Левжаса ётасть Учватовскяй ветеце лувоматне

МЯЛЯМСЬ КОЛГАНЗА ЭРЯЙ ЛОМАТТНЕНЬ СЕДИСА
20 апрельста Рузаевскяй райононь Левжа велеса ётафтовсть Учватовскяй ветеце лувоматне. Тядде тя илась ульсь Очижинь недяляста, сяс велень школаса, коза кочксевсть инжихне, сембонь васьфнезь «Христоссь эреклась» валса. А пуромфта тяса ульсь сатомшка: пцтай сембе райононь школатнень эзда тонафнихть, синь тонафтысна, Рузаевскяй муниципальнай райононь администрациянь оцюнять заместителец О.П.Кастрова, писательть Н.И.Учватовонь стирец Наталья Николаевна, Россиянь Писателень союзонь членць Р.К.Орлова, «Мокшень правда» газетать главнай редакторонц заместителец Н.М.Лобанов,  «Тяштеня» идень эстетическяй воспитаниянь центрать директороц А.И.Тишкина и лия инжихть.
Илась панжевсь «Левжа велесь» мокшень мороть мархта, конань пяк цебярьста моразь тястонь школань тонафнихне. Кулхцондат мороть эса и прязт сашендыхть лятфнемат велень содаф ломаттнень колга—писательть Н.И.Учватовонь, Россиянь и Мордовиянь Народнай артисткать М.Н.Антоновать, Россиянь Заслуженнай артисткать Юлия Учватовать, Мордовия Республикань Заслуженнай артисткать Инна Учватовать и ламотнень лиятнень. Васенце вастса, содаф, тя шиня ульсь журналистть и редакторть, поэтть и прозаикть Н.И.Учватовонь творчествац, сонь колганза лятфнематне.
—Вете кизот мельцек минь марса кочксефтяма тяза, штоба нинге и нинге весть лятфтамс тя смузю, творчествань ширде козя, пара вайме ломанть,—мярьгсь Рузаевскяй муниципальнай райононь администрациянь оцюнять заместителец О.П.Костровась.—Пяк пара, мес земляконьконь лемоц апак юкстак, сонь творчествац тонафневи школаса, вуснень эса, лемозонза ётафневихть литературнай лувомат.
И аф аньцек Ольга Петровнань седиса ся шиня ульсь лямбе, писательть Н.И.Учватовонь творчестванц колга кепотьф мяльса азондсть и лия инжихне. Поэтессась Раиса Константиновна Орлова азсь оцю сюкпря велеряйхненди сянкса, мес синь тиендьсазь семботь, штоба Николай Учватовонди лемтьф эрь кизонь лувоматне ётнельхть нинге сяда мялень салайста, и штоба эсост примальхть участия аф аньцек эсь райононь эряйхне, но и марнек республикаста. Сон лувозень эсь од стихонзон, конат аньцек аноклавихть печатьс. Тердезень оттнень кельгомс эсь мокшень кяленьконь, сяда лама лувондомс тядянь-алянь кяльса произведеният, кулхцондомс мокшень морот, латцемс эрь кодама сценкат.
Р.Орловать валонзон поладозень «Мокшень правда» газетать редакторонц заместителец Н.М.Лобанов. Сон тяфта жа лац содазе Николай Учватовонь. Н.П.Огаревонь лемса Мордовскяй госуниверситетса тонафнемста сидеста сёрматкшнесь эсь кяльсонк лисенди газетати заметкат, ся пингть редакторкс ульсь Н.И.Учватов. Газетать вятиец эста тонафтсь од   журналисттнень эса кода мушендомс тематнень, мезень лангс шарфтома сяда оцю мяль, кода строчка вельде аф обжамс ломанть.
—«Мокшень правда» газетаса фалу лятфнесаськ Н.И.Учватовонь лемонц,—мярьгсь Н.Лобанов.—Сон ульсь ся редакторхнень эзда, кона шинек-венек арьсесь газетать вандыень шинц колга, кода тиемс сяда мялень салайкс, кеподемс тираженц. Лама лезнесь коллективть эрь сотрудниконцты—кинди квартирань получамаса, а кинди лия аф сяда емла тевса. Ня цебярь традициятне редакцияса эряйхть тячемс.
Лямбоста васедемаса алянц колга корхтась писательть стирец, физико-математическяй наукань кандидатсь Наталья Николаевна Учватовась. Сон сяда лама азондсь сянь колга, кодамоль аляц кудса, кодама теждя мархтонза ульсь, мезьс тонафтсь.
—Алязень мялецоль, штоба мон тулень сонь киганза, шарфтолень мяль гуманитарнай наукати,—мярьгсь Наталья Николаевна.—Но мон сяда кельгине математикать, сяс стака тейне ульсь шарфтомс тя киста. Но книгань морафтомать, мезти тяфта жа тонафтсь алязе, ашине када. Лувондан оцю мяльса, сяконь лувксса и эсь писателеньконь произведенияснон. Сембе раднянень эзда сюконян илань арьсихненди, мес тняра киза етафневихть алязень лемса лувоматне.
Кашт аф молезь пуромфне кулхцондозь «Тяштеня» идень эстетическяй воспитаниянь центрать директоронц  А.И.Тишкинать, Левжа велень администрациянь оцюнять А.А.Рузмановонь, Рузаевскяй муниципальнай райононь образованиянь Управлениять начальниконц заместителенц Т.В.Гуренковать и лиятнень корхтамаснон.
Тя шиня райононь школатнень эса тонафнихне лувсть стихт, произведенияста пакшт рузонь и мокшень кяльса, няфтсть сценкат, морасть морот. Пара мяльса кулхцонтфоль Сузгярьге велень школань тонафнись Ксенья Амбаевась. Сон лувозе эсь велень поэтть Зинаида       Ельмеевать «Кукуня» стихотворениянц. Лувозе стане седиень токазь, ламонцнень нльне тусть сельмоведьсна. Елизавета Петровичевась—Болду велень школань тонафнись лувозе писательть В.Левинонь «Сире ката» произведениястонза пакшть. Кулхцондыхне шназь стирнять и ламос теенза цяпасть.
Цебярьста азондсть стихотвореният Екатерина Модонова, Илья Леонов, Юлия Тувышкина. Сембонди теест максфтольхть благодарностень сертификатт, казнет.
Тяда башка, тя шиня етафтовсть мастер-класст, коса      иттнень тонафнезь сюреса стама-кодама, аноклафоль выставка. Учватовскяй лувоматне сембонь седиса кадсть пара лятфнемат.