Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Молодежный клуб

«СЕМБЕ САТФКСНЕ—МАРСТОНЬ!»

Н.П.Огарёвонь лемса Мордовскяй государственнай университетонь студентть Андрей Тюлюковонь лемнесазь тя вузонь инь содаф   футболистокс. Меля МГУ-нь футболонь командась аф весть занцесь вастт и сяськондсь ламоц пялькстоматнень эса. Тяда башка, Россиянь студенческяй спортивнай клупнень Ассоциацияснон мини-футболть коряс Всероссийскяй чемпионатснон финалса командать капитанонцты Андрей Тюлюковонди максфоль «Инь питни налхкись» лем. Церась тонафни Мордовскяй госуниверситетонь географическяй факультетса, а спортть мархта арась ялгакс пяк кунара. Кода? Тянь азондсы алува.
—Мезьста ушедсь футболть мархта ялгаксшице?
—Ванондыне, кода налхксь алязе, улендень тренировканзон эса. Мзярда ашель кинь мархта кадомс монь куду, сявондемань ванондома. Налхксь ламоц клупнень эса. Тяфта и содафтонь футболть мархта.
—Семьяце кельгсы спортть?
—Кельгсы. Алязе, кода ни азыне вяре, футболист, тядязе ласьконди, курьксни соксса, конькаса. Сазорозе Лиза сай кизоть моли школав, колганза нинге мезевок аф азован.
—Меля арать омбоце бомбардиркс Любительскяй Лигань Чемпионатса и кочкать 30 сувафтф мяч. Сяльдевок сатфксне аф кальдяфтольхть.
—Сембе голхне, конатнень сувафнине, тя «Team13» тяниень командать и «Бронепоезд» командать марстонь     сатфкссна.
—Кажнайсь арьси тя или тона тевса профессионалкс арамать колга. Кда, мярьктяма, терделедязь Россиянь Премьер-Лигань 16 клупненди, конань эздост кочкалить? И мес?
—Тянь колга, койсон, арьси эрь футболистсь. Кочкалине «Локомотивть». Инксонза «сярядема» ушедонь нинге шабакс.
—Налхкомаце тушенды аф аньцек цератнень, но и стирьхнень мяльс. Мекольцетне сидеста ерайхть мархтот содафтомс, ладямс соткст?
—Тя синне тевсь. Кда мяльсна ванондомс кода налхкан—тя пара. Кда корхтамс эряфть колга—ули кельгома стирезе. И сон ширезень кирдьсы сембода лац!
—Андрей, нинге несколька кизефкс. Кодама тюссь мялезт?
—Менеленнесь.
—Авань кельгома лемце?
—Наталья (тядязень лемоц).
—Кельгома фильмаце?
—«Пеле. Легендать шачемац».
—Кодама странас мяльце молемс?
—Доминиканскяй Республикав.
—Кие, койсот, инь цебярь налхкись футболть историяса?
—Пеле, Пеле и, нинге весть,—Пеле!
—Спасиба! Сембе цебярть тейть!
Т.АЛЬШИНА.

19.01.2017 №2
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин