Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Спорт

Спортсь—тя эряф

Е.Анюшина: 
 «Олимпийскяй медальть надияфтан сАТомс Токиоса!»
Мордовиянь од стирть Елена Анюшинать лемоц тяни лац содаф аф аньцек эсь республикасонк, но и сембе мирса. Сон—юниорхнень еткса Миронь ламонь-крдань чемпионка, Европань чемпионатонь бронзовай призер, 2013 кизонь Универсиадань вице-чемпионка, аф кржа Анюшинать копилкаса и российскяй пялькстомань медальда. Меля землячканьке няфтезе эсь прянц спортонь инь оцю стартть эса—Олимпийскяй налхкомаса. Ужяленди, сатомс турниронь медальть ашезь удала, но результатт няфтьфтольхть аф кальдяфт.Олимпиадать колга эсь мялензон-арьсеманзон, а стане жа сай пингонди планонзон колга спортсменкась пачфтсь корреспондентоньконь мархта корхнемста.
—Лена, кодамоль тейть мелянь кизось?
—Мярьгомс, што удалафоль сембе ширде, аш кода, вдь сатомс педа-пес инголен путф задачатнень ашезь лисе. Колсесы мялезень, мес Рио-де-Жанейроса финишти пачкодень аньцек ветецекс. Макссть эсь колгаст содамс стрессне, конатнень савсь кирдемс тейне турниронь карша. Кода содасасть, улема, мекольдень шитнень самс аф шарьхкотьфоль, нолдасамазь или аф Олимпиадас, сяка-тев муворгофнесть эсон допингонь препараттнень тевс нолнемаса, хуш тяфтамот мон вестевок ашень «варчсе» марнек спортивнай карьеразень пингста. Вов и арьседа, кода цебярьста анокламс тяфтама обстановкаса. Мзярошка пингс тренировкатненьге савсть лоткафтомс, тумс вели, штоба «кяшемс» тя семботь эзда. Меколи кись Олимпиадати панчфоль, но медалень сявомати надияма ашель ни.
—Улема, пяк таколдоть стартта инголе?
—Озадонь седихть эсь   тевцти ащемась сатфкст аф канды, сяс таколдома ули эрь пялькстомада инголе. А тяса ниле кизонь инь оцю турнирсь, конаса участвондамась—эрь спортсменть сембода оцю мялец. Тя ульсь монь васенце Олимпиадазе, а сяс сембода таколфтысь и мяляфтовись. Но, надиян, аф мекольцесь. Медальть инкса нинге тюрьхтяма Токиоса.
—Сонць Олимпиадась тусь мялезт?
—Конешна, васендакиге оцюшинц мархта. Миронь и Европань чемпионаттне, конатнень эса тейне удалась примамс участия, Олимпийскяй налхкоматнень мархта ряцок аф арайхть. Тяса пялькстыхть масторлангонь инь вии спортсметтне, аньцек лисемс мархтост фкя стартс, пяк оцю честсь. А вов Налхкоматнень организациясна, видеста азомс, аф ни кодамоль. Тя   шарьхкотьф мес, вдь Бразилиясь ашу страна. Миньцонк тяфтама пялькстоматне етафневихть сяда оцю уровеньца.
—Тяниень пингть греблять коряс Россиянь сборнайса тон лувондоват лидеркс. Шять, ули цебярь физическяй формань секретце?
—Секретсь фкя—фалу работама эсь лангсот, аф ноласькоткшнема. Мон эрь шиня  макссян тренировкатненди несколька част, аф лотксян тренировандакшнемда эстовок, мзярда сашендан Жабинав. Тядде тренерозе Яков Костюченко пачфтсь тяза греблянди специальнай тренажер.
—Тон выступандакшнят байдаркаса-«одиночкаса» и «двойкаса». Тонцень кона видсь сяда мялезт?
—Кафцьконь улихть кода цебярь ширесна, стане и сталмосна и афсатыкссна. Пялькстомас анокламань васенце пингть минь фалу тренировандакшнетяма аньцек «одиночкаса», экипашнень тевс нолясаськ пялькстоматнень карша. Монцень, конешна, пяк мялезе няфтемс прязень «одиночкаса». Арьсян, Миронь и Европань чемпионаттнень пингста тейне улель кода достойнайста пялькстомс омба масторонь байдарочницатнень мархта. Но мекольце валсь тренерть мельге, сон решандакшнесы, коса и кода тейне выступандамс.
—Мекольдень пингть ламоц российскяй легкоатлеттне муворгофневсть допинговай скандалхнень эса. Тейть сидеста сашендови макссемс допинг-пробат?
—Сидеста. ВАДА-нь и РУСАДА-нь инспекторхне могут самс любой пингть. Допинг-контроль етнетяма аф аньцек пялькстомада инголе, но и анокламань пингста. Сядонга сидеста эста, мзярда спортсменць ушеткшни няфнемонза прянц международнай турнирхнень эса.
—Лятфтак спортти самацень колга?
—Спортонь аф фкя лацонь виттнень мархта пря занцень нинге шабакс, башка волейболса. Велень школасонк волейболса налхкомстон и приметамань греблять коряс Россиянь сборнайть тренероц Яков Костюченко. Ульсь тя 2008 кизоня. Яков Яковлевич вешендсь спортивнай од талантт республикань ошень и велень школатнень эзга. Тердемань варжамс вийнень профессиональнай спортса, мон согласиндань. Ся пингста сявомок эрян и тренировандакшнян Моску аймаконь Бронницы ошень учебно-тренировочнай базаса. Сембе эсь сатфксонень инкса спасибан Яков Яковлевиченди, сон—учителезе и наставникозе.
—Лена, кодамот платтне 2017 кизонди?
—Мялезе лац няфтемс прязень Миронь и Европань чемпионаттнень эса. Карман работама, аф ужяльдьсайне вийнень тренировкатнень эса и сатнема международнай турниронь медальхт.
—Спасиба. Пяшкодевост сембе мяльхне-арьсематне и кеняртьфнемасть од сатфксса!
О.Евдокимова.

16.02.2017 №6
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин