Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Письма из села

Сёрмат велеста

Ковылкинаста
СПОРТОНЬ ИЛАСЬ УДАЛАСЬ
«Солдатскому мужеству верность храня» лем ала республиканскяй военно-спортивнай налхкома етась Кочелаева велеса Ф.В.Сычковонь лемса физкультурно-оздоровительнай комплексть видеса. Налхкомась лемтьфоль Афганистанцта войскатнень лихтемаснонды, ДОСААФ-ти 90 кизонь топодемати и Отечествань аралаень шити.
Налхкомась етафневи омбоце кизось мельцек. Эсонза примсихть участия 6-10 классонь тонафнихне. Тядде сафоль мяльс келептемс пялькстомань программать: эзонза сувафтфт туристическяй этап, ки лангонь правилатнень коряс пялькстомат и уендемань бассейнаса эстафета.
Пялькстомаса примасть участия Ковылкина ошень сембе школатне, Кочелаевскяй СОШ-нь тонафнихне и кафта командат Саранскяйста.
Спортонь тя илас тертьфоль лама почетнай инжи. Тясотольхть МР-нь боевой братствать председателенц заместителец Ю.В. Колодников, «Гепард» спецназонь отрядонь майорсь, краповай беретонь каннись А.М.Журавлев, Ковылкинскяй, Инсарскяй, Кадошкинскяй райоттнень эзга военнай комиссарсь Е.М.Паничкин, ДОСААФ-нь Ковылкинскяй автошколать начальникоц Э.Д. Куняшев, Торбеевскяй боевой братствать председателец С.А.Гордеев, вооруженнай виень офицерхнень-ветераттнень председательсна А.С.Семиков, бардсь Игорь Губанов.
Участникне няфтезь эсь маштомошиснон перяфксонь етамаса, дротикса цельс повомаса, васенце медицинскяй лезксонь максомаса и лияса. Сембе участникне и командатне казьфтольхть дипломса, грамотаса, медальса.
И.П.Малышева,
«Ковылкинская СОШ имени Героя Советского Союза М.Г.Гуреева» МБОУ-ть директоронц воспитательнай работать коряс заместителец.
 
ТЕЕНЗА ВАСЕНЦЕ ВАСТСА—ВОСПИТАНДАМАНЬ ТЕВСЬ!
Советскяй Союзонь Геройть М.Г.Гуреевонь лемса Ковылкинскяй 6№ средняй школать воспитательнай работать коряс директоронц заместителец Ирина Павловна Малышева работай тя школаса 40 кизода ламос. Сон—тевонь содай педагог, кельгома учитель, Российскяй Федерациянь общай образованиянь почетнай работник, Мордовия Республикань образованиянь Заслуженнай работник, казьф Мордовия Республикань Государственнай Собраниянь Почетнай грамотаса.
Ирина Павловна путни лама вийда, штоба цебярьгофтомс школьникнень ёткса воспитандамань тевть. Тянкса етафни национальнай культурати и патриотизмати лемтьф лама пуромкс, конаса примсихть участия педагокт и тонафнихть. Лезкс макссихть локальнай военнай действиянь участникне, орденца и медальса казьфне, районца содаф ломаттне.
Ирина Павловна пачфни эсь тевонзон колга «Мокшень правдав» и сидеста серматкшни газетав материалхт мялень салай етаф пуромкснень колга.
В.КУДАШОВ.

Тольяттиста
САЛАЗГОРСЬ ЭРЯЙ СЕДИСОН
Шумбрат, «Мокшень правда» газетать редакцияц! Тяшти земляконте, тяни Самарскяй областень Тольятти ошень эряйсь Павел Васильевич Уланов.
Шачень-касонь мон Торбеевскяй райононь Салазгорь велеса. 1969 кизоня шумордайне тостоконь школать и аф лама пингонь етазь лисень работама Торбеевскяй РЭС-у, заняфолень электромонтеронь тевса. Кизода меле сявфолень армияв, а мрдамок, поступань тонафнема Зубово-Полянскяй ССПТУ-в. 1981 кизоста сявомок эрян Тольяттиса. Пенсияс лисемозон работань ВАЗ-са ремонтникокс.
Аф ваномок сянь лангс, што лама киза ни эрян ширеса, мокшэрзянь масторсь, шачема-касома уженязе фалу седисон. Салазгорьса етась идькс пингозе, тяса ласькондень кяпе пиже тишенять ланга, тяса васенцеда кельгонь и улень кельговикс. Кали тя юкстави?!
Самок ВАЗ-у работама, аф азовомшка кенярдень, мзярда васьфтень тяса мокша и эрзя ломатть. Ладяме фкя-фкянь мархта, пара мяльса корхнекшнеме эсь еткованк тядянь-алянь кяльса. Азонкшнеме фкя-фкянди кие-мезе содай мокшэрзянь содаф ломаненьконь колга. Советскяй Союзонь геройть М.П.Девятаевонь, ламонь-крдань олимпийскяй чемпионть Алексей Немовонь, кафтонь-крдань олимпийскяй чемпионкать Светлана Хоркинать и ламотнень лиятнень инкса маряме и марятама гордость.
Мялезе аф лама азондомс эсь родозень-плямазень колга. Щятязе (тядязень аляц)—Васенце мировой войнань участник. Щятязень аляц, Семен Коняшкин, ульсь Георгиевскяй кавалеркс, тюрсь врагть каршес русско-турецкяй войнаса. Тядязе-алязе эряфоньберьф трудендакшнесть велень хозяйстваса. Сембе синь ульсть афкуксонь патриотокс, кельгозь шачема масторть и эсь народснон. Мон сявондян эздост пример.
П.В.Уланов,
Тольятти ошень эряй.
 
Атерьста
Келиста васьфтезь Масланцять
Атюрьевскяй районца келиста васьфтезь Масланцять. Каменка велень вири пуромкшнесть райононь ламоц эряйхне. Велень поселенияса покодихне пидесть-панцть пачат, пярякат, лия ярхцамбяльхть, тисть поза. Шнама валхт азомат Курташка, Перевесье, Кяшал, Мокшень Козловка и велень лия поселениятнень колга, конатнень вятьсазь С.В.Базаркин, Н.В.Степанов, В.Ф.Четыркин, В.Н.Шукшин. Синь Масланцянь шрасна пяк козятольхть национальнай  ярхцамбяльса.
Инь отькорьхненди, виихненди етафтовсть спортивнай пялькстомат. Культурань кудонь работникне анокласть цебярь концерт, конань эса примасть участия самодеятельнай артисттне райононь велетнень эзда.
—Масланцясь удалась,—мярьгсь Атерь велень эряйсь И.Н.Сиркин.—Ваймяме аф кальдявста. Ульсь мезе ваномс, ульсь мезьда ярхцамс-симомс.
И.ВЕШКИН.
 
Зубуста
ВЕЛЕНЬ УЧИТЕЛЬ
Лама киза Зубово-Полянскяй райононь Анаева велень школаса работай учителькс Геннадий Алексеевич Курносов. Сон казьф Почётнай лама Грамотаса, мекольцесь эздост—Российскяй Федерациянь Образованиянь министерстваста.
Нинге шабакс цёранясь арьсесь учителькс улемать колга. Мзярда Геннадий Курносовонди топодсь 6 кизонят, сон тусь школав. Анаева велеса ульсть начальнай классонь  колма школат, средняй школа и илядень школа. Школаса тонафнесть кафта сменаса, тяконь   лувксса и шабрань велеста тонафнихне. Аньцек Анаевскяй лесучасткаста усксесть ведьгемоньда лама шаба.
Геннадий Курносовонь васенце учительницац ульсь Нина Григорьевна Шиндякова, кона эстокиге шарьхкодезе, што цёранясь кармай лац тонафнема.
Школаса директороль Михаил Петрович Котов. Сон корхнесь Геннадий Курносовонди учителень профессиять колга. Геннадиенди цебярь кепотьксокс ащесть васенце учительницац и школань директорсь. Аф ваномок эряфонь сталмотнень лангс, кафкса классонь аделамда меле тусь тонафнема Зубово-Полянскяй педучилищав. Геннадий Алексеевич пяк лямбоста лятфнесыне тонафнема кизонзон и педучилищань преподавательхнень Г.Г.Вершининать, М.К.Вишняковать, Т.К.Костинать, Л.Т.Кучинскаять, А.А.Прохоровонь, В.П.Тимошенковать и ламотнень лиятнень.
Зубово-Полянскяй педучилищада меле сась работама шачема велезонза и несколька киза начальнай школань учителель. Тяда меле поступась Н.П.Огарёвонь лемса Мордовскяй государственнай университету омба масторонь кялень факультету. Васенце курсть аделамда меле тернезь ётамс  юридическяй факультетть васенце курсонцты. Преподавательхне и юридическяй факультетонь деканць, конат ётафнесть студенттнень мархта занятият, няезь цёрать асушинц правоведенияса. Куватьс корхнесть мархтонза, но Геннадий Алексеевич кельгозе учителень профессиять и ашезе полафта лия тев лангс.
Улемок комсь фкя киза     класснай руководителькс, Геннадий Алексеевичень колма выпусксонза ульсть стирьхть и цёрат, конат шумордазь школать зрнянь и сиянь медальса.
Школаса работамста Геннадий Алексеевич вятсь и тянемс вяти общественнай оцю тев. Колмогемоньда лама киза сонь кочксезь профсоюзонь комитетти председателькс.
Геннадий Алексеевич Курносов фалу анок лездомс валса и тевса маластонь ломанензонды, ялганзонды. Фалу надияй, што сятне, кинь тонафнезень, мзярдовок аф юкстасазь шачема-касома ширеснон и школать, конань шумордазь.
З.БОГДАНОВА.

08.03.2017 №9
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин