https://mokshapr.ru
10.06.2022
 |
Архив | |
| апрель | ||||||
|---|---|---|---|---|---|---|
| 2024 | ||||||
| пн | вт | ср | чт | пт | сб | вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
 |
|
«КЕМОКСТАТАМА МЕЖНАЦИОНАЛЬНАЙ МЕЖРЕЛИГИОЗНАЙ СОТКСНЕНЬ ЭСА!» —Раиса Ивановна, ётай кизонь мероприятиятнень эзда, конатнень ётафтозень Поволжскяй центрась, конат арасть тейть инь мяляфтовикс?
—2016 кизоня Финно-угорскяй народонь культурань Поволжскяй центрась марстонь вийса Мордовия Республикань лия общественнай организациятнень, а тяфта жа государственнай ведомстватнень мархта аноклась и ётафтсь республикаса и Россиянь лия регионца 60-да лама мероприятия. Синь ульсть региональнайкс, межрегиональнайкс, всероссийскяйкс и международнайкс. Но эсь идеологическяй потенциалснон коряс сембе синь тисть фкя марстонь тев—кемокстасть российскяй нациянь нароттнень ёткса межнациональнай, межрелигиознай, научнай, культурнай и лия соткснень эса. Сяс мелянь ётафтф сембе пуромксне тейне питнихть и мяляфтовихть фкакс! Но, тяка пингть, ётксост улихть стапт, конат арасть инь няевиксокс. Мярьктяма, Мокшэрзянь кяльхнень Всероссийскяй Шисна, Славянскяй письменностень и культурань Ши илась, Татаронь «Сабантуй» Межрегиональнай праздниксь, «Минь—россияттама» Од ломанень Общероссийскяй форумсь, «Катк фалу эряй тядянь кяльсь» Од ломанень финно-угорскяй фестивальсь, «Волга—река мира» Международнай экспедициясь-фестивальсь и «Финно-угорский транзит: семейные ценности» лем ала Искусствань и народнай творчествань фестивальсь шарфтсть эсь лангозост оцюдонга оцю мяльхть-ванфт аф аньцек Мордовия Республикаса, но и Россиянь лама лия регионца! —Кодама тефт ёрай тиемс Поволжскяй центрась тядде? И мезе ёратада сатомс вельдест? —Кода и ётай кизоня, Финно-угорскяй народонь культурань Поволжскяй центрать сотрудниконза кармайхть эрьгавста покодема международнай, всероссийскяй, межрегиональнай и республиканскяй этнокультурнай мероприятияса. И, конешна, минцьке анокламе тяфтама мероприятият. Монь койсон, ётафтомдост меле синь кандыхть лама цебярьда российскяй нациянь сембе нароттненди, кемокстамок ётксост межнациональнай и межрелигиознай соткснень и касфтомок патриотизмань мяльхнень сембе поколениянь ломаттнень ваймоса. Мон корхтан Патриотизмань урокнень колга, конатнень тя кизоня Поволжскяй центрась ётафтсыне Мордовиянь и Россиянь лия региононь школатнень эса. Синь лемтьфт сембе мирса содаф лётчикть, Советскяй Союзонь Геройть М.П.Девятаевонь шачема шиста 100 кизонь топодемати. Геройть подвигонцты и эряфонь кинцты тяфта жа ули лемтьф тя кизоня «Волга—река мира» Международнай этнокультурнай экспедициясь-фестивальсь и творческяй работань Всероссийскяй конкурссь. Тяфта жа эсь идеологияснон вельде, монь койсон, кемокстамс российскяй нациянь нароттнень ёткса сембе ширдень соткснень, кода Мордовия Республикаса, стане и Россиянь лия регионца, тейнек лездыхть «Через культуру к единению народов» республикань проектсь, «Акша келу» и «Велень озкс» национальнай илатне, «Русский язык в диалоге культур» Всероссийскяй научно-практическяй конференциясь, «Роль СМИ в формировании общероссийской гражданской идентичности» лем ала «Круглай шрась» и, конешна, эсь решениянзон вельде Россиянь Финно-угорскяй народонь VI съездсь, кона сентябрьста ётай Коми Республикаса. —Кода минь содасаськ, Раиса Ивановна, Россияса сатомшка лама финно-угорскяй народонь организацияда. Кода латцевихть мархтост тинь тевонте? —Ётай кизоста сявомок и тя пингс самс Финно-угорскяй народонь культурань Поволжскяй центрась ламотнень мархта ня организациятнень эзда марстонь тевонь вятемать коряс кемокстась Соглашеният. Мярьктяма, Российскяй Федерациянь Финно-угорскяй народонь Ассоциациять, Российскяй Федерациянь Финно-угорскяй культурнай центрать, Мокшэрзянь народонь Межрегиональнай общественнай организациять и финно-угорскяй народонь лия общественнай структуратнень мархта, конат вятихть эсь тевснон эса Омскяй и Россиянь лия областьса, а тяфта жа Башкортостан, Татарстан, Марий Эл, Удмуртия Республикаса и Казахстанца. Мордовия Республикаса Финно-угорскяй народонь культурань Поволжскяй центрась тяфта жа кемокстась Соглашеният лия народонь сембе представительхнень, кит эряйхть миньцонк, общественнай организацияснон мархта. Сяс тейне тячи ули кода азомс: Поволжскяй центрась эсь тевонзон вятемста Мордовия Республикаса и Россиянь лия регионца фалу муй лезкс! —Раиса Ивановна, тонь койсот, сатомшка ли оцю работа тячи вяти Поволжскяй центрась российскяй нациянь од поколениятнень мархта? —Финно-угорскяй народонь культурань Поволжскяй центрань сотрудникне российскяй нациянь од поколениянь ломаттнень мархта работайхть тя валмуворксть коряс: «Кодамкс минь тячи касфтсаськ од ломаттнень, стамкс ванды кармай народоньке!» Сяс Поволжскяй центрать видеса минь пуроптоме Од ломанень Совет, коза сувасть Мордовиянь национально-культурнай сембе объединениятнень представительсна. Аф кунара Советсь эсь заседаниясонза кемокстазе Рабочай планть, конань коряс сон кармай вятема тевонзон эса тя кизоня. Ня тефнень ёткса—«Этнографическяй оцю диктант» лем ала Всероссийскяй акциясь, «Валдо кече» финно-угорскяй шахматнай турнирсь, «Марса-вейсэ» од ломанень этническяй дискотекатне и региональнай, межрегиональнай и всероссийскяй лия мероприятиятне, конат российскяй нациянь од ломаттнень касфтсазь афкуксонь гражданинкс! —Сюкпря, Раиса Ивановна. В.НЕСТЕРОВ.
|
|
НОВОСТИ | |
