Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Молодежный клуб

Сембе тевса сафтсы, сембоса кенери

Мазы стирсь, конань няйсасть фотоста, Рузаевскяй райононь Мокшень Пишля велеста Алина Товмасян. Тяса шачсь-кассь тядяц, тяса эряй сонь щавац, мокшавась Галина Васильевна Епифанова. Улема, щаванц лангс ванозь Алинань седиса эвондась национальнайти кельгомась. Галина Васильевна кирди кеме соткст велень Культурно-досуговай центрать мархта, пяк кельгсыне мокшень щапнень-каряпнень. Сон—машты кядь кудазорава. Сидеста аноклакшни национальнай ярхцамбяльхть. Аф весть сонь ульсь кода няемс телевизионнай каналоньконь передачанзон эса, коса макссесь мастер-класст тя или тона ярхцамбяльть анокламанц коряс. Вов и унокоцка Алина тонадсь тянди семботи нинге шабакс. Стирсь тонафни А.П.Байкузовонь лемса Рузаевкань Железнодорожно-промышленнай техникумса. Сяда тов мялец работамс транспортса управлениясь и грузоперевозкатнень организациясна специальностьс коре.   
Алина, кода и Галина Васильевна, фалу примси участия ётафневи пуромкснень эса. Аф ваномок сянь лангс, што сашендови якамс лия райоттнень эзга, фалу анок. Кунара ни сёрматфтсь пря кружокненди, уленди пцтай сембе занятиятнень эса. Машты кштима-морама.
«Идькс пингста пяк кельгине улендемазень Мокшень Пишлянь Культурно-досуговай центраса. Арьсян, инь мала ломаннень эзда фкясь—щавазе, тонафтомань мороньконь, коеньконь-обуцяньконь кельгома»,—мярьгсь Алина.
Галина Васильевна сявондезе уноконц велеса етафневи ламоц пуромксненди. Алина оцю мяльса ванондсь кштийхнень, морайхнень лангс, а сяльде сонцьке ушедсь няфнема прянц тяфтама тевса. Пяк лац кштий, сяс музе вастонц Культурно-досуговай центрать видеса кштимань кружокса. Од кизось, 8 Мартсь, Идень араламань шись и ламоц лия праздникне аф ётнихть соньфтемонза. Башка мяль шарфни мокшэрзятнень сядонгольдень эряфснонды-ащефснонды, мокшень койхнень-обуцятнень вельмофтемаснонды.
«Фалу кизефнеса щавазень, кода васьфнезь-ётафнезь велесонк илатнень, кодамоль эста эряфсь-ащефсь. Лама мезе мялень салай пачфни тейне. Тянь семботь тяшнеса и азонкшнеса ялганенди,—поладозе Алина.—Мялезон корхнемс велеряйхнень мархта. Эрь васедемать вельде панчсян мезе-мезе одня сядонгольдень пингть и тячиень эряфть колга».
Алина морси Мокшень Пишлянь «Лихтибряня» коллективса. Варжазень виезон драматическяй кружокса—тявок теенза вийс коре. Эрь жанрань рольть налхксы маштозь, верондафтыста. Но сембода пяк мялезонза кштиматне. Кельгсы тяниень пингонь музыкать, фольклорть.
А.Товмасян аф юксни кудонь тефненьге колга. Велеса эздост фалу лама: панденянь кочкоматне, валоматне, перень сёронь, иможень урядамась и стак тов. Тясовок сон сафтсы, васенце лездысь кельгома щаванцты. Кода и велеса шачф-касф эрь идсь, аф эвфтьсазь сонь перень работатне. Ётка пингстонза кельгсы пидеманц-панеманц. Ладяй мяльс туф кодамовок музыка и кярьмоди тевс. Ванат—сембось лиссь, удалась.
Пайгарма шабрань велеса 9 классть шумордамдонза меле мокшень стирсь Алина, кода ни азфоль сяда вяре, поладозе тонафнеманц Рузаевкаса техникумса. Пингонц ламошканц етафнесы ошса, но седиец фалу уски Мокшень Пишляв. Сяс ваймамань, праздниконь сембе шитнень ётафнесыне велеса.
Кельгсыне Алина сценав лисендемань щапнень-каряпнень. Кода мокшеннетнень, стане и рузоннетнень, тяконь лувксса стилизованнайхнень. Щасак, кле, эрть эздост, и бта аф лама пингс мрдат ся пингти, мзярда тяфтама щамса якасть эрь шиня.
Сатфкст тейть, Алина!

03.08.2017 №30
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин