Поиск по сайту: 
 

Архив
 октябрь 
 2018 
пн вт ср чт пт сб вс
1234567
891011121314
15161718192021
22232425262728
293031    

 
 

 

Наши мокшанские сыновья и дочери

М.П.Девятаевонь 100 кизонь топодеманцты

Мордовиянь сембе эряйхне, аф ваномок национальностьснон лангс, маряйхть оцю гордость земляконьконь, Советскяй Союзонь Геройть, легендарнай летчикть, Торбеевань мокшалять Михаил Петрович Девятаевонь инкса. Сонь подвигоц, марнек эряфонь киц арсихть мужествань, Родинати оцю кельгомань цебярь примеркс ламоц поколениятненди. Войнань кизотнень киртьф нужатне ашезь кевонзафта мокшалять седиенц. Михаил Петрович фалу лядондсь панжада вайме, лиянь ризфонь-пичефксонь шарьхкоди ломанькс, ульсь надияма вастокс семьянцты и сембонди, кинди удалась улемс содафокс мархтонза.
Тядде Советскяй Союзонь Геройти топодель 100 киза.
Мордовия Республикань культурань Заслуженнай работниксь Ю.Ф.Юшкин лац содазе М.П.Девятаевонь, сонь семьянц, аф весть васетькшнесь мархтонза, улендсь ширесонза, тяштсь колганза книгат. Аф кунара Юрий Фроловичень мархта васетькшнесь корреспондентоньке и эняльдсь лятфнемс содаф земляконьконь колга.
Ю.Ф.Юшкин:
 «ЛИЯНЬ РИЗФНЕНЬ-ПИЧЕФКСНЕНЬ МАРЯЗЕНЬ СОНЦЕННЕТНЕНЬ ЛАЦА»
—Юрий Фролович, азонтт, пожалуйста, М.П.Девятаевонь мархта содафтомацень колга. Кодама ломанькс сон тейть мяляфтовсь?
—Михаил Петровичень ульсь пара коец—эрь кизоня сон сашенкшнесь емла родиназонза тядянц, Акулина Дмитриевнань, калмонянц лангс, тияк васетькшнесь велеряйхнень мархта. Тяфтама васедемаса Торбееваса удалась улемс тейневок. Тя ульсь 1965 кизоня. Эста работань районнай газетать редакцияса. Маладонь теенза виздезь, азыне лемозень. А Михаил Петрович корхтазевсь мархтон кода кунардонь ялганц мархта. Эзк шарьхкодевсь сонь ломаттненди панжадокс улемац.
М.П.Девятаев мялямган фалу ульсь эрьгав, эряфонь кельги, цебярьс надияй ломанькс. Мзярда афолезь кизефте, кода марясы сон прянц, фалу отвечсель: «Пяк лац!»
Каннемок Советскяй Союзонь Героень лемть, ломаттнень еткса Михаил Петрович ульсь пяк скромнайкс. Собраниятнень, заседаниятнень, илатнень пингста занцесь васта залса, сяс мес фалу мялецоль улемс марса сембонь мархта. Лиякс мярьгомс, ашезе кельге лихнемс прянц сяда вярьцек вастс.
М.Девятаев видешинь кельги ломанель, а кельготни, аф видексонь ломаттнень, мярьгат, пачк няезень.
—Мезень колга азонкшнесь земляконзон мархта васетькшнемста?
—Пяк кельгозе оттнень мархта корхнеманц. Лятфнезень войнань кизотнень, советскяй народть оцю подвигонц, азонкшнесь фашистонь пленцта ворьгодеманц колга. Шарьхкотьф, тянь мархта Михаил Петрович кошярязень оттнень кельгомс шачема масторть, улемс анококс сонь араламонза и мзярдовок и мезьдовок аф пелемс.
—Войнада мельдень кизотнень, улемок Казанень ветеранонь Советонь членкс, Михаил Петрович лама тиендсь войнань ветераттненди лезнеманкса. Мяленц коряс пуроптфоль благотворительнай фонд, конанди Девятаев арась председателькс. Азонтт тянь колга аф лама.
—Михаил Петрович пяк пичедсь, мес ламоц ветераттне кармасть эряма сяда кальдявста, лядсть ськамост, кирдихть вачаши. Тя и кошардозе фондть пуроптоманцты. Мяленц эстокиге кирдезе Казанень войнань ветеранонь казанскяй ошень комитетть председателец В.А.Сандгареев. 1997 кизоня фондсь ушедозе эсь работанц. Спонсоронь вешендеманкса Девятаев сонць яксесь организациятнень эзга. Теенза, кода героенди, макссельхть коса 500 цалковай, коса сяда лама, а коса ярхцамбяль. Сон семботь эстокиге явондозе ашуфненди. Рамсесь ветераттненди лекарстват, казнет юбилярхненди. Мзярда фондсь получась кяскавса почф и сахар, Михаил Петрович сонць арнесь трамвайса ошть келес, пачфнезе продукциять адресс коре. Улендсь, Девятаев макссесь ашуфненди щапт-каряпт эсь аф козя гардеробонц эзда.
—Юрий Фролович, 1975 кизоня тонь мяльцень коряс, Торбееваса, Девятаевонь шачема кудонц вастса панчфоль кудсь-музейсь. Лятфтак экспозициятнень кочкамаснон колга и кодама сталма мархта савсь васьфтемс.
—Тяфта лемневи персональнай музейхне ся пингть панчсевсть аньцек     СССР-нь Культурань министерствать специальнай мярьгоманц коряс. Башка случайкс арась масторлангонь васенце космонавтти Ю.А.Гагаринонди лемтьф музейть панжемац. Эста мон, работамок КПСС-нь райкомонь пропагандань и агитациянь отделонь вятикс, молень эняльдема мархта А.И.Покрышкинонди, кона ся пингть вятезе ДОСААФ-нь ЦК-ть. А.И.Покрышкин, кулемок эняльдемазень, лоткафтомань: «Мишанди? Девятаевонди? Кунара ни панжемаль музей. Аф сай верондамазе, што улихть тянди каршек ащихть». Меле кеподезе «кремлевкань» телефоннай трубкать, азозе проводть тона песа кулхцондыти прябаланьконь, а меле мярьгсь: «Мрдак, цёрай, Торбеевав. Строясть музейть. А Культурань министерствать указоц кармай».
Музейса уликс ламоц экспонаттне пачфтьфтольхть Казаньцта. Эздост сняроль, што педа-пес пяшкотьфоль вагононь фкя купесь. Етксост фотографият, документт, кудъетконь паршихть, щапт и лият. Сембоц ниле тежянть малава экспонат.
—Юрий Фролович, тейть удалсесь улендемс Девятаефнень ширеса. Мезе азолеть семьяснон колга?
—Михаил Петрович пяк кельгозе рьванц, Фаинать, и шабанзон. Семьяц теенза фалу васенце вастсоль. Улендсь, кирдеви кодамовок пуромксса, таколгоды, сяс мес учендсы и пичеди Фаечкась (тяфта лямбоста лемнезе рьванц). Девятаефнень семьясост ашель васта кяжи валхненди, сюцематненди. Идензонды Михаил Петрович ульсь цебярь ялгакс. Мезтивок вихца ашезень кошяря, сявондезень мяльс синь мяльснон. Пяк кельгозе уноконзон мархта возсеманц. Лувондсь теест ёфкст. Мзярда синь венемсть, сявондезень мархтонза авиационнай илатненди, штоба лийфтемс вертолетса.
—Тячи мезьса заняфт М.П.Девятаевонь иденза?
—Цёрац, Александр, медицинскяй наукань доктор, аф фкя киза ульсь кафедрань вятикс Казанскяй медицинскяй институтса (тяни университет). Тяни заняф бизнесса. Алексеень кафта стиренза. Михаил Петровичень стирец, Нэли, аделазе консерваториять, тяни заняф преподавателень тевса. Нэлить стане жа кафта шабанза—стирь и цёра. Кеняртьфти, мес Девятаевонь иденза аф юкснесазь сонь ёмла родинанц, полаткшнесазь аляснон пара коенц—эрь кизоня сашендыхть Торбеевав. Улендихть и Саранскяйса.
—Спасиба!
 
О.ЕВДОКИМОВА.
 
Сургутонь школатнень эса тонафнихненди пачфтьфоль-азонтфоль геройть эряфонц
и подвигонц колга
Аф кунара Ханты-Мансийскяй автономнай округонь—Югрань Тюменскяй областень Сургут ошень образовательнай учреждениятнень эса ульсть Советскяй Союзонь Геройть, Великай Отечественнай войнань участникть, марнек мирса-масторса содаф летчикть М.П.Девятаевонь 100 кизонь топодеманцты лемтьф васедемат. Мордовскяй (мокшень и эрзянь) народть Межрегиональнай общественнай организациять пшкядеманц коряс синь аноклазень и ётафтозень «Масторава» Мокшэрзянь культурнай центрать председателец, Рузаевскяй райононь Трускляй велеса шачф-касф мокшалясь Геннадий Сергеевич Наркаев.
«Ужяль, но кизоста кизос ётксонк ляткшни коль сяда кржа ломаньда, конат казезь тейнек Великай Победать. Минь фалу карматама мяляфтома народоньконь геройкс улеманц, мезьдовок аф пелеманц колга. Тя максси эрти эздонк вийхть, сай пингти кемама и виияфнесы шачема ширети кельгомать. Марстонь тевоньке—ванфтомс историять и пачфтемс касы поколенияти атяньконь, синь аляснон подвигснон колга. Тячи, мзярда улихть тяряфнемат кирьфтамс Великай Отечественнай войнаса советскяй народть Победанц    питненц, саме мяльс нинге и нинге весть лятфтамс Михаил Петрович Девятаевонь подвигонц колга»,—мярьгсь Геннадий Сергеевич.
Афкукс, М.П.Девятаевонь «Побег из ада» книгац нолдафоль пяк оцю тиражса, подвигонц колга снимандафт документальнай телевизионнай фильмат, мекольцесь эздост, кона канни «Догнать и уничтожить» лем, аф весть няфтьфоль федеральнай телеканалхнень эса.
Г.С.Наркаев азозе, што Сургутонь образовательнай учреждениятнень эса тонафнихне оцю мяльса кулхцондозь Мордовияса шачф-касф летчикть колга азондомать и ванозь вяре азф фильмать.
Тяддень 8 июльста топоди 100 киза Михаил Петровичень шачема шиста. Великай Отечественнай войнать васенце шистонза сявомок мокшалясь примась участия фашисттнень каршес тюрематнень эса. 1941 кизонь сентябрти сон тись боевой 180 лиема, кожфонь 35 тюремаса прафтсь врагонь 9 самолетт. Сяка кизоня ранендафоль, етафтфоль тихоходнай авиацияс, но 1944 кизоня, А.И.Покрышкинонь мархта васедемада меле, мрдась истребительнай авиацияти. 1944 кизонь июльста М.П.Девятаевонь самолетоц Львов ошть видеса кожфонь тюремаса прафтфоль. Летчиксь стакаста ранендафоль и повсь пленц.
Тянь кулемста Тюменскяй областень Сургут ошень образовательнай учреждениянь тонафнихне ащесть сетьмоста. Самолетсь прафтфоль, сяс мес немецкяй самолетта сяда ламоль. Сонць летчиксь повсь пленц. Сембе?! Аф!
Улемок концлагерьхнень эса, М.П.Девятаев няфтезе прянц стакада-сталмода аф пели, кядень аф ноляй ломанькс. Мусь афкуксонь ялгат, нльне тяряфнесь ворьгодемс, тянкса теенза лихтьфоль приговор—куломась. Но тявок ашезе мянде сонь! 1945 кизонь январьста сон тага ушедсь аноклама ворьгодемати. Тяка кизоня 8 февральста Михаил Петрович ялганзон мархта фатязь немецкяй инь од самолетть и ворьгодсть врагонь салавань аэродромста, тись подвиг, кона сембе пингс сувась историяти.
СССР-нь Верховнай Советть Президиумонц 1957 кизонь 15 августонь Указонц коряс М.П.Девятаевонди максфоль Советскяй Союзонь Героень лем и Ленинонь Орденоц и «Золотая Звезда» медальсь!
«Масторава» Мокшэрзянь культурнай центрать председателец Г.С.Наркаев тонафнихненди тянь азондомста марясь афкуксонь гордость содаф земляконьконь инкса. Ульсть кизефкст, кода ладявсь Михаил Петровичень эряфоц сяльде, мезе тиендеви колганза мялямть ванфтоманкса шачема ширесонза и стак тов.
Геннадий Сергеевич азозе, што М.П.Девятаев пяк кельгозе шачема ширенц. Сонь колганза мяляфтыхть кода Татарстанца, стане и Мордовияса. Сон—Мордовия Республикань, а стане жа Казань ошень Почетнай гражданин. Лемозонза Торбееваса панчф музей и ладяф мяляфтомань стела, Саранскяйса етафневихть греко-римскяй бороцямать коряс пялькстомат, Саранскяйса и Мордовиянь лия райоттнень эса лемонц каннесазь ульцятне.
Михаил Петрович эряфонь мекольце шинзон самс примсесь участия Мордовияса етафневи общественнай оцю пуромкснень, тяконь лувксса и Мордовскяй (мокшень и эрзянь) народть съездонзон эса.
Сургутонь стирнятне и церанятне кашт аф молезь ванозь «Догнать и уничтожить» документальнай телефильмать, конань эса М.П.Девятаев пачфнесь эряфонц, тяконь лувксса и концлагерьста ворьгодеманц колга.
«Благодарностень валхт мялезе азомс Сургут ошень Внешняй связень Управленияти, Сургут ошень Образованиянь Департаментти, школатнень руководстваснонды тонафнихнень мархта васедематнень етафтоманкса и теест анокламаса лезксонь максоманкса. Надиян, мужествань урокне мяляфтовихть тонафнихненди и путыхть кой-конашка талека синь афкуксонь патриотокс касфтомаснонды и эсост Родинати кельгомать виияфтоманцты»,—азозе Г.С.Наркаев.
Т.АЛЬШИНА.

08.06.2017 №22
 
 
 

 
НОВОСТИ
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

Турчак: В парламенты всех 85 субъектов России внесены законопроекты о сохранении региональных льгот для людей предпенсионного возраста

На сегодняшний день в парламенты всех субъектов Российской Федерации внесены
законопроекты о сохранении региональных льгот для женщин, достигших 55 лет, и для
мужчин 60 лет. Об этом сообщил секретарь Генерального совета «Единой России»
Андрей Турчак.
«На сегодняшний день в парламенты 85 субъектов РФ внесены законопроекты о
сохранении региональных льгот для граждан предпенсионного возраста – женщин 55 лет
и мужчин 60 лет. В 37 регионах законы о сохранении региональных льгот в прежних
возрастных границах уже приняты законодательными собраниями. Из них в 18 субъектах
РФ документы подписаны губернаторами. Еще в трех регионах данные законопроекты
рассмотрены и приняты в первом чтении. В 45 регионах России законопроекты будут
рассмотрены в самое ближайшее время: в большинстве – до конца сентября и в
нескольких – в октябре», – заявил Турчак.
По его словам, сохранение региональных льгот для людей предпенсионного возраста –
один из важнейших вопросов, который поднимался в субъектах РФ при обсуждении
совершенствования пенсионной системы. «Поэтому на совместном заседании
Генерального совета и Совета руководителей фракций мы приняли решение рассмотреть
вопрос о сохранении региональных льгот для людей предпенсионного возраста в
осеннюю сессию. Нашу инициативу в своем обращении поддержал Президент России
Владимир Путин», – напомнил Турчак.
24.09.2018
 
 

РЕГИОНАЛЬНАЙ ЛЬГОТАТНЕ ПЕНСИОНЕРХНЕНДИ ВАНФТОВИХТЬ

20.09.2018  № 37
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин