Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Люди и дела

Фрезеровщиксь А.И.Чекурин аф весть лисендсь сяськикс «Профессияс коре инь цебярсь» конкурсса

Тяниень пингть од ломаттне аф эряскодыхть сотнемс эряфснон рабочай профессиятнень мархта. Сяда мялень шарфтыкс лувондсазь офиснай работать. И кда тяда инголе рабочайсь ульсь эсь пингонь геройкс, колганза снимандакшневсть фильмат, тяшневсть роматт и латцевсть ёфкст, то тячи од ломаттнень лият     геройсна—банкирхне, политикне, управленецне. Тяка пингть заняфшинь центратнень эса коль сяда сидеста васьфневихть рабочай профессиянь вакансиятне: аф сатнихть электрикт, сантехникт, фрезеровщикт. Мекольцеть мархта сембе эряфонц сотозе Саранск ошень эряйсь А.И.Чекурин.
Станокть ваксс Александр Иванович стясь нинге ичкоздень 1986 кизоня и тячемс аф явонды «кшнинь» профессиять мархта. Ушеткшнесь фрезеровщикти ученикокс, а тяни сон 6-це разрядонь мастер. Мархтонза работайхне корхтайхть Чекуринонь колга аньцек шназь, ламотненди сон арась цебярь учителькс.
Фрезеровщиконь тевсь аф тёждятнень эзда. Работась мольфтеви фрезернай станокть лангса аф фкя лацонь металлхнень мархта. Машиностроениянь отрасляса тя фкя инь эрявикс профессиясь, кона веши мархтонза заняфть эзда крхка содамошит. Фрезеровщикти лац содама черчениясь, вдь работать оцюшка пяльксоц мольфтеви чертешнень коряс. Мерсемань инструменттнень мархта работать аш кода пяшкодемс математикать, геометриять аф содазь, а металлхнень эзда деталень керсемста лац содамат эрь материалть эсь лацонь ширенза. Сембе ня качестватне мусть васта тячиень героеньконь эса. Тянь кемокснесазь Александр Ивановичень оцю казненза, конада алять пяк лама. Лама киза лац работаманкса Чекурин ялгась казьф Мордовия Республикань Правительствать Почетнай грамотаса, МР-нь Оцюнять Благодарностьса. Трудонь кельги тя ломанць аф весть лисендсь сяськикс «Профессияс коре инь цебярсь» межрегиональнай и республиканскяй конкурснень эса.
Эсь работанц Александр Иванович лувондсы творческяйкс. Тиф эрь детальсь, мярьги, тяштьф од произведения лаца—соньге эсонза авторть ваймонь пялькскац. Станочниконь тевть алясь саворне тонаткшнезе нинге шабакс улемстонза. «Алязе, Иван Игнатьевич, токарель, сидеста сявонкшнемань мархтонза работама,—азозе Чекурин.—А токарнай работась, кода содаф, пяк мала фрезеровщиконнети.
Шачемас коре Александр Иванович Ромодановскяй райононь Емла Березникат велеста. Тостоконь школать аделамда меле служась армияса, а, мрдамок, сявфоль работама  Саранскяень автосамосвалонь заводу, коса трудендай тячемс. Васенда покодсь емла фрезернай станокть лангса, меле, приметамок од работникть профессиональнай касоманц, начальствась примась решения етафтомс сонь сяда ответственнай     участкас—продольно-фрезернай станокнень ваксс. Тя пингста, кле, ламось полафтсь предприятияса: оду петьфт-тифт помещениятне, цехне козякофтфт тяниень пингонь од оборудованияса. А вов коллективсь сякось. Тяса работайхнень ламошкасна—пенсионерхт. Оттне самс работама заводу аф эряскодыхть, а кит сашендыхть, ламос тяса аф кирневихть.
Пробкат, скобат, резецт, фрезт, зинкерхт, штампт… Ня предметтне ламотненди эздонк ефси аф содафт, а А.И.Чекурин колмогемонь фкие кизоста тись эздост несколька тежятть. Варжаксты Александр Иванович заводста нолдави машинатнень, прицепнень, лия продукциять лангс и мялец кеподи—соньге ули эсост путксоц.
Аф аньцек работаса сафтсы трудонь кельги тя ломанць. А.И.Чекурин цебярь мирде и аля. Рьванц мархта касфтсть кафта итть, тяни кеняртькшнихть уноконяснонды.
О.КОЛЕДИНОВА.

16.02.2017 №6
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин