Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Как жили и живут мокшане

ОЦЮ МОКШЕНЬ ПАШАД

.Кодама аньцек уезттненди,     волосттненди, райоттненди ашезь сувсе Оцю Мокшень Пашадсь! Велеса улихть ломатть, конат мяляфтсазь Пурдошанскяй, Ельниковскяй и Краснослободскяй райоттнень эса улеманц.
 Етай веконь сизьгемонце кизотнень сон меки мрдафтфоль Ельниковскяй районти. Райцентрать эзда населеннай тя пунктсь ащи 20, а Ковылкина кинь станциять—85 вайгяльбень вастса.
Велеть историяса салси мяль ся, што 1853 кизоти Оцю Мокшень Пашадсь лувондовсь пристанькс. Азороц И.Я.Кошелев баржаса пачфнесь сталмот Краснослободскяи, Рыбкинав, Ковылкинав, Наровчату, Темникаву и лия пристаттненди. Сяка кизотнень велеса ульсть поташнай заведеният, кузенцят, варма меленцят. Велесь кизоста-кизос касондсь. 1913 кизоня тяса ульсь 204 куд, эрясь 1581 ломань. Комозце векть ушетксста панчфтольхть церковно-приходской школа, кшинь лавка, варма колма меленцят, ваень пихтема кота помещеният, ямксонь тиема цех, кафта кузенцят, кирпицень тиема кафта помещеният, виннай колма лавкат.
Мярьгомс, што стакаста тя велеса эрясть ломаттне империалистическяй войнань и революцияда ингольдень кизотнень аш кода. Хуш и тиендевсть сембе тефне кядьса, ярхцамбяльсь сатнесь од урожайти. Эрь кудса сатомшкаль жувата. Оцю Мокшень Пашад велеть ваксстонь населеннай пункттнень эса эрясть татархт, а синь кельгозь алашатнень. Нинге ся кизотнень синь ладясть мокшетнень мархта, тонафтозь мекольцетнень алашань кирдема.
Васенце мировой, а меле гражданскяй войнатне ломаттнень эзда вешсть аф ёмла ярмакт. Войскатненди эрявсть алашат, ярхцамбяль, щапт. Оцю Мокшень Пашадонь и маластонь велень эряйхне фронту прважсесть боевой алашат, почф и щапт.
Советскяй властть Оцю Мокшень Пашадонь эряйхне васьфтезь аф фкя лацоннекс. Ламотнень ашель мяльсна сувамс коллективнай хозяйствас. Аньцек 1929 кизоня пуроптфоль «Валда ян» велень хозяйствань артель. Коллективсь сувсесь Пурдошанскяй району. Артельть паксянза таргафтольхть Мокша ляйть кафта трваванза и велеть песа. Колхозникне касфнесть тозер, розь, ячмень, люкшя, сура, чечевица, модамарь, перень лия серот. Ферматнень эса кирдевсть алашат, букат, тракст, учат, тувот. Макссеви заданиятне продукциянь получамать коряс фалу пяшкотькшневсть вельф.
Мзярдовок аф юкставихть Великай Отечественнай войнань 1941-1945 кизотне. Пцтай 300 аля тусь эста немецнень каршес тюрема. Пяледа ламосна ашесть мрда шачема-касома шири. Сембонь лемсна серматфт велеть кучкаса ащи обелискти. Мрдайхнень подвигснон колга лама тяштьфоль массовай информациянь средстватнень эса, Боевой славань и трудовой доблестень районнай книгаса, конань 2010 кизоня нолдазе Мордовскяй книжнай издательствась.
Войнада мельдень кизотнень Оцю Мокшень Пашадса эвондасть оцю полафткст. «Ленинская трибуна» Пурдошанскяй райгазетась пачфнесь «Валда ян» колхозникнень сатфксснон колга. Вов фкясь эздост. «Инь цебярь животноводкс районца лувондовсь фермань заведующайсь Ф.Д.Юшин. Фермасонза лувондовсь 138 тракс. Планц коре эрявсь потямс 39 тежянь литра лофца, а потьневсь 46-да лама. 36 вазнять вастс получсевсь 51. Тянкса вете дояркатненди макссевсь дополнительнай зарплата, а Юшкинонди—186 литра лофца».
Тяка изданияса азондовсь, што Оцю Мокшень Пашадонь эряйхне 1941 кизонь октябрьста и ноябрьста Краснай Армияти прважасть 86 пара валенця, учань 27 ор, 30 пара понань варяга и комозьда лама пара цюлкат. «Валда ян» колхозса войнань кизотнень покодсь 187 колхозница и стирнят и цёранят.
Кодама аньцек полафткст ашесть тиендев велень производстваса войнада мельдень кизотнень. Мольфтевсь государстваньконь индустриализацияц, пчкафневсть войнада мельдень сярятьфксне, стройсевсть промышленнай предприятият, ошт и стак тов. Полафнесть тефне и эряфсь велеса. Ушедсь хозяйстватнень касфнемасна. Пурдошанскяй районть пяледа ламоц етафтфоль Ельникаву. «Валда ян» колхозти сувафтфтольхть «Путь Сталина» (Вачеевка велесь) и ламоц лия хозяйстватне. Руснень, мокшетнень, татархнень од хозяйстваснонды максфоль «Дружба» лем. Центральнай усадьбанди кочкафоль Оцю Мокшень Пашадсь.
Афкуксонь интернациональнайкс арась тя колхозсь районца. Мяль вельде ломаттне покодсть сембе тевса. Кизоста-кизос касондсть показательхне. Инь удалафокс велеряйхне тянемс лувондсазь «застойнай» кизотнень. Председателькс эста ульсь Равиль Ряхимович Кутуев. Велеряйхне ся пинкнень лятьфнесазь аньцек лямбе валса. Вииясь производствась, стройсевсть специалисттненди и од колхозникненди эряма кутт. Ульцятнень эзга нолявсь водопровод, шувондовсть эшихть… Оцю Мокшень Пашадса панжезень кенкшензон кафта этажса административнай зданиясь. Тясотольхть аф аньцек колхозонь правлениясь, но и велень Советсь, медицинскяй амбулаториясь, бытовой обслуживаниянь цехсь. Велеса аф кржа тифоль ученайть и агрономть, мокшалять Николай Иванович Артминонь пингста.
Меле пингсь полафтсь.
…Тяни хуш и шамондыхть велетне, но эряйхне оцю гордость маряйхть содаф ломаньцнон инкса. Оцю Мокшень Пашадсь—педагокнень Кирдяшкиттнень, Бородачёфнень, прозаикть Михаил Кяшкинонь шачема велесна. Синь колгаст азондома башка.
Мирттнень-рьвятнень Иван Семёнович и Соломонида Степановна Бородачёфнень семьяса шачсть-кассть вете итть: стирьсна Марфа и ниле церасна—Пётр, Михаил, Иван и Василий. Войнада инголе сембе цератне работасть учителькс, сяльде тюрсть немецнень каршес, ранендафтольхть, но мрдасть куду и тага кярьмодсть кельгома тевснонды.
Колгаст лятфни педагоксь, трудонь ветеранць Полина Андреевна Мялькинась: «Лац содайне Иван Иванович и Михаил Иванович Бородачёфнень. Иван Иванович директороль Ново-Ямской средняй школаса, коса тонафнень оцю класснень эса. Интернатсь ёмлаль, сембе иттне ашесть тяльгонде и сон ламонди мушендсь квартират. Пяк кельгозь учительхне и тонафнихне. Мзярда аделайне пединститутть и сань работама математикань учителькс Оцю Мокшень Пашадонь средняй школав, тяса директороль Михаил Иванович».
Учителень династиянь ушедыкс лувондови Кирдяшкиттнень семьясна. Василий Герасимович Кирдяшкин Октябрьскяй революцияда инголе тонафнесь велень церковно-приходской школаса, а меле писарель и сембе эряфонц сотозе народнай образованиять мархта. 1936 кизоня Оцю Мокшень Пашадса панжевсь средняй школась и сон путфоль тоза директоркс. Ся пингть тяса тонафнесь 300-да лама цераня и стирня. Сашендсть итть рузонь и татаронь велетнень эзда. Войнань кизотнень Василий Герасимович лама тись, штоба иттне афолезь кадонда школать, панчсь столовай, лезнесь школьникненди щамса-карямса. Школань директорсь эсь ярмаконзон лангс рамсесь колодкат и карень кодамс инструментт. 1943 кизоня сон тусь фронту. Победань шить васьфтезе Берлинца. Мрдась велезонза, эряйхне сонь кочказь «Валда ян» колхозти председателькс. Пенсияс тумозонза школаса математикань учителель.
Алянц тевонзон поладозь церанза Виктор и Пётр. Виктор Васильевич шачсь 1920 кизоня. 1938 кизоня тонафнесь Темниковскяй педучилищаса. Аделамдонза меле работась школаса, 1940 кизоня сявозь Якстерь Армияв. Служась Дальняй Востокса, тяса етафтозень войнань кизотнень, тюрсь японецнень каршес.
Демобилизацияда меле мрдась Мордовияв, тонафнесь и работась партийнай и советскяй оргаттнень эса. 1960 кизоня Виктор Васильевич путфоль Мордовскяй АССР-нь образованиянь министркс, тиендезе тя тевть 25 киза. Сон—МАССР-нь и РСФСР-нь Заслуженнай учитель. Лемонц каннесы родной велень средняй школась.     МАССР-нь Заслуженнай учителень лем максфоль Виктор Васильевичень брадонцты Пётр Васильевиченди. Мекольцеть руководстванц ала 1968 кизоня велеса строяфоль кирпицень кафта этажса школа.
Мокшень Пашадонь эряйхне афкуксонь гордость маряйхть содаф журналистть и писательть Михаил Кяшкинонь инкса. Сон лама тяштсь войнать колга, конань васьфтезе Брестскяй крепостень аралайхнень мархта. Кельгозе емла родинанц, пачфнесь велеряйхнень тевснон и эряфснон колга «Мокшень правдаса» работамста.
Азонтф ломаттнень и лия велеряйхнень колга лама материал ули школань музейса.
В.ЕРЁМКИН.

15.05.2017 №18
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин