Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Обо всем понемногу

Обо всем

ШКАЙСЬ КУЛЕЗЕНЬ ОЗОНДОМАНЬКОНЬ
Эряфоньберьф эряфкшу индиецне Мохиндера Сингх Гилл и Далжиндер Каур кулендсть эсь колгаст лама пеетькшнема. Мирдсь и рьвясь эрясть марса 47 киза, но идьсна ашельхть—Шкайсь ашезь макссе. Синць шабань колга  нльне арьсемдовок лоткасть, но весть Мохиндера и Далжиндер кульсть искусственнай оплодотворениять колга и састь мяльс аф нолдамс павазть.
Врачне ашесть кема тянди, но, мзярда тесттне няфтезь, што пациенткась шумбра, кярьмодсть тевти. Медикненди стакаль верондамс: 72 кизоса Далжиндер пекиясь и шачфтсь кафта килограммань сталмоса шумбра идь.
Эряфкшу тядясь сонць якай ёмланять мельге. «Тя пяк эряви тейнек,—мярьгсь Каур.—Тяни павазуван. Эряфонь вешфксозе пяшкотьф. Шкайсь кулезень озондоманьконь». Шачфтыхне-касфтыхне аф пелихть, што туйхть эряфста идьснон апак касфтт. «Шкайсь аф кадсамазь, сон лезды сембоса»,—арьси 79 кизоса алясь.
 
ПУТАН ТЯНДИ ПЕ
Лама киза Барнаулста  пильгфтома инвалидсь Максим Богдан ёрась получамс эряма васта государствать эзда, но тя ашезь лисе. Вете кизода инголе Богданонь кармась кельгомонза инвалидонди интернатста нянечкась Люба. Рьвяясть, но эрямс сашендови башка: Максим—интернатса, а Люба эсь идензон мархта—11 квадратнай метрань комнатаса.
Богдан лоткась «тюремда» эсь уженц инкса. Цебярь кулясь сась ёфси апак учсек. Барнаулецсь тяшнесь Москуста II группань инвалид авать  мархта. Аф кунара москвичкась гайфтсь и азозе, што мизе аф оцю бизнесонц, штоба тяшни ялгац рамаль квартира. «Путома пе тов-сей якамацти,—мярьгсь Максимонди содафоц.—Тят арьсе, што пяк и пяк козя ломанян. Эряфсонк вдь аш мезевок минцень. И тиендьсаськ семботь Шкаенди. Аф эряви киндивок мезевок азондомс—хуш лемозень тяк лятфне».
Богдан васенда ашезь веронда тянди. «Любаша ся шобдаваня ульсь вакссон—суткань сменада меле сашенды тейне,—мярьгсь алясь.—Мзярда азыне, кие гайфнесь и мезенди, рьвязе аварьгодсь». Тяни Максим рьванц мархта вешенди эряма васта, кона туй мялезост.
 
КОСА ВАСЕНЦЕДА НОЛДАФОЛЬ ВОДКАСЬ
Россияса илатнень васьфнесазь и праздновандасазь келиста. Пидихть-панихть, шрать лангс путнихть танцтинят, ну и, конешна, симомбяль. Илать пингста вастонц фалу мушендсы национальнай кяжинясь—водкась. Русскяй водкась—инь содави водкань брендсь мирса.
Водкась аноклави аф стакаста. Симомбяльсь получсеви тяфта: розть, тозерть, модамарьть, виноградть или якстеряпсонь патокать кадомс якама (бродить), сяльде дистиллировандамс. Водкась—тя ведь, примесь и приправа мархта этаноловай спирт. Дистилляционнай аппаратсь содафоль нинге XV векть песта и нолявсь тевс аф аньцек спиртонь, но и ароматическяй экстрактонь тиемста.
Алкоголень процентсь марнек объёмть эзда разнай водкань симомбяльса эрси 35 градусста сявомок 50 градусти молемс. Русскяй водкаса градуста 40.
Водкать тиема вастоц аф содаф. Но корхтайхть, бта васенцеда нолдафоль XIV-XV векста Восточнай Европаса. Советскяй историкть Вильям Похлебкинонь валонзон коряс, водкать васенцеда нолдазе эсь лацонь рецептс коре 1430 кизоня московскяй Кремляста Чудово монастырень монахсь Исидор. Сяс сидеста Россиять лемнесазь водкати шачема вастокс.
 
ФАЛУ ПЕЕДЕЗЬ…
Азербайджанонь       панттнень эса ули Огнепоклонникнень храмсна, коса эрь 40 шитнень примсихть ломатть, конатнень мяльсна пчкамс.
Тяса монахне и инжихне-пациенттне фалу якайхть       пеедезь. Ронгсна сембонь видет, кода кипарист (бта байдек нильсть). Тя храмса аф пчкафнихть, а тонафтсазь ломаттнень кеняртькшнемс эряфти и шарьхкотькшнемс эрь шить питненц. Аньцек лоткат      пеедемда—эстокиге улят наказаф: молят веденкса 8 вайгяльбет панттнень лангса и кандат 16 литра ведь 5 килограммань кукшеньца. Кда тисак тянь апак пеетть—тага молят веденкса. Ваныхне бинокльса ваныхть ведень кандыхнень мельге, мзярс сят кисот. Монахне корхтайхть, што тяфта синь пчкафнесазь пяк енюфнень амбицияснон и лиятнень коряс эсь пряснон сяда «оцюкс» лувомаснон. Методикась афкукс максси пяк цебярь результатт—инжихне ушеткшнихть, бта итть, кеняртькшнема семботи, мезсь перьфпяле и кельгозь ванондома тишеста эрь унжанять лангс. Ламотнень аш мяльсна тумс и синь ерайхть лядомс сей сембе пингс.

Аф лама сурхнень колга
—Мес анализонди верть фалу сявондьсазь лемфтома сурть эзда и аф нолнесазь тевс лиятнень?
—Лемфтома сурть лангста киськсь сяда шуваня лиятнень коряс. Тяда башка, эсонза сяда кржа нервнай окончанияда, тяконь лувкссот сярядемань рецепторхне. Сяс тя сурть эзда веронь сявомась аф сяшкава маряй. Сембода «прябалавусь»—вяшкянясь: сон кемоста сотф кядькргать мархта, сяс, кда сувафтомс тя сурста керфти инфекция, таргоземась может пачкодемс кядьлапшть мяньксонцты. Нинге кой-мезе сурхнень колга.
*Ученайхнень лувфснон коряс, ломанть эрь суроц эряфоньберьф мянцеви 25 миллионда ламоксть.
*Ков сяда кувака лемфтома сурсь, тов сяда кайгиста вятьсы прянц алясь, мезть аш кода азомс аватнень колга.

08.03.2017 №9
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин