Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Национальная тематика

«Мокшэрзянь сёрматкссь мастор лангса инь мазысь»,—мярьгсь тонафнись Саша Косякова

Саранскяень 2№ художественнай школав Саша Косякова сась колма кизода инголе. Пяк мялецоль тонадомс рисовандама, стама-кодама. Трудонь кельгоманц стирнясь няфтезе васенце шистокиге, оцю кельгома мархта, маштозь тиендезень васенце стафксонзон. Аф лама пингонь етазь аноколь ни васенце работац—мокшекс сёрматф кисетсь, кона мазоптфоль емла ожнаняса. Тяниень пингть сон ванфтови Тула ошень музейса.
Сашать мяльс пяк тусь эсь кядьсонза аноклакшнемс эскиснень, рисункатнень, лама творческяй мяль-арьсема сувафтсь эсь работанзонды. Художественнай школаса киза тонафнемда меле Саша сермадсь эрзянь нардама. Стирнять тонафтыец С.П.Гагарина азсь мяль примамс участия «Параскева-рукодельница» Межрегиональнай конкурсса. Сашась согласиндась и сатсь тоса цебярь результат—омбоце вастть Мордовиянь тонафнихнень еткста.
Мокшэрзянь серматксть Саша Косяковась кочказе аф стак. Сон, кле, масторлангса инь мазысь, эсонза и сельмос пови тюсне, и трудсь, конанди стака максомс оценка.
Аш кода аф азомс Косяковать национальнай щамса щаф няканзон—мокшаванять Дашань и эрзявать Машань колга. Синь няйсасть снимкать эзда. Панархнень, пряс щаматнень, мазоптомбяльхнень—семботь стирнясь стазе-аноклазе эсь кядьсонза. Москуса етафтф международнай конкурсса Сашать няканза сявозь васенце вастть.
Саша Косяковать фкя инь оцю работац—мокшэрзянь рьвакс лисемань костюмсь. Башка мяль стамстонза шарфтфоль мазоптомбяльхненди, вдь мокша, эрзя аватнень, кода корхнихть, васенда кульсайть и аньцек тяда меле няйсайть. Тяфта и лиссь. Тяфтама костюмса эрь рьвянясь кармай маряма прянц инь мазыкс. Аф юкстафоль и пряс щамать колга. Сонь Сашась сермадозе золотань тюсса емла ожнаняса, конат мялень салазь пиндолдыхть-вандолдыхть шить каршеса.
Саша Косяковать коллекцияса 20-да лама работа. Кой-конатнень эздост ули кода няемс Москувонь, Тамбовонь и Тулань музейхнень эса. Но, кода содаф, творчествась аф содай пе. Од мастерицать арьсемасонза сяда товга кеняртьфнемс эсь сёрматксонзон мархта, полаткшнемс атяньконь-бабаньконь стамань-кодамань тевснон, ванфнемс, тиендемс сембе вастова содавиксокс мокшэрзянь культураньконь.
О.ЕВДОКИМОВА.

25.08.2017 №
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин