Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

В Госсобрании РМ

Ванондовсть тячиень шинь кизефксне

26 апрельста Саранскяйса Мордовия Республикань Государственнай Собранияса ётась Мордовия Республикань котоце созывонь Государственнай Собраниять кемонце сессияц. Работасонза примась участия Мордовия Республикань Правительствать Председателец В.Ф.Сушков, вятезе сессиять Мордовия Республикань Государственнай Собраниять Председателец В.В.Чибиркин.
Кемонце сессиять ушедомста В.В.Чибиркин пачфтсь пуромфненди Российскяй парламентаризмань шить мяльса кирдезь, 24 апрельста Санкт-Петербургса Таврическяй Дворецса Российскяй Федерациянь Законодательхнень Советснон ётафтоманц колга. Пингстонза Российскяй Федерациянь Президентсь В.В.Путин васетькшнесь вяре азф Советть членонзон мархта. Владимир Владимирович шарфтсь мяль сянди, што странасонк тиф парламентаризмать тячиень шинь вешфксонзонды отвечай кеме система, эрьгавста работайхть сембе уровенень властень законодательнай и представительнай оргаттне: Федеральнай Собранияста сявомок региональнай парламенттненди молемс, муниципальнай советтне. И нинге. Обществасонк коль кочкси вийхть уважандамась парламентскяй ширети, региоттнень эса и целайнек странаса властень оргаттненди.
Информациять кулхцондомдонза меле депутаттне кярьмодсть работати.
Шинь повесткати сувафтф кизефкснень эзда васенце вастса ащесь «2017 кизонди и 2018 и 2019 кизотнень плановай периодснонды Мордовия Республикань республиканскяй бюджетть колга» Мордовия Республикань Законти полафтксонь сувафтомать колга» Мордовия Республикань законть проектонц колга кизефкссь. Тянь квалма корхтась Мордовия Республикань финансонь министрть тевонзон тиендисна Л.В.Романенкова. Сонь валонзон коряс, федеральнай центраста республикати финансовай лезкссь касы 660 миллион цалковайда. Эздост 145 миллионць карьхцяви общай пользованиянь автомобильнай китнень петемаснонды, 514 миллионць—ломаттнень аварийнай эряма фондста лия эряма вастс ётафтомаснонды и стак тов.
Сессияса депутаттне ванозь и лия кизефкснень. Кепотьксонди, фкясь эздост лемтьфоль библиотекатнень, синь фондснон ванфтомаснонды и Мордовиянь эряйхнень библиотечнай обслуживанияснон цебярьгофтоманцты. Велень библиотекатне сувайхть райоттнень централизованнай библиотечнай системазост структурнай подразделения лаца. Велень библиотекатнень эса работайхнень лувкссна аф кирьфтави.
Депутаттненди и сессияс пуромфненди доклад тись Мордовия Республикаса ломанть праванзон коряс Уполномоченнайсь Ю.А.Ястребцев.
Шинь повесткати сувафтф кефкие кизефкснень ваномдост меле  ётафоль мекольцети—кемгафтувоцети. Лемтьфоль сон 2016 кизоня Российскяй Федерациянь Правительствать работанц колга Российскяй Федерациянь Федеральнай Собраниянь Государственнай Думать депутатонзон инголе отчётть квалма информацияти. Тянь коряс Мордовия Республикань Государственнай Собраниянь депутаттненди пачфтсть Российскяй Федерациянь Государственнай Думань Транспортть и строительствать коряс комитетть председателенц васенце заместителец В.Б.Ефимов и Россиянь Государственнай Думань Аграрнай кизефкснень коряс комитетть членоц А.В.Воробьёв.
Т.АЛЬШИНА.

04.05.2017 №17
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин