Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Люди и дела

КАСФНИ ВАЗНЯТ

Вера Николаевна Пряхина шачемас коре Ичалковскяй райононь Селищи эрзянь велеста. Нинге идькс пингста сон аф кржа лезнесь тядянцты кудъетконь тевса, перень серонь касфтомаса. Сяда эзрайняста школань каникулатнень пингста якась колхозонь тинголангс серонь понжафнема, паксяста сор тишень кочксема. Эсь шачема велесонза аделазе средняй школать. А сяда меле тусь Саранскяи, но поладозе бухгалтеркс тонафнеманц Инсар ошса. Аньцек профессияс коре ашезь сав покодемс. Колма кизот работась Саранскяй полупроводниковай заводса. А мзярда лиссь рьвакс (тя 1981 кизось), мирденц Александр Ивановичень мархта ушедсть эряма Ведянцы рузонь велеса. Тостонь колхозса Вера Николаевна работась кассиркс. Тяда башка, лама эрь кодама тевда  сашендовсь тиендемс кудъеткса и аф кржа вий эрявсь максомс кафта идень касфтомаса.
Пряхиттнень семьясна 1985 кизоня етась эряма Лямбирскяй райононь Атемар вели, а работама миртть-рьват мольсть тостонь «Искра» совхозу. Вера Николаевна вете кизода меле етась вазнянь касфнема «Атемарская» птицефабрикав.
—Васенда сашендовсь вазнянь андома-симдема арнемс Белогорское вели (тосотольхть карттне), а сяда меле жувататнень етафтозь Атемару,—лятфни В.Н.Пряхина.—Сяс мельгаст якамс-ваномс сяда ламоль пингтон. Кой-кит аф шарьхкодьсазь сянь, што вазнятне, кода и шабатне, кельгсазь ломанень лямбе валть-мезть, вадерясак копоренц и пиленц кядьса, синь мялезостка пара. Сай етамстот эзот педезь педихть.
Вов ни кеветие киза, кода аш шиса Вера Николаевнань мирдец. Тяни тя трудонь кельги эрзявать кенярдема вастоц—иденза и кафта уноконза.
—Атемарса эрятама 32 киза. Монць ниле кизот, кода пенсиясан, но, кода и инголи, эрьгянь аф ужяльдезь касфнян вазнят (синь эздост мельган кемокстаф мянь кодгемонь вете пря). Вдь минь эздонк ащи ся, кодама тракст лофцонь потямс касфттама ня вазнятнень эзда.
Вера Николаевна аф эсь прянь няи ломаттнень эзда, скромнай, но козя ваймонь лямбонь ширде. Сяс сон работасовок макссесы эсь кельгоманц, путнесыне виензон аф ужяльдезь марстонь тевонь вятемаса. И мзярдонга киндивок аф пеняцякшни эряфонь стаканзон-сталмонзон лангс аф работаса, аф теждя тевсонза. Сяс тостонь оцюнятнень эзда куленди аньцек цебярь, шнама валхт.
 
В.Лазарев.
Снимкаса: В.Н.Пряхина.

16.02.2017 №6
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин