ТАМАДА

Од кизонь карша оцю-нясь кочказень работ-никонзон кабинетозонза. Мзярда сембе озсесть и сетьмость, мярьгсь: «Од кизось, ялгат, чакай кенкшезонк. Тейнек эряви арьсемс, кода сяда лац сонь васьфтемс, весяласта ётафтомс тя илать. Ламотне вдь сайхть аф аньцек ярхцама-симома, но и ваймоснон эшентьфтема вестевок аф аделсеви тефнень эзда, кштима-морама. Сяс сембонди мярьголень лацкас арьсемс и азомс эсь мялентень».
—Гуляндамась—аф работамась... А наряжаф кузнять ала ялга ёткса хуш коса пара,—васенцекс макссь вайгяль снабженияста алясь.—Арьсян, аф пара ётафтомс ськамот тя веть ки лангса или учсезь кодамовок вокзалса.
—Кие арьси лиякс?—бта планерканц эса вятсь оцюнясна.
—Ваймама кудсонк, Василь Филипыч, ламоксть ни гуляндаме, аф весть Од кизотьке васьфнеськ. Мезе-бди лия ваймось веши,—мярьгсь мишендема отделста мазы аванясь.—Пади, кодамовок кафес мольхтяма. Тоса музыкантт морайхть и вастське сяда оцю, ули коса кштимс-морамс. Магнитофон коряс тячи кивок афи кштишенди.
—Но тоза, матаняй, и ярмактовок эряви о-о-о!—мянь конязонза кеподезень сельмованоманзон бухгалтерсь.
—Содаф, кодапт питнетне кафеса... А Од кизонь малать ёфси поталакти кеподихть,—бухгалтерснон мяленц кирдезь лиятневок.
—Ой-ой-ой, ярмакнень лятфтазь! Аф ашуятада... Кизоти весть можна няфтемс пряньконь цебярь вастсовок.—Аванять крьвязсть щёкапрянза и тага сядовок цебярьгодсь шаманяц.—Тоса тамадавок ули,—поладозе сон.—Верондамасть, мархтонза скушна аф ули.
—А мезе, ялгат! Цебярь мяль азсь Эльвира Васильевна. Мес аф тердемс тамада ширезонк?! Тя ули самай сонць. Моньге ваймафтсамань. Мзярс можна тейне эрь иласта перьфкант шаромс? Лишнай цярка аф симоват.
—Тя лия тевсь,—согласиндасть оцюняснон мархта.—Но коста сявомс ся тамадать?
—Компьютерста... Тоса кодама аньцек информация аш.
—Аф эряви компьютерста,—шерьхкозевсь стулть лангса бойка замсь.—Исяк шабразень васьфтине Якшам Атянь щамса. Шнафтсь пря, што якась площадьса наряжаф кузть перьфке пуромф народть весялгофнема. Кда эряви, тердьса... Аньцек сави аф ламня пандомс тянкса теенза.
Кода ладязь, стане и тисть. Эсь куднязост алятне стяфтсть куз, пряц мянь поталакти токай. Аватне наряжазь.
Омбоце шиня пуромсь марнек коллективсь, кой-кона алятне састь рьваснон мархта. Кие аф сувай—васендакиге кельксесы цифторды наряжаф кузть. Кизонек-тялонек пиже шуфтсь тячи аруяфнезе кудботмоть. Валда мяльхне пяшкотькшнезь ломаттнень ваймоснон, кенкшть фталу кадозь эрь шинь стакатнень-сталмотнень. «Ату кри-и-изис... Ату са-а-анкцият! Катк Европаса трнатыхть эздост. А минь кода-аф кода пингстостка эрятама. Шкайсь мархтонк»,—озамбачк шрать ваксс мярьгсь бухгалтерсь.
Кодама аньцек ярхцама и симомбяль ашель тяса! Няевсь, ладоль лиятненьге мяльс. Мака панчфонь тюсса палсть аватнень шамасна, пеедсть кургсна. Алятне мес-бди ушедсть шовсема кядьснон эса, мярьгат, эендасть. И синьге бухгалтерть мельге кармасть озсема шратнень перьф.
Мекольцекс рьваснон мархта сувасть Василь Филипыч и замоц. Ашель аньцек тамадась—Якшам Атясь.
—Коса?—кизефтсь колганза оцюнясь.
—Мярьгсь, саян...—отвечась замсь.—Сай, вакска аф ётай, Василь Филипыч. Кяскавсь казнетнень мархта кядьсонза,—поладозе потмарняста.
Ётась ниле-вете минута. Ломаттне озсесть, сетьмость. Учсть, мезе азы оцюнясна. Но сявок мес-бди ашезь кашторда. Алятне ванцть-ванцть и ушедсть пяшкотькшнема цяркаснон сяпиняда.
—Ялгат,—лоткафтозень синь Василь Филипыч,—учтама аф ламняс. Тердеме тамада. Аньцек мес-бди кирневи.
—Кяскавоц, улема, стака и кодавок аф пачфтеви. Афоль сав киндивок каршезонза молемс,—пеедезевсь замсь.
Мярьгат, кулезе, корхтайхть колганза: панжевсь кенкшсь и акша шиньфть потмоста эвондась Якшам Атясь. Сембе эрекласть, аватне ушедсть цяпама кядьснон. Коллективсь ёрась гуляндамс, киньге ашель мялец сяда ламос учсемс.
«Якшамда мзяра сувафтонь?»—бта ароптсь сон прянц эса.
Летьке шиньфсь ваксканза кармась срадома кияксть кувалма.
—Аф эендатама, Якшам Атя. Тяса пара, валда и лямбе!—ювадсть каршезонза.
—Кда стане, то сембонь Од киза мархта!—кеподезе акша оцю варягас наваф кяденц.
—Спасиба, Якшам Атя!
Алятне меки фатнесть сюлекатненди, мянь поталакти ляцендсть шампанскяйть панчсемста панксне.
Якшам Атясь путозе кузть алу кяскавонц, ётась теенза аноклаф вастти шрать ваксс. Алонза ёрдазе эйзюрокс акша байдеконц. «Ялгат, сетьмода,—мярьгсь сон.—Макстама вал Василь Филипыченди».
Мзярс азорсь азондсь цебярь валхт коллективонцты, сонга пяшкодезе цярканц, малазонза ускозе салат мархта шаванять. «...Копордатама сянкса, штоба сай кизоське сембонди улель цебярь»,—кулезень оцюнять мекольце валонзон.
Сай кизоть, цебярь эряфть инкса алятне кепсезь цяркаснон, аватне рюмкаснон... А тамадась тя пингть валхтозе шамафксонц и фкя копорксса потмаксти шамдозе сонценнеть. Сяпинясь юкссезень сембонь кяльснон, ломаттне весялгодсть. Пеетькшнемань вайгяльхне и тарелкатненди куцюса и цянгоняса чакаматне пяшкодезь кудботмоть. Симсь-ярхцась эсь шранц ваксса Якшам Атясь. Кода корхнихть русне—«пауза затянулась» и сяда сидеста ломаттне кармасть варжакснема ширезонза.
—Валерий Николаевич, пади, ашезе юкста, мес тяза сонь тердезь?!—аф мяль вельде мярьгсь Василь Филипыч замонцты.—Тейнек тяза тамада эрявсь, кона маштоль корхтама да ломаттнень мельге шарома.
Замсь стясь, ярхцамбачк нардазень руцяняса ваи трванзон, кядензон и аськолдась тамадать шири.
—Ялгат!—А тяни макстама вал Валерий Николаевиченди. Валерий Николаевич, народсь учи: аст, пожалняста, мезевок!—мярьгсь тамадась.
Замське поздравляндазень Од кизоть мархта аф аньцек шра ваксса ащихнень, но и радняснонга, сембонди арьсесь шумбраши. Сембе тага дружнайста кеподезь цяркаснон, симсть шумбрашинкса. Тага чакасть тарелкатненди куцюфне, цянгонятне. Шуваняста тринькиесть аватнень кядьса рюмкатне. Корхтасть сембе, но аньцек аф тамадась. Сон каязе лангстонза Якшам Атянь щамть—псилгодсь, и тяни аделсесь саразонь рястаф пильгть эса.
Ванондомок сельме алга лангозонза, Василь Филипычень крьвязсь шамац, ливоськодсь коняц. Тамадась кундазе сонь сельмованфонц, стясь вастстонза:
—Пара ломатть!—порембачк мярьгсь сон,—аш ли киньге тяса микрофоноц? Соньфтомонза тя шумть потмос вайгялезе ваяй.
—Ваносте, ваносте, кодане якстерьгодсь тамадать шалхкоц!—кулевсть вайгяльхть.—Шамафкссонза рисавафсь аф тяшкава якстерь.
—Тихо!—ювадсть фталце шратнень эзда.—Тамадась корхтай!..
—Пара ломатть,—пшкядсь сон лангозонза ваны ломаттненди,—аньцек музыкась ляпопнесыне казяма ваймотнень, аньцек музыкась кошардсамазь фкя-фкянь кельгома. Тя мороть казьсаськ аватненди.
Сон комась магнитофонть вельхксс, кайги музыкась пяшкодезе кудботмоть.
Аватне фкя-фкянь мельге кармасть стяшендома вастстост, молембачк петнесть платьяснон эса, эряскодсть лисемс кштима.
—Валера, коста вешить тя прохвостть? Архт прважак тяста, ату монць коза-коза кучса,—мярьгсь замти оцюнясь.
Замсь мольсь тамадать малас и кармась тошкама пилезонза.
Аватнень мельге стяшендсть алятневок. Эрь ваймось вешендсь воля. Тоза тердсь весяла музыкась. Аф ладоль аньцек Василь Филипычень мяльс, ськамонза ащесь шрать ваксса и ванць рьванц мельге.
—Василь Филипыч,—токазь сонь лафтуда. Вакссонза ащесь тамадась.—Валерий Николаевич мярьгсь, кле, кяжиять лангозон. Но мезенкса? Виде вайме ломанян, сяс видеста азса: ярмакнень пялеснон, конатнень максость тейне, анокан мрдафтомс теенть. Аньцек тят шумна.
—Тонць хуш арьсят, мезе корхтат?—ёфси крьвязсь оцюнясь.—Ломанькс эняльдян, урядак тяста шотцень добром.
—Василь Филипыч!
—Ворть сельмингольден! Тят позоря Якшам Атять лемонц!
Азорсь нюрьхтясь оцю рюмкас сяпиня и симозе. Шава рюмкать путозе шрать лангс и тусь кштийхнень ёткс.
Кода тусь тамадась—кивок ашезе няе. А мзярда ёрась казендемс казнеса работниконзон, кузть алда юмась казне мархта кяскавське, бта масторть пачк тусь.