https://mokshapr.ru
10.06.2022
 |
Архив | |
| апрель | ||||||
|---|---|---|---|---|---|---|
| 2024 | ||||||
| пн | вт | ср | чт | пт | сб | вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
 |
|
АЩЕКШНЕМС ФКЯ ВАСТСА—ПИНГЕ АШ!»—Анатолий Михайлович, кода содаф, республикань Культурань и Национальнай политикань министерствати путфт оцю вешфкст. Сяс пара улель содамс, кода молихть тячи тевонте?
—Министерствась тяфтама формаса, кодамса сон тячи пуроптф Мордовия Республикаса, работай аньцек омбоце ковсь. Но тя пингста тейнек удалась и культураса, и национальнай политикаса, и региональнай туризмаса пцтай сембе тефнень аф аньцек латцемс эсь вастоваст, но и срхкафтомс вастстост инголи! Тиемс тянь тейнек лездсь Российскяй Федерациянь государственнай культурнай политикань Стратегиясь, конань вешфксонзон коряс минь карматама работама 2030 кизоть самс. Штоба лувити сяда лац шарьхкодеволь тя документть эрявиксшиц и питнец, азса: сонь эзонза Россиянь Правительствась сувафтозень сембе вешфкснень, конат тяда инголи аф фкя лацонь нормативнай актса путневсть Культурань и Туризмань, Национальнай политикать коряс и социальнай лия министерстватнень инголе. Нят—Российскяй Федерациянь государственнай национальнай политикань Стратегиясь, инновационнай касомань-вииямань Стратегиясь, российскяй казачествать коряс государственнай политикань Стратегиясь, од ломанень государственнай политикань Основатне, международнай культурно-гуманитарнай сотрудничествань сфераса политикань Основной ширетне и лия стратегическяй документтне. Эрь шинь тевонзон республикань Культурань и Национальнай политикань министерствась тяфта жа мольфтьсыне Мордовия Республикань Оцюнять В.Д.Волковонь Государственнай Собранияти Посланиянц вешфксонзон коряс. —Анатолий Михайлович, тонь койсот, кода тячи эряй культурась республикать столицаса, районца и велеса? И мезе тинь ёратада тиемс, штоба сонь сядонга эреклафтомс и, пади, кеподемс од уровеньц? —Монь койсон, республикань культураса тефне вятевихть сатомшка эрьгавста. Мярьктяма, Саранск ошса культурнай эряфть мольфтьсазь профессиональнай вете театрат и кемотть библиотека и концертнай коллектив. Аф ащи фкя вастса культурась Мордовиянь районцовок и велеса. Тянь пяк лац няфнесы «Морак, гармония!» Народнай творчествань Республиканскяй конкурссь, конань мялень салай Гала-концертоц аф кунара тага ётась Мордовиять столицаса. Конешна, культурань отрасляса улихть прябалатка. Мярьктяма, сась пинге ладямс велень библиотекатнень и клупнень работаснон пингть вешфксонзон коряс. Сяс мес аш месть кирнемс библиотекать и клубть кодамовок ёмла веленяса сире и пялес калада кудняса, коза кивок аф якай. Меколанкт, ётафтомок синь книгань фондснон и лия уликсшиснон мархта, кепотьксонди, сяда оцю велень Культурань кудс, минь тихтяма ламода сяда козя учреждения, коза ломаттне кармайхть якама оцю мяльса. Тяда башка, сась пинге велень библиотекаса и клубса ламода сяда келиста нолямс тевс тя пингонь информационнай технологиятнень. Тиемс тянь и лия тефнень республикань культураса веши эздонк тячиень пингсь. И мон надиян, што марстонь вийса тейнек, Мордовия Республикань культурань отрасляса покодихненди, синь тиевихть цебярьста и эсь пингстост! —Киндивок аф секрет, Мордовия Республикась нароттнень ёткса межнациональнай и межконфессиональнай соткснень кемешиснон коряс сувси Россиянь инь стабильнай региоттнень ёткс. Пара улель содамс, мезть вельде теенть сатовсь тя оцю сатфкссь? —Азса эзк: тя сатфкссь тейнек сатовсь марстонь вийса тиф работать вельде Мордовия Республикань руководствать, Мордовиянь лия министерстватнень и ведомстватнень мархта. И тяка пингть эряви азомс, Мордовиянь лама национальностень народсь, эсь ёткованза ладязь и фкя-фкянь шарьхкодезь эрямок, сувафтозе инь оцю путксть тя сатфксти. Конешна, Мордовиянь Культурань и Национальнай политикань министерствась эсь ширденза тиендезе и тиендьсы семботь, штоба межнациональнай и межконфессиональнай сотксне шиста-шис и кизоста-кизос арсельхть сядонга кемокс. Ня и лия тевоньконь тиемста тейнек лездыхть республикань нароттнень национально-культурнай автономиясна и Мордовиянь общественнай лия организациятне. И теест сембонди тянкса мон азондан оцюдонга оцю сюкпря. Синдедост башка, нароттнень ёткса межнациональнай и межрелигиознай соткснень кемокстамаснонды,—аф аньцек Мордовия Республикаса, но и Россиянь лия регионца, коса компактнайста эряйхть мокшэрзятне, сувафнесазь эсь няевикс путксснон «Волга—река мира. Диалог культур волжских народов» этнокультурнай Международнай экспедициясь-фестивальсь и Мокшэрзянь народонь Межрегиональнай общественнай организациясь республикань и лия региональнай отделениянзон эрь шинь работаснон вельде. Тяфта жа оцю путкс сувафнихть межнациональнай и межрелигиознай соткснень кемокстамаснонды региональнай, межрегиональнай и всероссийскяй конференциятне, симпозиупне, «круглай шратне» и лия мероприятиятне, конатнень минь сатомшка сидеста ётафнесаськ Мордовиять столицаса. Эсост фалу сембе уликс прябалатне аф аньцек ванондовихть, но и латцевихть эрявикс кис, конатнень ланга мольфтемстост синь машфневихть. И нинге. 2015 кизоня минь ладяме цебярь соткст Национальносттнень тевснон коряс Федеральнай агентствать мархта, кона фалу максси тейнек эрявикс лезкс. Мярьктяма, Федеральнай агентствать лезксонц вельде 2016 кизоня Мордовияса тиф Мониторингонь система, конань коряс минь содасаськ, кода тячи ащихть тефне республикань межнациональнай и межрелигиознай сфераса. Сяс минь фалу ули пингоньке инголдамс тя или тона прябалать, кона, мярьктяма, аньцек ушедсь няфнема прянц. Агентствась тейнек тяфта жа лезды ярмакса. 2016 кизоня тейнек максфоль мероприятиянь ётафтомс, конат лемтьфтольхть российскяй нациянь нароттнень ёткса сембе ширдень соткснень кемокстамаснонды, 2 миллиотт 6 сятт тёжянь цалковай. Но тевда инголе нинге лама. Аф ваномок тянь лангс, мес Мордовия Республикась нароттнень ёткса межнациональнай и межрелигиознай соткснень кемешиснон коряс Приволжскяй федеральнай округса ащи 1-це, а Россияса—7-це вастса, тейнек ули мезень лангса работамс. Сяс фкя вастса ащекшнемс—пинге аш. —Анатолий Михайлович, Россияса тячи мольфтевихть корхтамат российскяй нациять колга закононь анокламать квалма. Тонь койсот, эряви ли сон тячи Россиянь нароттненди? —Тяфтама закононь колга мяльхть васенцеда азфтольхть 2016 кизонь 31 октябрьста Астраханьца, коса ётась Российскяй Федерациянь Президентть видеса Межнациональнай соткснень коряс Советть заседанияц. Россиянь Президентсь В.В.Путин тяфта жа кирдезень ня мяльхнень ширеснон. Моньге койсон, тяфтама закон тейнек эряви. И аф сяшкава важна, кодама лем ала сон лиси. Но лисемдонза инголе эряви тиемс стане, штоба сонь вешфксонзон колга содальхть Россиянь сембе нароттне. Пади, кой-кит эздост сувафтсазь тя законти эсь мяльснон-арьсемаснон. Эста кивок эздонк обжафокс аф ули. Но тяка пингть, варжакстомок тячиень эряфть лангс, мон сань тяфтама мяльс: Россияса российскяй фкя нация, коза сувсихть странаньконь сембе народонза, ули ни. И минь эрятама марстонь эряфса, ванфнемок национальнай эсь лацонь шиньконь, культураньконь, коеньконь-обуцяньконь! —Республикаса аф кунара «Дом дружбы народов Республики Мордовия» лем ала панчф-тиф общественнай од организация... —Шарьхкодень. Миньцонк тя организациясь тиф сянкса, штоба сон араль координаторкс Мордовиянь нароттнень национально-культурнай и общественнай лия организацияснон работаснонды. Кода няфнесы тя «Ялгаксшинь куттнень» работасна Удмуртия, Татарстан, Башкортостан Республикаса и Самарскяй областьса, синь лезксснон вельде национально-культурнай автономиятнень и общественнай лия организациятнень тевснон эффективностьсна няевиста кассь! —Сюкпря, Анатолий Михайлович. В.НЕСТЕРОВ. |
|
НОВОСТИ | |
