Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Юмор и сатира

ФЕДЯРЯТЬ ЭРЯФСТА

 Понедельникста
Комсь сисемге кизоса Федярясь лоткась работамда.
—Монь идне,—отвечай сон, кодак лятфтайхть работань квалма.
—Иттнень ясляв вятить.
—Ахать, ясляв! Катк вятнесазь тоза сят, кинди синь аф ужяльхть. А мон мака панчфкянень...
Сонць мирдсь Фёдор механизатор. Стяй шобдава ранакиге.
—Алду, пиделеть мезе-мезе...
—А кода стяян?—каршезонза рьвясь.—Аньцек тарозеван, Мишась сргози. Веньберьф лопанязе кецордсь—моцец аш.
И хуш Фёдор содасы—цёрасна удось лац, аф азы мезевок, туй работама.
Кемоньшка частста Алду стяй, уштсы пянакудть и тонги тоза цюгутт. Сонць сяви ведаркат и—эши лангс. А тоса шабравась Маря. И ушедыхть клят-млят. Юкстасазь, местема састь, стаки лаборфтсазь сембе кулятнень, тифтенянь лочасазь.
А кудса авардихть ни шабатне, цюгуттнень эзда ведсь кунара коськсь, толть эзда якстерьгодсть, цють аф лопадихть. Сувай Алду куду, пенгятне мадсть—тага лият путы, цюгуннятненди каяй лия ведь.
Аньцек ушедсы тевонц, сувай омбоце шабравац—Максиморясь. Калякондайхть Максиморять мархта сянь колга, кодама аф уряднай Маря, конашкава аф кельгсы работаманц.
—Пади, тонь тевце?—кизефтьсы Алдувонь Максиморясь, хуш и афи срхкай тумс.
—Мезень тев!—фатясы азоравась.—Шись кувака, кенерян.
Шиньберьф качады Федярять трубац, тжнайхть пенгятне, тага ни шамсть цюгуттне. Авардихть иттне—тядяснон аш пингоц шаромс перьфкаст. Эряви теенза нинге содамс, кода эряй од рьвянять мархта Поля баба, мес Петя ашезе сяве рьвакс Кулянь, кинь пери ётай илять сувсесь Васярять сявац.
 Шавшиста
Шить сюролданза  ляцсть Федярять сельмос. Авась пувордазе кургонц, сядонга пяк конезень сельмонзон. Эряволь шарфтомс омбоце боконц лангс, да ашель мялец.
—Федя,..—сярядиень вайгяльса пшкядсь сон.—Федя! Кивок ашезь отвеча. Федярясь юкстазе ни, што мирдец тусь паксяв, а идьсна авозенц ширесотольхть.
Кочказень Федярясь сембе виензон, шарфтсь омбоце боконц лангс. Стенаса чакиесть часттне: ёмла стрелканясь няфнезе ни кемонть. «Стяма, штоли?—арьсесь Федярясь.—Али учемаль Федя?»
И тага матодовсь. Сргозсь, мзярда кие-бди ляпоняста токазе лафтус. Панжезень сельмонзон—Федя.
—Сать, седифтома ломань? Тейть кшнинь тракторсь сяда ужяль. А рьвяце мяльсотка аш. Катк сяряди, катк кулы.
Мирдть мезе-бди мялецоль азомс, но Федярясь ашезе када.
—Митярясь, няк, кода сярядсь. Ускозе Митя Пандавели воражия бабанди—и, мярьгат, кие-бди нолдазень урманзон.
—Райцентрав эряви молемс, враченди,— пшкядсь Федя.
—Мезе тиихть врачне  монь урмазти,—тихольгодсь рьвац.—Саф урмазе, тиемазь тяфта!..
Мзярда Федя лиссь кудста, сувась Акуль баба.
—Стаки сярядат?—пшкядсь сон Федяряти.—Стяк, баня уштонь...
Аф ламос ащезь синь ульсть ни псиста уштф баняса. Васендакиге Акуль баба мезенди-бди сельгсь нилексть ужетненди, а меле саворне мторгодсь: «Ворьть тяста, ворьть тоста, ату каян клокса...»
Меле симдезе Федярять кати-кодама ведняда, а сонць арась плманжа лангс.
—Илядень заря, шобдавань заря... Улель тяла, мулень эй варя. Муськолине Алдунь, катк аф ламода калголь...
Меле куцьфтезе Федярять полканя лангс, нолдафтозень шяярензон, панжезе баня вальдерьмонять и, тяльмоса яфиезь, ушедсь тюхиема.
Састь куду мянь иляденди. Федярясь лихтсь вина, пуштсь алхт.
—Тяфтама урматне фершалонди аф пчкафтовихть,—ярхцамбачк азондсь Акуль баба.—Синь аньцек мон содасайне...
Федярять ширеста Акуль баба лиссь шобданяста. Кавлалонза мезе-бди ашкотфоль нуланяса.
Вержиста
Федя сувась куду, ашезь  кенере штамс-нардамс, а Алду ушедсь кизефнемонза:
—Рамать?
—Мезе?—ашезь шарьхкоде мирдсь.
—Мезе? Мезе?—дразнязе рьвясь.—Васярясь вов омбонц кямотнень фатязень и платьянди отрез районцта усксь Васяц.
—Аф Вася,—кяждонза мярьгсь Федя,—а сонць Васярясь, районца васенце вастти лиссь, лама лофца потясь. Вов и казезь.
Азозень ня валхнень и каендась. Алду эстокиге аварьгодсь. Тоса фатясь шра лангста тарелка, цяподезе кияксти.
—А-а, тейть Васярясь пара! А мон...
Кати-мзярс нинге тарондоль рьвац, но Федя крьвястсь папироса и лиссь кудста. Аськолясь ульцява и арьсесь: «Месендема мархтонза? Ломаттнень эзда визькс...»
Федярясь мирденц тумда меле пяляскоткшнесь аф ламос. Варжакстсь кафта шири и колай катокс маладсь пиджаконцты. Эрязста сюволдазе зепть и мусь тоста газета. Келептезе, а тоста лангозонза ваныхть Федя да нюрьхкяняста керф шяярь ава. Трнатозевсть Федярять пильгонза, нльне лонтядсь кроватенц лангс. «Вов мес Федя тяни тяфтама! Пади, кунара ни содайхть фкя-фкянь? А мон тяса...»
Мзярда Федя сувась куду, рьвац комотсь каршезонза карьхциганкс, сонць яфиезе газетать.
—Тя кие тяфтама нармонць?..
—Тя аф нармонь, а ломань,—азозе Федя и мзолгодсь.—Совещанияса улеме марса.—Тоса мольсь цёранцты, кона мезе-бди возясь шрать ваксса, кошардозе:—Коля, лувк, мезе сёрматф...
Коля сявозе газетать, аф эрязста ушедсь лувома: «Кеветиеце кизось работай машинаса Прасковья Андреевна Гаршина. Кой-кит корхнихть, кле, тя аф авань тев, а Прасковья Андреевна арьси лиякс. Сон работай механизаторкс. Гаршина ялгась азондсы опытонц...»
—Саты!—мярьгсь Федярясь.—Содаса, мезе азонды...—И аварьгодсь вярьгак вайгяльхть...
П.ВЕЛЬМАТОВ.
 

30.03.2017 №12
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин