта. Тя кизефксть коряс кулхцонтфоль Государственнай Собраниянь бюджетть, финанснень и налокнень коряс комитетть руководителец Светлана Киселева.
Кода содаф финансовай кизоть итогонзон эзда, Мордовияса 2015 кизоть коряс сяда ламолгодсть собственнай дохоттне, мезсь лездсь пяшкодемс арьсефть карьхцнень коряс. Коза нолявсть ня средстватне? Васендакиге синь водендафтольхть граждаттнень эрямань условияснон цебярьгофтомс, социальнай кизефкснень решандамс, заработнай платанди. Финансовай лезкс максф экономикать социальнай ширенц кемокстамс, «Юбилейный» микрорайонца школать, вельхтяф футбольно-легкоатлетическяй манежть, музейно-архивнай комплексть сяда тов строямаснон коряс тевонь мольфтемс. Стаки аноклавсь 2018 кизоня футболса Миронь чемпионатонь матчнень ётафтомаснонды.
Мордовия Республикань Государственнай Собраниять котоце сессиясонза кой-кона закоттне примафтольхть федеральнайхнень мяльса кирдезь. Полафткст тифтольхть социальнай кафта закоттненди. Нят «Населениянь башка категориятнень социальнай ширде ширеснон кирдемаса мератнень колга» и «Семьятнень, коса касфтовихть итть, ширеснон кирдемаса дополнительнай мератнень квалма».
Сянь колга, кода работасть депутаттне 2016 кизоня, итокт тись Мордовия Республикань Государственнай Собраниять Председателец Владимир Васильевич Чибиркин.—Властень сембе оргаттнень эса работась,—мярьгсь сон,—мольфтевсь фкя-фкянь шарьхкодезь, конструктивнайста, мезсь лездсь сяськомс финансовай ширдень сембе сталмотнень и сатомс няевишка результатт социально-экономическяй ширде вииямань кить лангса. Государственнай Собраниянь депутаттненди васенце вастса ульсь и ляткшни видешись, панжадокс улемась и прозрачностсь. Тяфта, кле, кармай улема и 2017 кизоня. «Марса тейнек сяськови ламось»,—мярьгсь В.В.Чибиркин.
Шинь повесткати сувафтф сембе кизефксне ванфт и корязост примафт эрявикс решеният. Тянь мархта Мордовия Республикань котоце созывонь Государственнай Собраниять ветеце сессияц шумордазе эсь работанц.
Н.КУБАНЦЕВА.

12.01.2017 №1
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин