Илась лемтьфоль Российскяй Печатень шити

ЛЯМБЕ ВАЛХТ И КАЗНЕТ—ЖУРНАЛИСТТНЕНДИ
16 январьста Саранскяйса, республикань Кудть Колоннай залсонза,    ётафтфоль торжественнай пуромкс. Сон лемтьфоль Российскяй Печатень шити.
Тя праздникса сембода оцю инжикс ульсть республикань журналисттне, печатень и массовай информациянь средствань ветераттне. Синь ётксост «Эрзянь правда» и «Советская Мордовия» газетань ингольдень главнай редакторхне В.И.Кечемайкин и А.А.Утешев, журналистикань ветераттне Т.М.Ковалева, Н.П.Калитина, В.Максин и ламотне лиятне.
Печатень шити лемтьф мероприятиять вступительнай валса панжезе Мордовия Республикань Оцюнясь В.Д.Волков. Сон поздравляндазень журналисттнень и массовай информациянь сембе работникнень профессиональнай праздникснон мархта и азозе, што сон надияй кеме сотрудничествать лангс.
Сяда тов республикань Оцюнясь азондозе, кодама оцю лезкс макссихть печатсь, радиось и телевидениясь республикань руководствати политическяй стабильностень и общественнай согласиянь ладямаса, республикань экономикать виияфтомаса, социальнай кизефкснень решандамаса.
—Аф ваномок уликс стакатнень-сталмотнень лангс,—мярьгсь сон,—республикась лац шумордазе ётай кизоть. Промышленнай производствась кассь-кеподсь 7 процентта, Мордовиянь велень хозяйствась инголе молихнень ёткса ПФО-са и марнек странаса. 2016 кизонь итокнень коряс, Мордовияса средняй зарплатась кассь 7 процентта. Зарплатать касомац ётнесы инфляциять.
Республиканьке лувондови инновационнай регионкс. Сон тяни занцесы нилеце вастть инновационнай региоттнень ёткса. И работась инновационнай технологиянь тевс сувафнемать коряс мольфтеви сяда тов.
Башка мяль эсь корхтамасонза В.Д.Волков шарфтсь футболть коряс Миронь чемпионатти анокламати. Спортонь тя оцю праздникти анокламась, кле, мольфтеви лац. Строяви стадионць, июньцта арьсекшневи ётамс футбольнай паксяти, кармай аноклавома газонць. Лац-ряц аноклафт ламоц эрявикс китне.
Цебярьгофневи республикаса демографическяй ситуациясь. Меля шачсь 160 шабада сяда лама тяда ингольдень кизоть коряс. Цебярь шири полафни и миграционнай баланссь. И тя сяс, мес миньцонк коль сяда оцю мяль шарфневи социальнай кизефкснень решандамаснонды. Строявихть од садикт, тиендеви реконструкция школатненди, одкстопневи медицинскяй учреждениятнень эса оборудованиясь и стак тов.
Корхтаманц песта В.Д.Волков азозе, што республикань властень оргаттне сяда товга активнайста кармайхть сотрудничендама массовай информациянь средстватнень мархта. Тейнек, кле, марса эряви тиемс сембось сянкса, штоба Мордовияньке инголи аськоляль нинге сяда кели  аськолксса.
Тяда меле республикань Оцюнясь максозень Почетнай грамотатнень, дипломтнень редакционнай коллектифненди, журналисттненди, конат лиссть сяськикс 2016 кизонь журналистскяй конкурснень эса.
Казне получась и «Мокшень правда» газетаньке. Теенза максф васенце вастсь «ИнтоНация» конкурсса.
Торжественнай пуромксса тяфта жа ульсть Мордовия Республикань Оцюнять Администрациянц Руководителенц заместителец—внутренняй политикать коряс Управлениять начальникоц В.В.Маресьев и республикань Печатень и информациянь министрсь В.А.Калугин.