Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Наши мокшанские сыновья и дочери

ТЯШТЕМАНЬ ТЕВС БСЛАВАЕЗЕ

Васенцеда Сергей Васильевичень няине ётай веконь кафксогемонце кизотнень ушетксста. Эста поэттне, писательхне сидеста васьфнесть эсь морафтыснон мархта. Сашендсь писателень делегация Атерь велень 1№ средняй школав. Ётксостоль Сергей Васильевич. Кулхцондонь эсонза кашт аф молезь. Поэтсь ламотнень седиснон солафтозень эсь стихонзон мархта. Ульсть кизефкст, ответт, книгань каземат. Эста тяшнень ни стихт. Мялезель синь кинди-бди няфтемс. Тя васьфтемати пяк кенярдень. Ёрань маладомс Кинякинонди, но виздень. Пингонь ётазь Сергей Васильевич тянкса пяк сюцемань. И аф сельмода сельмос, а сермаса.
Тумдонза меле васта эстейне ашень мушенда. Няфтемальхть стихоне. Тя мяльть аф весть азонкшнине тонафтыезти, МАССР-нь Заслуженнай учительти М.В.Кондрашкинонди. Сон кошардомань тяштемс сёрма Кинякинонди. Эсонза азыне эсь мяльнень васьфтемать колга, кона ётась лямбоста, мялень салазь. Куватьс мяляфтови шабатненди. Кучине колма стихотворениянень: «Монь велезе», «Тундась сашенды», «Школати». Куватьс учемс ашезь сав. Аф лама пингонь ётазь сась ответ. Кода ни азыне, васенда поэтсь сюцемань, мес ашень нежеде Атерьса улемстост. Сяльде шнамань. Стихоне тусть мялезонза. И мзярда азозе, што васенцесь ули печатлаф «Якстерь тяштенять» 1981 кизонь  колмоце номерсонза, а лядыхне лия номерхнень эса, шачсть пацяне. Кенярдемать эзда аф якань, а лиезь лиендень. Сияк азса, што эста тонафнень аньцек сисемце класса и варчсине вийнень тяштемаса.
Кода надияфтсь Сергей Васильевич, сембе стихоне лиссть «Якстерь тяштеняса». Аф юкстави ся, кода поэтсь шнамань телевиденияса. Ульсь сёксе. Модамарень таргама пинге. Мордовскяй телевиденияса мольсь литературати лемтьф передача мокшень кяльса. Эсонза примасть участия содаф поэттне, писательхне С.В.Кинякин, И.М.Девин, В.И.Мишанина. Тосовок Сергей Васильевич шнамань. Кле, эряви тяштемс и тяштемс, перась шямонияфнемс, ношкапнемс аф кадома. Тя ульсь бславама тяштемань тевти. Содаф поэтть валонзон мяляфтсайне тянемс.
Пингсь содась ётаманц. Касонь. Кефкиеце класса ни тернемань «Мокшень правдась» велень корреспондетонь пуромксс. Малазон сась С.В.Кинякин. Люпштазе кядезень, мярьгсь: «Тяштть. Тя тонь аф кальдявста лисенди».
Тяштень. Вузса тонафнемста тернемань Сергей Васильевич од писателень семинарс. Сон етнесь эста Советскяй ульцяса, 55№ кудса. Кинякин вятезе поэзиянь секциять. Эзонза сувсесть И.М. Девин, Василий Кригин, лиятне. Морафтонь пеетьксса серматф стих. Шнамазь оцю ялгане. С.В.Кинякин мярьгсь: «Эряви максомс журналу, произведениясь удалась».
Вузса тонафнемста С.В.Кинякинонь мархта васьфнень сидеста. Сувсень аф аньцек редакцияв. Эрянь аф ичкозе редакциять эзда. Сидеста сувсесть корхнема, чайда симома Н.Б.Голенков, Г.И.Пинясов, М.Г.Имяреков, С.А.Самошкин, И.Н.Кудашкин, М.С.Моисеев, Ф.Ф.Пьянзин, кона эста вятезе «Мокша» журналса прозань отделть, лиятне. Кулендень лама азондомада мокшэрзянь литературать, содаф писательхнень колга. С.В.Кинякин пяк лац содазень земляконень А.С.Малькинонь, Р.Р.Федькинонь. Эста нинге шисотольхть В.А.Волков, П.К.Торопкин. Лама азонкшнесь синь колгаст. Ванондозень стихснон и поэмаснон, макссесь питне. Лятфнезе стакадонга стака шабакс пингонц.
Шачсь сай пингонь поэтсь Москуса рабочаень семьяса 1937 кизонь 24 сентябрьста. Пингсь стакаль, аф сетьмоль. Ушедсь Великай Отечественнай войнась. Семьясна етась Зубово-Полянскяй райононь Пичпанда вели. Эста Сергеенди аньцек ниле кизонятольхть. Лац-ряц ашезе шарьхкотькшне, мезе моли странаса. Няйсь лама нужа, вачаши. Эрь шиня кулендсь авардемат, явсемат. Тядятне, рьвятне, сазорхне явсекшнезь войнаса шавф мирдьснон, цераснон, альнякаснон.  Нинге шабакс Сергей Кинякин венемсь содамошитненди, тонафнемати. Морафнесь книгат рузонь, мокшень кяльса. Аделазе велень школать, Н.П.Огарёвонь лемса Мордовскяй госуниверситетонь филологическяй факультетть. Тяштема од церась ушедсь рана, нинге школаса тонафнемста. «Миронь гуленя» васенце стихотворенияц печатлафоль  «Мокшень правдаса» 1957 кизоня. Эста авторти ульсь 20 киза.
Тяштемань тевонц мзярдовок ашезе кадонда. Сермадсь лама. Трудендась книгань издательстваса художественнай литературань старшай редакторкс, «Мокша» журналса ответственнай секретарькс, Мордовия Республикань Писателень Союзса председателень заместителькс. Сон СССР-нь Писателень союзонь член, Мордовия Республикань Заслуженнай поэт, Комсомолонь премиянь лауреат, Мордовиянь Гимнати валонь тяштись.
Мзяра цебярь книга нолдась поэтсь. Синь лац васьфтезь мокшень, рузонь морафтыхне. Макссть оцю питне литературнай критикне, писательхне, поэттне. Лемсна тяфтапт: «Эряфозе, кельгома пингозе», «Сизеф алашань вайгяль», «Шачень эрямс павазукс», «Ялгаксшинь седь», «Анок ульхть», «Инь мазысь» и стак тов. Мзяра цебярь, удалаф стихотворенияц, поэмац лиссь «Мокшень правда» газетаса, «Мокша» журналса. Сембонь лемсна аф лятфтавихть. Сергей Кинякин содаф  кода цебярь редактор, рецензент. Кода сонць кельгозе корхнеманц, главнайсь петемста аф гастямс произведениять, а тиемс сядовок мялень салайкс, шарьхкодевикс, штоба морафтысь афоль тапаря геройхнень, событиятнень ёткс.
Кие аньцек ашезе ванонда С.В.Кинякинонь творчестванц. Серматкшнесть рецензият поэзиянц колга  А.В. Алёшкин, М.Г.Имяреков, М.И. Малькина, Е.И.Азыркина, лиятне. Ашезь юксне писатель, поэт ялганза И.М.Девин, А.П. Тяпаев, В.М.Лобанов, М.С.Моисеев, Ю.Ф.Кузнецов и ламотне лиятне. Морафтсайть ня серматфнень и саят мяльс, конашкава мялень салай и крхка С.В.Кинякинонь поэзияц. Но сембе сяка пови сельмос ся, што аф сембось нинге Сергей Васильевичень колга тяштьф, азф. Сяс кармайхть од рецензият, статьят, исследованият. Од ученайхне, писательхне лия сельмоса, лия ванфса варжакстыхть творчестванц лангс. Поэзиянцты кельгомась кизоста кизос аньцек касы. Творчествац тонафневи школаса, училищаса, вузса.
 
Илья Вешкин,
Россиянь Писателень Союзонь член.

25.09.2017 №37
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин