Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

ЁТАЗЕНЬ ТОЛУ КИТНЕНЬ

Ванондомок 1941-1945 кизонь Военнай и трудовой подвигонь мемориальнай музеень  фондста документтнень и фронтовиконь сёрматнень, инголет эвондакшнихть сят, кит эряфонь аф ужяльдезь тюрсть   фашисттнень каршес. Фкясь синь эздост—Пётр Владимирович Латухов.
Пётр Владимирович  войнать ушедозе соксонь батальонца, кона лия войскатнень мархта аралась Москуть эса Брянщинать ширде. Маштозь пяшкоткшнезень командирхнень приказснон, а мзярда тонадсь лац тюрема  фашисттнень каршес, кучсезь сонь бой мархта разведкас.
Сонь мялямстонза ламос ашезь нардав 1942 кизонь 4 апрельсь. Эста ульсь стака тюрема. Латухофонь батальоноц врагть эзда аралась оцю веле. Стакаста мольсть инголи миннетне. Фашистонь пулеметтне апак лотксек цятордсть. Пряцевок аф кеподеви. Тя бойть пингста стакаста ранендафоль Пётр Латухов, конань медсанбату ускозь ёжефтома. Сяльде сонь  прважазь Омск ошень эвакогоспитали.  Пчкамда меле теенза максфтольхть  нинге  шит, штоба  сяда кемоксталезе шумбрашинц. Ламос ашезь ваймосе, сон  мольсь военнай комиссариату, коста кучезь Москуву связень училищав. Нюрьхкяня пингста 1942 кизоня аделазень тостонь курснень—и Пётр Латухов повсь Сталинграду, косоль связень особай батальонць.
...Сёксень веть  няевсть Волга ляйть  беряконза. Кержи ширеса, косоль минь армияньконь резервань команднай пунктоц, шобдаль, весь равжель. Видиса—толть, нолневи ракетатнень эзда—валдоль. Тяни  колмоцеда мольфтевсь фашисттнень позицияснонды эцемась, тяда инголе кафттне ашесть удала. Валом венчсь, косоль связистсь Латухов, уи кельме ведьге. Связень кабельть, кона эряви ётафтомс резервань командань пункту, ведти нолнесы  минь земляконьке. Кабельсь валом-валом  тушенды ведть алу. Лама мезе шоряй связисттненди  тевонь тиемстост. Нолдаф ракетатнень валдсна  комафнесыне синь и пцтай ваймоснонга аф тарксесазь. Связисттне учихть ракетнай валдть мадоманц, штоба мольфтемс тевть сяда тов. Аф ичкозе эздост сязендевихть снарятт, минат.  Аф ваномок тянь лангс, кабельсь ётафтовсь эрявикс вастс. Командиронь приказсь пяшкодевсь.
Связистти П.В.Латуховонди аф фкя вайгяльбе савсь комада и пеккедь лангса шашнемс Сталинградскяй модать ланга.  Вдь вяшконди пулятне ашесть макссе кепсемс пря,  удалай   тя пингть, лядат шиса.   Войнань пингть тиендемок эсь тевснон,   связисттне сязендсть аф фкя шинель. Связень особай батальонць, косоль и Латухов, ульсь Сталинградса снярс, мзярс апак машфтфтольхть   фашисттне, сявфт пленц. Связистсь Латухов  эста казьфоль «За оборону Сталинграда» медальса.
Сяльде ульсть бойхть Украинать моданц лангса, 1944 кизоть кучкаста примась участия Белорусскяй и Восточно-Прусскяй операциятнень мольфтемста бойхнень эса, Кёнигсберг ошть сявомста тяфта жа тиендезе семботь, штоба армейскяй частьтнень ёткса фкя-фкянь мархта кирдеволь соткс.
И вов 1945 кизонь июньцта Краснай Знамянь орденонь кавалерсь и лама медальса казьф сержантсь Латухов парадонь аськолксса ётась Краснай площадьге Моску ошса. Сон лядсь шиса, а брадонза шавовсть фронтса. Войнада меле лама киза Пётр Владимирович Латухов покодсь Сире Синдру велень связень узелса, 22 киза ульсь директоркс тостонь плодопитомникса, кона  инь цебярсель Краснослободскяй районца.
Лама  киза войнань и трудонь ветеранць аш ни шиса, но сонь колганза мялямсь лядсь и ляды сембе пингс ламоц поколениятненди.
О.ЗАБНЕНКОВА,
1941-1945 кизонь Военнай и трудовой подвигонь мемориальнай музеень научнай сотрудник.

15.05.2017 №18
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин