М.П.Девятаевонь шачема шиста 100 кизонь топодеманцты

ПОДВИГОЦ МЗЯРДОНГА АФ ЮКСТАВИ
Мяляфтса, 1965 кизонь июльста армияста сань отпускс. Сувсень «Мокшень правдав», коса работань армияда инголе, меле повонь Мордовскяй книжнай издательствав. Тоса писательсь Сергей Кинякин няфтсь тейне шуваня книганя. Лангозонза якстерь «сязентьф» букваса тяштьфоль: «Побег из ада». Букватнень фтала няевсь сялги проволока. Мзярс ванондыне-тиине книгать, Сергей Кинякин азозе: «Тянь тяштезе легендас суваф мокшень летчиксь Михаил Петрович Девятаев. Тяфтама документальнай произведения издательстваньке, койсон, нинге ашезь ноля. Сявк лувомс. Солдатонди пяк ладяй книгась».
Эста ни Михаил Петровичень содайне шамаска, кулендине азксонцка фашистонь пленцта самолетса ворьгодеманц колга. Сон 1961 кизоня сашендсь Зубово-Полянскяй педучилищав, коса эста тонафнень.
Сяка илядня аф шта ваймонь апак тарксек, койсон, сельмонь апак чипоряк, лувине книгать. Ся веня од-пара прясон ламос ашень матодов. Арьсематне и лятфнематне, конатнень срхкафтозень книгась, увнасть прясон мешвелекс. Аф кржаль дивандамадовок. Михаил Петрович лама сермады Заксенхаузен    фашистскяй ингольдень концлагерть колга, коса няйсь-кирдсь пяк лама нужада и сярятьфта. Да вдь тя концлагерсь ГДР-нь Ораниенбург ошкаса, коса служан. Сон ёфси Берлинть маласа. Михаил Петрович аф весть паннесь-вальсесь воронкат-лоткт Мессершмитонь испытательнай аэродромсонза, коса тяни служан радиопередающай центраса. Тоса ащесь военно-транспортнай самолетонь полконьке. Вай, кода шоворькшнихть мирса-масторса китне. Аньцек лангаст якайхнень аф фкя лацот щамсна-карямсна. Вятнисновок прокс лият.
Тага лятфтайне 1965 кизонь апрельть 20-це шинц. Тя шиня вчёк Очижисель. 19-це апрельста илять кучемазь нарядс—дежуряма радиопередающай центрав. Тя прокс колазе мялезень. Содайне: 20 апрельста Заксенхаузен ингольдень концлагерьса етафтови оцю ила—топоди 20 киза, кода тяста воляс нолдафт пякстафне. Сайхть делегацият марнек Европаста, тяконь лувксса СССР-ста. Солдатонь радиось пачфтезе: делегацияса ули и М.П.Девятаев.
Иляденьберьф арьсекшнень, кода повомс илати—дежурствазе аделави мянь илять Очижинь васенце шиня. И тяфта арьсень, и стане. Мезевок прязон ашезь повонда. Поздна илять ни сатфтыне смелшизень, звонянь ротнаеньконь Поветкин капитанть кудозонза, эняльдень, штоба мярьголь дежурямс веньберьф—кафта сменат. Пяк ни, мярьгонь, оцю мялезе повомс илати, васедемс М.П.Девятаевонь мархта. Кие стамсь Девятаев, азондомс ашезь эряв—авиаторхне эсь ломаньцнон содасазь. Капитанць ламос мзнась трубкати,—так-так-так—такиесь. Меколи ляпомф вайгяльса азозе: «Ладна,  мордвин, ладна, писатель, кяляцямайть (мордвинкс и писателькс лемнемазь ротасонк. Саранскяйста служаме сисемнек, а мокшесь ськамонолень). Аньцек понедельникста етафтат ротати политинформация тя илать колга».—Валонза пацят макссть.
Шобдава ласьконь ротав, щайне параднай мундирозень, катонь нолсема вастокс пиндолгофтыне кямонень, пунянень, шназень бляшканц. Кемонь частса Заксенхаузену молихнень дежурнай машинась сявозень ошева, Ленинштрассева, мокшекс мярьгомс Ленинонь ульцява. А монь и Саранскяйста ялганень Володя Жичкинонь, Толя Кутузовонь и Коля Фешинонь кати-мес ужяльдемазь замполитсь, озафтомазь эсь машиназонза.
Пачкодеме ингольдень комендатурать кудонцты, конань кучкаса оцю букваса тяштьф: «Арбаит мах фрай» («Трудсь максси воляши»). Сялги проволокать ужеванза равчкоткшнихть сторожевой оцю вышкатне. Территорияв сувамста васьфтемазь пялес калада крематориянь трубась. А сяда тов... сельмоне сокоргодсть. Ломаньда... ломаньда—пефтома. Ламотне акша-равжа китьксу щамсот, прясостка тяфтама котфста вазьнят, мяштьсост номерхт, кой-кинь пильгса шуфтонь колодкат. Ктморяйхть китьксуфне фкя-фкянь, палсихть, авардихть, рахайхть, лапайхть лафтус, тага авардихть. Тяфта комсь кизода меле васедсть ингольдень узникне. Аньцек кодама кяльса корхтамат аф кулят—английскяй, французскяй, рузонь, поляконь, чехонь, словаконь, норвежецонь, болгаронь, венгрань и стак тов.
Муськ советскяй делегациять. Оцюнякс теенза ульсь пильгфтома генералсь Зотов, кона войнань пингть тя концлагерьса няезень сембе аф няематнень, но ашезе ми прянц фашисттненди. Кизефтине М.П.Девятаевонь колга. Генералсь азозе, кле, аш пингоц, сай сяда меле. Кизефнемазь, кода служатама. Меколи пшкядсь алянь валса: «Сынокт, якада, ванода, кулхцондода и седи ёжес путость сембе няйфть-кульфть. Сянкса и кучедязь тя странав Родинась, штоба оду фкявок ломань масторлангса афолезе няе сянь, мезе савсь кирдемс тейнек». Нят ульсть афкукс алянь валхт.
И туме ванондома-кулхцондома. Сувафтомазь кинозалу. Кармасть няфнема документальнай кинофильма, кона моли 25-шка минута. Васенце кадратнень эвондамста коцоргодсть пря шяяреньке: качады крематорийть трубац, юрнай пянакудонь кургти кшнинь носилкаста веляфневихть пакарю пстерды ломатть. Пянакудть фтала бункер. Тоса китьксу щамса цильф лаца ломаттне амолясазь и марасазь шуфтонь кядьгос ломанень кулуть. Сон ускови фатерляндонь паксятненди почердамс.
А вов ломаттне фкя-фкянь мельге сувсихть баняв, кафелень стенатнень пиндолфсна, краттнень эзда шамацень няйсак. Вов тяни сюдофне эжихть, оргалдсазь лямбе ведняса ронгснон. Сявондсть тазиконят, уромсть краттненди. А ведь аф шуди. «Банясь» пяшкодсь ломаньда. Кемоста пякставсь эчке кенкшсь. Поталакть ала решеткав варяста општадсь яду-тюжя качамня. Ломаттне эстокиге кармасть пяярема кияксу, паннесазь кядьлапшса кургснон и шалхкснон. Вай, а кода мянцевихть, бта электрическяй ток пачкаст нолдасть. Сельмосна штрялксокс лиссть. Вай, конашкава келихть вайгяльфтома кургсна. Колма-ниле минутат, и сембе сетьмость. Киякссь ацаф ловажаса. Синь мекольдень кисна вяти ряцок ащи крематорийти.
А вов фкя сюдофть вятьсазь алу моли кинява, пачкодсь стенакс мараф пенгя полянатненди. Лоткафтозь, пильгонзон пякстазь кияксти шавф шуфтонь колодкатненди, сялдазозонза щафтсть килькш. Кафта эсэсовецне кармасть шарфтомонза блокть. Вай, вай, сюдофть ронгоц таргави резинакс. И вов ни сязьф пряц аф кенерьф тиклакс прась пильгалонза. Сельмотневок исть кенере коневомс.
А вов ару комнатаса ащи клещанзон мархта акша халатса палачсь. Сувай китьксу щамса ломанць, озафтсы креслати—кальхц! кальхц!—таргасыне золотань пеензон, марасыне кядьгоняс. А сюдофсь тя пингть лаподсь ни кияксти ёжефтома.
Ваттама кино, коцордыхть киськоньке, трнатыхть плманжаньке, кальхциихть пееньке, аф кирдеви летняманьке. Минь, щумбра-пара ломаттне, аварттяма. И аф визттяма сельмоведеньконь эзда.
...Отпускста ялганенди усконь кафта казнет: «Побег из ада» колма книгат и пяле чемодан цебярь сигаретат. Мекольцетне ГДР-са питнихтельхть. Кафта книгатнень максыне лувомс Саранскяйста ялганенди, фкять кадыне аруняста ванфтомс. Лувозь курокста. Эстоньбере ротасонк служайхне тейне малаткшнесть кода альняканди фкя эняльдема мархта: «Макск лувомс». Пачкодсь кулясь офицерхнендивок. Тернемань ротнайське.
Весть обедта меле ротась пуромфоль таргама васту. Канцелярияста еткозонк лиссь ротань командироньке капитанць Поветкин и—видеста тейне. Венептезе книгать, люпштазе кядезень и корхтай: «Ну,—азозе фамилиязень,—тяни тейть ули кода марямс гордость «мордвин» лемцень инкса. Вов кинь мархта тезкат! (Фронтса М.П.Девятаевонь позывноецоль—«Мордвин».) Лия тяфтама ломань масторлангса аш». Тяда меле «мордвинць» арась эсь лацонь паролькс марнек гарнизонца. Сашендсть книганкса солдатт, сверхсрочникт, офицерхт лия подразделениятнень эзда, кафкса кизонь школаста учительхть (ротаньке тоса шефоль, а мон, педучилишань аделайсь, шабатнень мархта етафнень урокта мельдень занятият), анцезь книгать гарнизононь офицерскяй библиотекавга.
…«Адста ворьгодемать» лувомда меле весть тердемань замполитоньке майорсь Орловский. Кабинетсонза ламос ванць лангозон, меле пеедезевсь, кизефтемань:
«Михаил Петрович Девятаевонь шамас содасак? Вестьке няендить—аш?»—Азозе; аф Девятаевонь, а Михаил Петрович Девятаевонь.
«Няендине весть,—мярьгонь.—Сашендсь педучилищазонк. Кулхцондыне азксонц адста ворьгодеманц колга».
«Вов и пара,—лаподезень кядьлапшензон шранц лангс.—Ванды ули марстонь политинформация—кафцьке ротатне пуроптовихть. Вов тоса и азондат легендас суваф землякцень колга».
«Майор ялгась!—эводезь потань.—Мезе мон азондан?! Сонць книгасонза семботь азондозе...»
«Монга лувине книгать,—ушедсь ляснемон майорсь.—Сембе лувсазь... А мялезе тя ломанть колга содамс сяда лама. Кепотьксонди, кода якай, кода корхтай, кода полафни шамац азондомста... Мяляфтк, коллега (майорсь мзярда-бди ульсь журналистокс, сяс газетав тяшнихнень лемнезень коллегакс), тя ломанть эса сембось питни, нльне лафтубрясонза пулень паморькскясь.—Етась тов-сей кабинетова, поладозе.—Нинге вов мезе... Тяштть цебярь рецензия «Советскяй Армияв» (ГСВГ-нь—Группа советских войск в Германии—командованиять и политуправлениять органцноль). Лацкас арьсек, азк тейне, ши максфтан... Ули нинге фкя экземплярце?—няфтсь М.П.Девятаевонь книганц шири, кона шранц лангсоль.—Ули!.. Тя пара. Эряви максомс Заксенхаузенонь музейти... А тянь кадса эстейне... Питни лятфнембяленди... Макссак?
Коза молят—макссак.
Курокста тяштень рецензия, кучине. Пингонь етазь—вчек дежурянь радиопередающай центраса—ласьксь полконь диспетчерсь сверхсрочниксь Рудольф (гарнизонозонк аф кунара етафтозь Витебскяйста, коса служась пара ялгазень, кона меле арась содаф журналистокс—Вася Каргинонь мархта).
«Тонь, мордвин, аф генерал щеняце?—ювадсь порог лангса.—Аде ласькозь, ичкоздень связень линиява звоняйхть...»—Молембачк азыне: генерал щенязе видекс ульсь—Шишкарев Михаил Николаевич, тядязень альнякац, но сон кулось Свердловскяйса 1963-це кизоть песта.
Сявине трубкать, азыне киян. Корхтась «Советская Армия» газетать культурань и искусствань отделонц начальникоц. Азондозе:
«Получаськ рецензияцень. Лувозе аф фкя ломань—тусь мялезонк. Редакторсь пантфтсь гонорар инь оцю ставкать коряс. Но...—козкстась,—газетаса рецензиясь аф лиси, сяс мес ГСВГ-нь библиотекатнень эса тя книгась аш. Лувихне кармайхть вешемонза. Мезенди синь дразнямс?—Корхнеме-тиеме, начальниксь азозе:—Ня шитнень частезонт моли редакциястонк ломань. Макск теенза М.П.Девятаевонь книганц. Мяленьке лувомс, сонць редакторсь эняльдсь».
«Дык... мык…—ушедонь.—Визькс кучемс эстеенза редакторти—пяк ни шовафт-вадентьфт лопанянза. Лама кядьге етась...»
«Тон, дяряй, аф содасак, мес шобдалготкшнихть солдатонь щапне? Салу ливозть эзда... Редакторське тянь лац содасы... Тят пеленде, книгацень мрдафтсаськ... Тяшнек сиденяста... Пераце штыкцень лаца вестевок тяза шямония»,— меколи азозе.
Виде, ломань редакцияста сашендсь. Максыне книгать и... оду ашине няе. Но кулендине: лувозь аф аньцек журналисттне, но и ставкань генералхневок. Сонць, кле, эстонь командующайсь армиянь генералсь Якубовский анцезе. Вов и лядсь кати-кинь кядьс.
Фкя шиня замполитоньке тердсь переводчик, сявомань Заксенхаузенонь музеи. Суваме видеста директорть кабинетс. Улема, инголькиге мархтонза корхнесь телефонца.
Васьфтемазь сери коськана немец. Шяяренза шаржуфт, сельмонза бта уле кулуняса почердафт. Куртонди (тяфта лемоцоль. Кати-коза тиине ся пингонь блокноткязень, фамилиянц юкстайне) 70-шка кизоль. Азондсь эсь колганза. Коммунист. 1933 кизоня, мзярда Германияса властти састь фашисттне, пякстазь Заксенхаузену, коста лиссь аньцек 1945-це кизонь апрельть 20-це шистонза—воляс сембе нолдафнень мархта. Гитлер аф аньцек еразень тиемс эстеенза урекс марнек масторлангонь эряйхнень, кельгозе симомс эсь народонцка вердонза. Но ляпиясь.
Меле Курт азондсь эсь книганц квалма, конань эса сермадсь лама киза. Эсонза мялецоль няфтемс фашизмать веры ликонц и ваймонц аф ширде ванозь, а эсь кудонь (Германиянь) тефнень вельде.
Книгать каземста кизефтине Куртонь: содазе или аш М.П.Девятаевонь концлагерьса улемстонза? Курт азозе, кле, Заксенхаузенть ортанзон пачк ётась сядот тежянь ломань, кафта сядода лама тежянць ляцьфтольхть, шавфтольхть, плхтафтольхть крематорийса. Содамс сембонь шамас ашель кода. Но немецнень-коммунисттнень ульсь подпольнай комитетсна. Теест каннесть кудста ярхцамбяль. Вов и лезнесть пульзяф ломаттненди. А Девятаевонь мархта арась содафокс войнада меле ни, мзярда лемонц кулезе марнек мирсь.
Мяляфтса, конашкава кельгозь и пичедезь ванондозе Курт Михаил Петровичень книганц, нльне сельмонза летькомсть. Эста и надияфтсь путомс сонь клянць алу ся отделти, кона лемтьф концлагерень ингольдень узникненди—шиса лятфненди, шавфненди, ляцьфненди, плхтафненди, пондафненди, овчаркань пейса сязентьфненди-нозонтфненди.
* * *
Пингонь ётазь Михаил Петровичень мархта араме содафокс. Сяда лац азомс, сон кармась содамон. Весть васедемстонк азондыне, кода служань Ораниенбургса, кода максыне «Побег из ада» книганц «Заксенхаузен» ГДР-нь государственнай музеи. Лятфтайне седиень сязи документальнай фильмать. Михаил Петровичень шамава ётась цильфкя, арьсезь пшкядсь:
—Да, тя киноть пачк ётаф...
Эста лама азондсь сянь колга, мезсь мзярс ашезь тялькфтав «Побег из ада» книгазонза. Эстоньбере Казаньцта Саранскяй пцтай эрь самстонза кармась сувсема работама вастозон. Мезень колга аньцек ашеме корхне чайда симомбачк. Фалу дивандакшнень: эряфонь тапаф ломанць мезендивок ашезь синдев, арудонга аруста ванфтозе ваймонц, эряфти и ломаттненди пефтома кельгомац ёфси аф солси ётаф кизонзон мархта. Койсон, вакссонза марясак пряцень сяда виикс и смузюкс. Мяляфтса, 1995 кизоть ушетксста пялон сувась пеедезня. Сонь фалу тяфтама промозоц. Азозе:
—«Заксенхаузенонь» ингольдень узникнень комитетсна (ули тяфтама Москуса) апрельста тердемань Ораниенбургу. Ковть 20-це шистонза топоди 50 киза, кода воляшити панжевсть адонь ортатне.—И апак учсек поладозе:—Аде мархтон. Комитетть вельде тертьфтте.
—И тяшттяма од книга,—азыне кунардонь мяльнень.
—Мезень колга?—эстокиге оржакстомсь сельмованфоц.
—Лемдьсаськ тяфта: «Етаф войнась Россияса эряй и немецнень мялямсост». Кизефнелеськ, мезе арьсихть сиретне и оттне, кодама-повсь партиява ащихне и аф партийнайхне. Тянь вельде сёрмадолеме народонь мялямонь картина. Вдь кодамовок народонди историяса ашель фкявок тёждя война—хуш конань лангс врьгятсть, хуш конань врьгятьфтезь.
—Тя пяк пара!—кафцьке кядьлапшсонза кундазе кядезень.
Эста Михаил Петрович якась Германияв нужас коре ялганзон мархта васедема. Тейне повомс ашезь удала—республикаса ашесть мув командировочнайхть.
Сяда меле Заксенхаузенца улендень ламоксть ялганень, школьникнень мархта. Аф весть кофеда симнемань музейть директороц, сиретькшни немецсь Курт, ламонь колга корхнефоль. Но фалу лотксень клянцень витринать ваксс, коза путфоль М.П.Девятаевонь «Побег из ада» версонза тяштьф книгац. Толкс палы букватне фалу пицезь седиезень.